کاتی ماڵئاوایم بوو،کاتێکی پهست، کاتی له دایك بوونی ههسته بێزارهکان ، ديمهنی شارهکهم له ناو دڵمدا کێشا ، ئهم زانی که ژیان دیاریهکمان بۆ دێنێ که چهنده تاڵ و به ئازار بێت ئهبێت ههر قبوڵمان بیت، ئه م زانی که هیچ کات ناتوانین بڕیارهکانی ژیان ڕهت کهینهوه… خۆم بیرچوهوه ههر وهك چۆن گهڵایهك له گهردهلوولێکا نوقوومی خۆر دهبێ، لهو کاتانهشدا که ساتهکان زۆر به خێرایی ی تێ دهپهڕین و هیچ ههستوو نهستیان بهسهر خۆمهوه نهمابوو، فرمێسك له چاوما قهتیس ما!
ههستم ئهکرد که به ژانی ئهم نامۆیه ناوێرم،
پرسیارهکان وهکوو لێزمهی باران دائهبارین، لهبهر خۆمهوه ئهم ووت:
ئایه ئهم سهفهرهم دوا سهفهرمه یاخود جارێکی دی دیدهی تینووم به کۆڵانهکانی شار شاد دهبێتهوه! ؟
ئایه ههستی بیستنم به ئاوازهکانی کوچهو کۆڵانی شار دهبزوێتهوه!؟
له نیوو دووکهوانهی پرسیارهکاندا وهڵامهکان سهر لێشیواو دههاتن و دهچوون، چینگڵیان دهکرد، ههڵدهچوونوو ده ڕژانهوه بێ ئهوهی پهرداخی قهناعهت پڕ بکهنهوه،
کاتی ماڵئاوايی یه:
کاتی ده ربازبوون له ئامێزی گۆیژهو،
کاتی خلیسکاندن له کۆڵی ئهزمهڕ،
سهفهر بهرهو ژووره، بهرهو نادیار: بهرهو ووڵاتێک تێناگا له زمانی سهرچنار، سهفهره سهفهر، بهرهو ههندهران: بۆ ووڵاتێک نازانێت له واتای گردهکهی سهیوان: قهتارهی فرمێسك دهڕژێنتوو ناگهن به گڵکۆی بابه و دایه: ههزار ئاوازی بیتهۆفن ناگاته ئاوازهکهی لایه لایه که له گهرووی ئاشقی تۆوه دهردهچوون دایه.
ساڵ ساڵێکی دیکه دهخواتهوه کات ژمێری زهمهن ئاوسه له ساڵهکانی غوربهت، 16 ساڵی تهمهن جۆگهڵهی غوربهتیان پڕ کردهوه تاسهکانی ناوو دڵ زهرد ههڵگهران شهوقوو بیر کردنهوه کاڵ بوونهوه، ئێستا مرۆڤێك به ههیکهل مرۆڤ، مرۆڤێک ناوهوهی وێران وهك گوندێکی تاسهر ئێسقانی کوردستانهکهم وێران، ئاخر بۆ کوێ بگه ڕیمهوه ئیتر.!
ئهو جاده باڵابهرزهی بهنێوی سالمی شاعیر ناو بانگی ههبوو ئێوارانی شاری دهبهستهوه به تاسهو ئارهزووی کچ و کوڕانی سلێمانی، ئهوهی پڕ بوو له نهزاههت، ئێستاکه داخی گرانم، ماڵی وێرانم پڕه لێواو لێواو له بۆنی نهگریسی دۆلار، باڵهخانهی دزراوی شالیار، هاوڕیانی ئهتاتورك و خومهینیوو بهشار، بورجی دروست کراو له پارهی ههژار، کۆشکی سهردهموو حووسهینیهی عهمار، سهرتاپای جادهکانی شار خاڵین له نهمامی گوڵ و سێبهری دار، ئاخر چی شك ئهبهم من ئیتر له بیرهوهری شار، جگه له دوو گڵکۆی دایك و باوکی نازدار:
به چ دڵێکهوه ڕوو بکهمه شارێك سهرتاپای خهمبار، بهڵام ههر خۆشم ئهوێت ئهی جوانهشاری ههڵمهتوو قوربان.
