شه‌وێک پێش ڤه‌له‌نتاین

به‌ندی عه‌لی .. 2011

شه‌وێک پێش ڤه‌له‌نتاین

بۆ کچه‌ تاقانه‌که‌م

ئه‌ی هه‌ناسه‌ شپرزه‌که‌ی

سینگی قانگدراوی عومرم به‌دوکه‌ڵی

جگه‌ره‌ تاڵه‌کانی ڕۆژگار

ئه‌ی بزه‌ تاقانه‌که‌ی سه‌ر لێوی ووشکم

کچم ، ئه‌م شه‌و .. به‌ته‌نیا خه‌و

به‌گمه‌ی کۆتره‌کانی ڕازو

باڵه‌فڕێی په‌پووله‌کانی به‌هه‌شت و

به‌گوڵه‌ هه‌مه‌ڕه‌نگه‌کانی

باخه‌ هه‌ڵواسراوه‌کانی موحیبه‌ت و

به‌بریسکه‌ی چاوانی ئه‌ستێره‌کان و

به‌تنۆکی عاره‌قه‌ به‌فراویه‌کانی

لاملی مانگی ئێشکچی و

به‌تانگۆی ماسیه‌کانی ده‌ریاو

به‌تریقه‌ی په‌ریه‌کانی ئاسمانی

عیشقه‌وه .. ببینه‌

لێگه‌ڕێ له‌خه‌می ئه‌مڕۆ

لێگه‌ڕێ له‌گه‌ڵا زه‌رده‌کانی یادگاری

گه‌مه‌ له‌گه‌ڵ قه‌ره‌قۆزه‌ قۆشمه‌کانی

سێرکی سیاسه‌تا مه‌که‌و

له‌خێو و جنۆکاکانی

نه‌ریتی باویش مه‌ترسه‌

ته‌نیا بۆ خۆشه‌یستی بژی

ئاخر سبه‌ی ڤه‌لانتاینه‌ .. ڤه‌له‌نتاین