بورهان مەجید: گۆرانی کوردی ئەتک و ئەنفال کراوە

رێبوارمحمەد یوسف : بورهان ئەو هونەرمەندە ئازیزەى کە هەمیشە خۆشەویستى عاشقان و خاک و نیشتمانەکەى کردۆتە ملوانکەیەکء بەگەردنیاندا هەڵیواسیوە، بورهان بێ ئەندازە نیشتمانەکەى خۆشدەوێت و وەکو مۆمێک بۆى دەسوتێت ئەمە جگە لەو عەشقەى کە بۆ گۆرانى گووتن هەیەتى. لەم بەسەرکردنەوەیەى زناردا بورهان بۆ خوێنەرانء هۆگرانى دەنگى هێنامانە دواندن.

زنار: بێزاریت پێوە دیارە، خەمى هونەرو چیترە.

بورهان: لەدوای راپەڕین بەداخەوە دوای ئەو هەموو سەرکەوتنە گەورەیەی کەگەلەکەمان لەئەنجامی زوڵمء زۆری بەعس بەدەستیهێنا دەبوایە ئەو گەلە بحەسایەتەوەو پشوویەکی بدایە بەڵام بەداخەوە نەمانتوانی ئەو سەرکەوتنە بپارێزین ئەوەتا نەکەلتوری هونەری گۆرانی، نە ئاو، نەکارەبا نەپێداویستەیکانی ژیانی رۆژانەی خەڵکمان بۆدابین ناکرێت ئەو غەدرەی  کەبەردەوام لێمان دەکرێت ناتوانین بەپێی پێویست خۆمانی بۆئامادەبکەین خۆمان لەو رەوشە نائارامیە رزگار بکەین بۆیە بەرای من هەموو شتێک شێواوە بەهونەرەکەشمانەوە؟.

زنار: چ بکرێت باشە بۆئەوەی لەم رەوشء لەو پاشاگەردانیەی هونەری کوردی رزگاربین.

بورهان: دەبێت ئێمەی هونەرمەند، شەو رۆژ بخەینە سەریەک تاکوو هونەرو کلتوری گەلەکەمان بپارێزین من بۆخۆم زۆرجاران نەسیحەتی دەزگاو کەناڵەکانی راگەیاندنم کردووە لەو سەرلێ شیوایەی کە پێیدا تێپەردەبین بەڵام تاکوو ئێستا کەس گوێی لێنەگرتووم بۆیە گۆرانیەکانم کشاندەوەو داوام لێکردن بەهیچ جۆرێک گۆرانیەکانم پەخش ناکەن تاکوو وشیار دەبنەوەو لەو پاشاگەردانیە رزگارمان دەکەن بەڵام ئەمان هەر بەردەوام بوون لەو رەوشەو پیشاندانی چەندەها گۆرانی نەخوازراو بەکلتوری دەرەوە کەئەمەش زیاتر بۆ ئەتککردنی گۆرانی کوردی دەگەڕێتەوە زۆرجاران گۆرانیەکانیان بەناوی گۆرانی کوردی لەتورکیا، میسر، سوریا، لوبنانەوە بۆئێمە دێنایەوەو لەکەناڵەکانەوە پەخشیان دەکرد من لەرقی ئەوانە گەرامەوە”پێیان دەڵێم ئێمە پێمان عەیب نیە گۆرانی کوردی دەڵێین ئەگەر گۆرانی کوردی لەهەر ئاستێکدا بێت”.

زنار: کەواتە هەستى بەرپرسیاریەتى بەرامبەر بە هونەرى نەتوەیییمان لاواز بووە.

بورهان: ئێمە نەک هەر هەستی گۆرانی کوردیمان کزبوە بەڵکوو هەستی نەتەوایەتیشمان بەرەو کزیء پاشاگەردانی دەڕوات ونزیک بۆتەوە لەفەوتان، من حەز بەم رەوشە ناکەم بۆیە هەر نەبێت هەندێک جار گوێ لەگۆرانی کوردی دەگرم و بگرە تاکەتاکە گۆرانی بێژ ماوە خەمی گۆرانیء نیشتمانەکەشی بخوات ئێمەش لەو تاکانەوە دەست پێدەکەینەوە.

زنار: ئێوە پەنجەتان خستۆتە سەربرینەکان؟ چی دەکەن بۆ ئەوەى هونەرى کوردى لەو گێژاوە رزگارى بێت.

بورهان: گێژاوەکە بەداخەوە بەرۆکی هەموومانی گرتۆتەوە، دەسەڵاتی کوردی بەبەرپرسی یەکەم دەزانم لەم رەوشەی کەهەیە و دەتوانم راستتر بڵێم هیچ چاوەڕوانی لەدەسەڵاتی کوردی ناکرێت بۆ چارەسەرکردنی ئەم کێشەیەی کە هونەری گۆرانی کوردی تێکەوتوە وبگرە بەقۆناغێکی پڕ مەترسیداردا دەڕوات بۆیە تەمەنا دەکەم پارتێکی نەتەوایەتی کوردی دروست بێت کەهەستء هۆشی جەماوەر بەرزبکاتەوەو گرێیان بداتەوە بەخاکەکەیەوە لەوانەیە ئەوکاتە گۆرانکاریەک دروست بێت بۆیە لەئێستادا چاوەڕوانی خراپتر دەکەم چونکە گۆرانی کوردی وەک مەزاتخانەی لێهاتووە.

زنار: تۆ پێت وایە پارتێکى (نەتەوایەتى) هەروەک خۆت ناوت لێناوە دەتوانآ گۆرانی کوردیش بخاتەوە سەر راستەڕێی خۆی.

بورهان: ئەوە ئاواتء حەزوو ئارەزووی منە من حەزناکەم داگیرکەر بێتەوە بە وڵاتەکەمدا چونکە زۆر زوڵمء زۆرو ئازارمان چەشتووە لەرابردوودا بەڵام ئەگەر داگیرکەر بێتەوەو نەتوانین پارێزگاری لەبوونی گەلەکەمان بکەین ئەوکاتە دڵنیام جەماوەر زیاتر گوێ لەگۆرانی کوردی دەگرن چونکە حەماسەتی خەڵک زیاتر دەبێتء ئەءکاتە خەڵک حەزدەکات گوێی بەئاوازی کوردی بشنێتەوە.

زنار: ئەم ماوەیە گۆرانیەکت بۆشاری سلێمانی گووتووە هەست ناکەیت ئەمە ناوچەگەری بێت.

بورهان: کێ هەیە شارەکەی خۆی خۆش نەوێتء خەونی زۆری پێوە نەبینیبێتء هەوڵی گەشەکردنء پێشکەوتنء قوربانی دانی بۆنەدات. من لەو گۆرانیەدا شارەکەی خۆمم وەک رەمز بەکارهێناوە چونکە من زیاتر شارەزای شاری سلێمانیم لەبەرزیء نزمی،تاریکء، روناکی، خۆئەگەر هەر کەسێک گوێی لەوگۆرانیە بێت بەتایبەتی خەڵکەکەی دەتوانن بەهی شارەکەی خۆیانی بزانن ء دەتوانن شاری سلێمانی لابەرن، لەباتی ئەوە، دهۆک، هەولێر، قەڵادزێ، رانیە، هەڵەبجە، خانەقین….هتد دابنێت هیچ لە رەوشی شیعرەکە ناگۆرێت چونکە ئەم شارانە وەک شارەکەی من داماون.

زنار: بە بۆچوونى کوردى گۆرانى کوردى رەسەن بەرەو فەوتان دەچێت.

بورهان: خۆ هەر گۆرانی کوردی لەقەیراندا نیە هەموو شتێک لەقەیراندایەو شێواوی بەروویانەوە دیارە لەهەموو روویەکەوە چۆن دەتوانین لەفەوتان بیپارێزین، دەبێت هەوڵ بدەین بەهەموومان گۆرانی کوردی رێچکەی خۆی بگرێت بۆیە من لەرێگەی خۆمەوە بەپێی توانا درێغیم نەکردووە لەرسواکردنی ئەوانەی کەگۆرانی کوردیان بەم دەردە بردووەو بوونەتە دوومەڵء دڕکء داردەستی دوژمنەکانی کوردو دەچن لە وڵاتانی تر بەرەقسء سەماوە دێنەوە گۆرانی پەخش دەکەن وادەزانن گەلەکەیان رزگارکرووە، نازانن چ کارەساتێکیان خوڵقاندووە بۆگەلەکەمانء لەپاشەرۆژدا چ بەرهەمێکی بێ پێپز دەچننەوە.

زنار: بە بڕواى تۆ ئەو هونەرەى ئێستا جێگاى شانازیکردن نیە، یاخود بە هونەرى کوردى نازانى.

بورهان: هەر کەسێک شانازی بەخۆیء کلتوری گەلەکەیەوە نەکات، لەخزمەتکردنی گەلەکەی دادەبڕێتء لەپاشەرۆژدا پەنجەی خیانەتی بۆرادەکێشرێت، بۆیە پێویستە لەسەر هەمومان خزمەتی گەلەکەمان بەهەموو کلتوری دونیا نەگۆڕینەوە ئێمە نەتەوەیەکی ژێر دەست بووین  هونەرەکەشمان ژێر دەستەیی بەخۆیەوە بینیووە ئەوەتا گۆرانی کوردیان ئەنفال و ئەتک کردووە دەسەڵات دۆلار دەداتە بەشێک لەو گۆرانی بێژانە کەدەچنە تورکیا، میسر، ئێران، سوریا، لوبنان تاکوو گۆرانی کوردی لەناوبەرێت بەوەشەوە ناوەستێ مەدالیای (عار)دەنێ بەسنگیانەوە، نایەت بیر لەو هەموو کلتورەی گەلەکەمان بکاتەوە کە خاوەنی چی سەرمایەیەکی گۆرانی کوردین.

زنار: بەڵام ئەم تێکەلاویەى هونەرى کوردى بە هونەرى گەلانى دیکە دەوڵەمەندترى ناکات.

بورهان: من وەکوو خۆم بروام بەرۆژهەڵاتء رۆژئاوا نیە، ئالەتی، کەمانجە، فلوت، باقی ئالەتەکانی تر هی چ وڵاتێکن هاتوونەتە لای ئێمە ئەوە رۆحی رۆژهەڵاتء رۆژئاوایە بەم دەردەی بردوین ئێمە لەوەدەچێت رۆحیشمان نەمابێت و بوبین بەمرۆڤێکی کارتۆنی یاخوود ئالی بۆیە ئەوانە درک بە گۆرانی رەسەنی کوردی ناکەن، ئەوان رۆحیان کوشتوینء رۆحیشمان دۆراندووە. بۆیە ئەو کەناڵانەی کە ئەم گۆرانیە لێدەدەن ئایا رازین کچء خوشکء براکانی خۆیان لەگەڵ ئەم گۆرانیبێژانە هاوتابکەنء سەمایان لەگەڵدا بکەن ئەمە پێشکەوتن نیە بەڵکوو گاڵتە جاڕیە.

له‌ ژماره‌ 38 گۆڤاری زنار بڵاوکراوه‌ته‌وه‌، له‌ سه‌ر تۆڕی ئینته‌رنێت ته‌نها له‌ چرا تیڤی بیخوێنه‌وه‌