سلێمانی 27 ئایار/مایۆ (ئاكانیوز)- باكۆ سۆرانی كە یەك لە شانۆكارەكانی كوردە و لە هۆڵەندا نیشتەجێیە، لەم دیدارەدا بۆ ئاژانسی كوردستان بۆ دەنگوباس (ئاكانیوز)، تیشك دەخاتە سەر كار و چالاكییە شانۆیییەكانی لە هۆڵەندا و باس لە دروستكردنی (تیپی شانۆی بێ سنوور) دەكات بەهاوكاریی كۆمەڵێك هونەرمەندی نەتەوە و زمان جیاواز.
پرسیار: ئامانج لە دامەزراندنی (تیپی شانۆی بێ سنوور) لە هۆڵەندا چییە و ئەو گرووپە وەك تیپێكی شانۆیی لەو وڵاتەدا چ كاریگەرییەكی هەبووە؟
وەڵام: لە راستیدا من هەر لە ساتی گەیشتنم بۆ هۆڵەندا، بەردەوام لە شانۆ دانەبڕاوم و سەرقاڵی كاری شانۆییم، بۆیە توانیومە لە رێگەی (تیپی شانۆی بێ سنوور)ەوە بەردەوام بم لە كاری شانۆیی و تا ئێستەش چەندان بەرهەممان هەبووە، توانیومانە پردێكی باشی پێوەندیی نێوان شانۆ و بینەر و چینە جیاوازەكانی كۆمەڵگەی هۆڵەندایی دروست بكەین، چونكە هۆڵەندا و ئەوروپا ئێستە بەهۆی كۆچ و جیهانگەرایییەوە بووەتە نیشتمانێكی فرەكولتوور و فرەزمان، ئەم پێوەندی دروستكردنەی كولتووریش بەبڕوای من یەكێكە لە ئامانجە سەرەتایییەكانی شانۆ لە مێژووی هەموو میلەتاندا.
پرسیار: كەی (تیپی شانۆی بێ سنوور) دامەزراوە و ئایا هەموو گرووپەكە كوردن؟
وەڵام: نەخێر هەموومان كورد نین، (تیپی شانۆی بێ سنوور) لە ساڵی 1994 لەسەر دەستی كۆمەڵێك شانۆكاری كورد و هۆڵەندایی و میلەتە جیاوازەكانی تری هۆڵەندا هاتووەتە دامەزراندن، لەو شانۆكارە كوردانەش كە بەشداریی شانۆیییەكان دەكەن وەك ئەكتەر، برێتین لە (فەیسەڵ سابری، باكۆ سۆرانی، هاوژین باخریا، زاگرۆس جەبار، سامان ئەحمەد) و چەندانی تر، ئەمە جگە لە شانۆكارانی نەتەوە جیاوازەكانی تری ناو هۆڵەندا كە هەموویان شانۆكاری باش و ڕژدن.
پرسیار: دوا بەرهەمی ئەم گرووپە شانۆیییە چییە و لە كوێ پێشانتان داوە؟
وەڵام: دوا بەرهەمی شانۆییمان برێتییە لە شانۆگەرییەك بەناوی (هۆڵەندا تازەكە) لە نووسین و دەرهێنانی منە، ئەویش بابەتێكی سەرنجڕاكێش و پڕ لە درامایە و هەفتەی رابردوو پێشانمان دا، ماوەیەكی زۆرە پێوەی سەرقاڵین و لە چەند شارێكی هۆڵەنداش پێشانمان داوە، لەوانە (دنهانغ، رۆتەردام، ئارنهیم) بەنیازیشین لە چەند فێستیڤاڵێكی شانۆییی ناوەخۆیی و دەرەوەش بەشداری بكەین.
پرسیار: تا ئێستە (تیپی شانۆی بێ سنوور) هیچ خەڵاتێكی هونەریی لە فێستیڤاڵەكاندا بەدەست هێناوە؟
وەڵام: بەڵێ بەدڵنیایییەوە تا ئێستە چەندان خەڵاتی شانۆییمان وەك ئەكتەر و دەرهێنان بەدەست هێناوە، بەردەوامیش ئامادەییمان لە فێستیڤاڵە شانۆیییەكانی هۆڵەندا هەیە.
پرسیار: (هۆڵەندا تازەكە) دوا بەرهەمی شانۆییتانە، چیڕۆكی ئەم شانۆیییە باس لە چی دەكات و لەسەر چ بابەت و باسێك دەڕوات؟
وەڵام: چیڕۆكی ئەم شانۆیییە چیڕۆكێكی سەرنجڕاكێش و گەرما و گەرمی كۆمەڵگەی هۆڵەندایییە، باس لە گەڕان و پرسیاركردن دەكات لە خود و لە پرسیارە كەینونییەكانی مرۆڤ لە كۆمەڵگەیەكی وەك هۆڵەندا دەكۆڵێتەوە، باس لە مامەڵەی هاوڵاتیی بیانی دەكات لەو كۆمەڵگەیە و چۆنیەتیی خۆگونجاندنی لەگەڵ كولتوورێكی تازە كە كولتووری هۆڵەندایییە، دیارە ئەم باسەش گەرموگوڕییەكی لە رادەبەدەری هەیە لە كۆمەڵگەی هۆڵەندەدا، چونكە ئێستە پرسی پەنابەر و بیانی لە وڵاتانی ئەوروپا و هۆڵەندا پرسێكی زۆر گەرمە و بەردەوام لە میدیا و كەناڵە جۆرەوجۆرەكانەوە باسی لێوە دەكرێت.
پرسیار: كێ رۆڵی سەرەكی لەم شانۆیییەدا دەبینێت؟
وەڵام: پاڵەوانی شانۆیییەكە ئەكتەرێكە بەناوی (عەبدۆ)، ئەم ئەكتەرە لەم شانۆیییەدا دەگەڕێت بەدوای خودی خۆیدا و دەیەوێت پانتایییەكی تازە لەو كولتوورە تازەیەدا بدۆزێتەوە كە ئێستە لە هەوڵی ژیانە تێیدا، هەوڵی بەردەوامی ئەم كارەكتەرە لەم شانۆیییەدا بۆ پانتاییی ئازاد و بیركردنەوەی ئازادە لەو كولتوورە جیاوازەی كە بەری دەكەوێت و جیاوازە لەو كولتوورەی كە تێیدا ژیاوە لە وڵاتەكەی خۆیدا، (عەبدۆ) بەردەوام دەیەوێت لەو كولتوورە تازەیەدا خۆی بگونجێنێت و لەگەڵ كەشی وڵاتە تازەكەدا هەڵبكات، بەڵام ئەو بەبەردەوامی لە ژێر سانسۆردایە، بۆیە لە رارایی و نادڵنیاییدا دەژی، لەبەرئەوەی ناتوانێ لەگەڵ ئەو كولتوورە تازەیەدا خۆی بگونجێنێت، ئەمەش بێ گومان حاڵەتێكی نەرێنیی تەندروستی و دەروونیی بۆ دروست دەكات لە چیڕۆكی شانۆیییەكەدا.
پرسیار: دەكرێت بڵێین پرسی پەنابەر و كولتوورە جیاوازەكان لەم شانۆیییەدا پرسێكی گەرم و گوڕە؟
وەڵام: بەڵێ بەدڵنیایییەوە وایە، چونكە ئەمڕۆ وەك گوتم ئەو باس و خواستانە لە نێوەندە سیاسی و میدیایییەكەی ئەوروپادا باس و خواستی زۆری لەسەرە، شانۆش لەو نێوەندەدا دانەبڕاوە و پرسیار و هەڵوێست و قسەی خۆی هەیە.
پرسیار: شانۆ لەو باس و خواستەدا دەتوانێ چی بكات؟
وەڵام: دەتوانێ زۆر شت بكات، شانۆ پرسیار لە بوونی مرۆڤ دەكات لە هەر كولتوورێكی جیاوازدا بێت، شانۆكاری كورد دانەبڕاوە لە كولتووری هۆڵەندای تازەدا، چونكە ئێمە لە تیپەكەمان تەنیا كورد یان هۆڵەندایی نیین، چەند زمان و كولتوورێكی جیاوازین، بەهەموومانەوە دەمانەوێت پرسیارێكی مرۆیی بورووژێنین نەك پرسیار و شتێكی لاوەكی.
باكۆ سۆرانی دەرچووی بەشی شانۆی پەیمانگەی هونەرە جوانەكانی سلێمانییە و یەكێك بووە لە شانۆكارە ڕژدەكان و هەمیشە لە كار و چالاكیی شانۆیی بەردەوام بووە، نێزیكەی 18ساڵە لە هۆڵەندا دەژی و بەردەوام لە كاری شانۆیی دانەبڕاوە، بەمەش هەمیشە جێگەی گرینگیی رۆژنامە و میدیاكانی هۆڵەندا بووە، لە ساڵی 1994دا یەكێك بوو لە دامەزرێنەرانی (تیپی شانۆی بێ سنوور) كە ئەم گرووپە شانۆیییە بەردەوام لە فێستیڤاڵە هونەرییە ناوەخۆیییەكانی هۆڵەندا و ئەوروپادا ئامادەبوونێكی بەردەوامیان هەیە.
