گۆران دوکانى : ئەو بەرلەهەرشت پێشمەرگەبوو، ئەو بەرلەوەى هونەرمەند بێت ئینتیماى بۆخاک وسەروەرى دایکى شەهیدو ڕوسورى خوشکى شەهید بوو، ئەوخەمى گەورەى ئازادبونى نیشتیمان بوو، ئەو بەڕاستى هونەرمەندبوو!، پێشمەرگەبوو!، مرۆڤێکى کوردپەروەرخودان هەڵوێست وخاک پەرست وسونبولێکى مەزنى کوردبوون وکوردایەتى بوو!.
ئەولەڕۆژگارێکى پڕوەهم وشەوگارێکى کابوسستان، ووشەى شیرینى پێشمەرگەو ناوی پیرۆزى شەهیدو ژووانى شەوانى کەژاڵ وچێژى بادەو بوکى ئازادى ووڵاتى فێرى کوڕوکچانى خوێنگەرمى نیشتیمان دەکرد.
ئەگەرچی زوبو بەجێمان بێڵیت وماڵئاواى یەکجاریمان لێبکەیت، هێشتا زۆرمابوو بۆئەم کۆچە ناوادەت ،چونکە سەروەرم ئێستا لەهەردەم زیاتر پێویستمان پێت بوو بۆخزمەتکردنى زیاترى ئەوهونەرە بێخاوەنەى کەهەر ڕۆژەو نەزانێک دێت بەناوى پێشکەوتن خوازیەوە کلکێکى تێوەردەدات!، بەڵێ ئەو هونەرەى کە دەناڵێنیت بەدەست ووشە سێکسیەکانى (وەیش! وەى! ئۆو! واو! ئۆف!)وە.
ئەى هونەرمەندە مەزنەکە، ئەى ئەو مامۆستایەى تامردن شانازیت پێوەدەکەم کەلەتەمەنى منداڵیمدا وشەى شیرینى پێشمەرگەو خۆشەویستى نیشتیمانت فێرکردم.
زۆرمنداڵ بووم وەک ئەو مەنتقەى ئەمڕۆ پیاوەکانى دەسەڵات پێمان دەڵێن منداڵ وساویلکە!، وەک ئەو منداڵە چەتونانەى کەئەمڕۆ درک بەخیانەتە یەک لەدواى یەکەکانى ڕابردوى سەرۆک و سەدان فەزیحەى ئەم دەسەڵاتە گەندەڵو، تۆتالیتارە دەکەن!.
بەڵێ ئازیزم زۆرباش لەیادمە وەک بەشێک لەو خیانەتانەى کەسیاسیەکانى ووڵات بەبەرچاوى من وگشت منداڵانى سەردەمى منداڵیم کردیان و تائەم ساتەش شانازى پێوەدەکەن، زۆرباش لەیادمە وەک هاوارە نامۆکانى جەستەى نیشتیمان لەوادەى شەڕى براکوژیدا، وەک سەرەتاى ئەوسەردەمەى کە لافاوى کۆچى گەنجانى وڵاتەکەم دەستیپێکردوو تائەم ساتەش هێورنەبۆتەوەو حاشادەکەن لەنیشتیمان!.
ئازیزم سوێند بەمەزنی تۆ زۆرباش لەیادمە سەرەتاى لەدایکبونى بەرهەمى (هۆکاکى پێشمەرگە)بوو، ئەوبەرهەمەى هەرلەسەرەتاوە بەکۆرپەى لەناو ئەشکەوتێکى ساردوسڕداو لەباوەشى خێزانە مەزنەکەى (تیپى مۆسیقاى شەهید کارزان)لە دایک بوو، ئەوبەرهەمەى میوانێکى خنجیلانەى گشت ماڵ و سەرتەنوربان وئێوارانى مزگەوت وهەوارو ژوانگەى کوڕوکچانى خوێنگەرمى نیشتیمان بوو، بەڵێ سەروەرم منیش وەک منداڵێکى ئەوسەردەمە بەدیار تەجیلە شڕۆڵەکەى باوکمەوە هەڵدەکوڕمام وگوێم لە(هۆکاکى پێشمەرگەکەى)تۆ دەگرت، دەیانجار بەدەم گریانەوە داوام لەباوکم دەکرد تائەو سرودەم بۆ بنوسێتەوە، بەڵام دواجارباوکم هەرداواکەى قبوڵ نەکردم منیش ناچاربووم تەنهابەگوێگرتن سرودەکەى تۆم وەک ناوى خۆم لەبەرکردو تاڕۆژێک بەئایدیا جوان وبێگەردەکەى منداڵی و بێخەبەر لەدڕندەى وفاشیزمى دەسەڵاتە شۆڤێنیەکەى ئەو سەردەمە، ڕۆژێک کارەساتێکم دروست کرد کەبەبەرچاوى سەرپەرشتیارى پەروەردەى و بەڕێوبەرو تەواوى مامۆستاو خوێندکارەنى خوێندنگاکەمەوە هەستام وبەبێ سڵەمینەوە لەوترسەى کەبەرۆکى هەموو تاکێکى ئەوسەردەمەى گرتبوو یەکبەخۆم وپڕبەگەروم هاوارم کردو کەوتمە وتنى سروودى هۆکاکى پێشمەرگەکەى تۆ!، کەئەوکات لە پۆلى یەکى سەرەتاى بووم،دواجار کارەساتێک دروستبوو مەگەرخوابزانێت چۆن پینەوپەڕۆکرا!.
ئەمەجگەلەوەى یەکێک لەکارەساتە ناخۆش وترسناکەکانى سەردەمى منداڵیمبو، وەلێ یەکەمین زەنگى خۆشەویستى نیشتیمان بوو، بۆیە سەروەرم هەرلێرەوە شانازیت پێوە دەکەم کەوەک مامۆستایەکى مەزن لەسەردەمى منداڵیمدا وسەرەتاى درک کردن بەجوانیەکانى ژیان، ئەوتەمەنەى کەمرۆڤەکان درک بەدەرەنجامەکانى هیچ شتێک ناکەن، ئەوسەردەمەى کەتەواوى نەفەسەکانى ژیان لەدەستى دەسەڵاتێکى تۆتالیتاریزم دابوو بەراورد لەگەڵ ئەم دەسەڵاتە خۆماڵیەى ئەمڕۆى خۆماندا کەهیچ جیاوازى نیەو حوکمى مرۆڤەکان لەدەستى عەقڵیەتى خێڵەکى دوو بنەماڵەدایە، ئەى سەروەرم تۆئەوکات فێرى خۆشەویستى نیشتیمانت کردم، ئەونیشتیمانەى کەتائەمڕۆش هاواردەکات بۆئازادى!، لێوان لێوە لەخیانەت!، لەیەکەمین هەناسەکانى قوتاربونیەوە هاوارى قوتاربونێکیتردەکات!، نیشتیمانێک بەهەناسەیەکى سوارەوە وجەستەیەکى ساردوسڕەوە کەچى هێشتاگەنجەکانى تف لەناوچەوانى دەکەن وبەبێنازى بەجێى دێڵن!، ئەونیشتیمانەى کە هەر ڕۆژەو سەرۆک ومۆتەکەکانى دەسەڵات هەزارانجار بەدایک ودایکیشیان بەنیشتیمان دەنرخێنن، وەلێ رۆژ لەدواى ڕۆژ نیشتیمانى دایک هەڕاج فرۆش دەکەن!!.
دواجار ئەوەى ماوەتەوە بۆ ووتن، چەندە کۆچى ناوادەى تۆى مەزن، تۆى هونەرمەند،تۆى مامۆستام، وەک هەرمرۆڤێکى هونەردۆست وئازادیخواز ئازاریدام، دووئەوەندەش بینینى ئەومرۆڤە خۆفرۆشانەى کەلەمەراسیمى پرسەو بەخاک سپاردنتا دەبینران وخۆیان نمایش دەکرد،کەڕۆژگارێک تۆى مەزن خۆت وخانەوادەکەت سەرتان لەبەرامبەر زوڵموستەمى دەسەڵاتێکى شۆڤێنی دانەنەواندو ڕێگەى شاختان هەڵبژارد، ئەوانیش بەفەخرو شانازیەوە لەسایەى دەسەڵاتى بەعسیزمدا دەیان بابەت وپەخشانیان لەڕۆژنامەو گۆڤارەکانى ئەوسەردەمەو دەیان نەشیدو تەهریلەیان لەڕێگاى رادیۆو تەلەفزیۆنى بەغداوە بەسەربەژنوباڵاى مامەسەدام ودەسەڵاتە شۆڤێنیەکەى بەعسدا دەنوسی ودەهۆنیەوە، تەنانەت بەشێکیان ئەمڕۆش هەڵگرى هەمان ڕێبازەکەى دوێنێن و لەبرى مامەسەدامەکەى دوێنێ مامەو کاکە خۆماڵیەکەى ئەمڕۆ بێبەش نەبوون لەمەرحەمەتى ئەو سیسارگانەى کەلەڕاگەیاندنەکاندا بە(شاعیرو ئەدیب و نووسەرو هونەرمەندى مەزنى گەلەکەمان)دەنرخێندرێن!.
