لە هەولێر هونەرمەندێک دەکوژرێت و بکوژەکەش دەستگیر دەکرێت

لە ڕوداوێکی دڵتەزێندا هونەرمەندی لاو (جێگر عەزیز) لە بەرەبەیانی ئەمڕۆ چەقۆیەکی بەر لا چەپی سینەی دەکەوێت و ژیان لەدەست دەدات.

لە کاتێکدا هونەرمەندی جوانەمەرگ شەو سەردانی چەند هاوڕێیەکی دەکات بۆ کات بەسەربردن، لە بەرەبەیان دەبێت بەشەڕیان و لە ئەنجامدا هاوڕێیەکی لێدانێکی کوشندە بە چەقۆ لە هونەرمەند دەدات و دەبێتە گیان لەدەستدانی.

هەر ئەمڕۆ وتەبێژی پۆلیسی هەولێر ڕایگەیاند کە چوار کەسمان دەستگیرکردووە و یەکێک لەوانە بکوژی هونەرمەند جێگر عەزیزە کە هاوڕێیەتی و خوێندکاری هونەرەجوانەکان بەشی سینەمایە.

جێگر عەزیز لە دایکبووی ساڵی ١٩٩٢ و تا ئێستا چەند کلیپ و گۆرانی هەیە و دانیشتووی شاری هەولێر بووە.