هونەرمەند (زاهیر عەبدوڵڵا) ناوێكی دیاری نێو دراما و شانۆی هەولێرە و سەردەمانێك بە كارە درامی و شانۆییەكانی توانیبووی لە هەموو كوردستان بناسرێت، بەڵام ئێستا وەكوو جاران نابینرێت و بەرهەمی كەمە، وەكوو خۆیشی لەم دیمانەی “هەولێر”ـدا ئاماژەی بۆ دەدات، ئەگەر كارێك جیدی و باش نەبێت، ئامادە نییە ڕۆڵی تێدا بگێڕێت.
* ماوەیەكی زۆرە لە كاری دراما و شانۆ دووری؟
ــ ڕاستە من ماوەیەكە لە كاری هونەریدا دوورم، هۆكارەكەیش ئەوەیە ئەگەر باسی هەولێر بكرێت ئەوا كاری جیدی بە كەمی دەكرێت، یانیش هەر بوونی نییە، بە داخەوە دەقی باش و دەرهێنەری باشمان نییە، ئەمەیش وای كردووە ئەو هونەرمەندانەی وەكو من كە خاوەن ئەزموونێكی هونەرین كەمێك بە حەزەرەوە كاری هونەری بكەین، من پێشتر كاری جوان و پۆختم كردوە، كە لە بیرەوەری زۆربەی خەڵكاندا ماون، بۆیە بەشداری لە كارێكی نزم ناكەم كە ببێتە هۆكار بۆ سڕینەوەی كارەكانی ڕابردووم، من لە هونەردا هەرگیز واز ناهێنم، چونكە تەمەنی جوانی خۆم بە هونەر بەخشی، ئێستایش ئەگەر كارێكی جوان هەبێت، ئامادەم بەشداری تێدا بكەم.
* ژمارەیەكی زۆر لە فیلمی سینەمایی دەرهاتوون، بەڵام تۆ بە كەمی بەشداریت تێدا كردووە؟
ــ دەبێ ئیمە پێش وەخت بڕیار لەسەر ئەوە بدەین كە فیلمی سینەماییان هەیە یان نا، ئێستا هەوڵدانیك هەیە، ئەو فیلمانەی كە ئیستا هەن زۆربەی بۆ فێستیڤاڵەكان دەكرێن و خەڵكی نایانبێنێت. خاڵێكی دیكەیش ئەوەیە من لەو ئەكتەرانە نیم كە بە دوای دەرهێنەردا بچم كە بەشداریم لە فیلمێكدا پێ بكات، من چاوەڕوانی ئەوە دەكەم كە دەرهێنەر خۆی بە دوامدا بنێرێت.
*ئەو قەیرانەی كە ئێستا لە بواری سینەما و شانۆ و دراما هەیە، پێت وایە گرفتی كەمی بینەرە یانیش ئۆباڵەكەی لە ئەستۆی دەرهێنەرەكانە؟
ــ بە دڵنیاییەوە گرفتەكە لە لایەن دەرهێنەرەكانەوەیە، نموونەشمان لەسەری ئەوەیە ئەگەر دەرهێنەرەكانمان بیاتوانیبوایە كارێك بكەن بە ئەندازەی كارەكانی كارە دراماییەكان توركی و عەرەبی باش بووایە، ئەوكات هەرگیز بینەری كورد سەیری كارەكانی وڵاتی دیكەی نەدەكرد، بەڵام كە بینەر دەبێنێت گۆرەپانی هونەری كوردی چۆڵە مەجبووە سەیری كاری بێگانە بكات.
* لە نێو كوردا تا چەند دەقنووس و سیناریستی چاك دەست دەكەوێت؟
ــ دەقنووسمان هەیە، بەڵام ژمارەیان لە پەنجەكانی دەست ڕەت ناكات، لە بارەی سینارێستەوە بە داخەوە نیمانە، مەرج نییە ئەگەر دەقێكی چاك هەبوو بەرهەمێكی پۆختێكی هونەری هەبێت، چونكە كاری سینەما یان دراما پێكهاتووە لە (دەق و سینارێست و دەرهێنەر و ئەكتەر) هەر یەك لەمانە گرفتی تێ كەوێت، بەرهەمێكی سەقەت دەردەچێت.
* زۆرجار دەگوترێت كە كوردستان لۆكەیشتنی جوانی لێ نییە بۆ كاری سینەما و شانۆ؟
ــ من لەگەڵ ئەو ڕایەدا نییم، پێم وایە كە سروشتی كوردستان جوانییەكە ئەوەندە دەهێنی كاری هونەری سینەمایی و درامی لێ وێنە بگیرێت، نموونەشمان لەسەر ئەوەیە چەندان دەرهێنەری كوردی بۆ دەرهێنانی فیلمەكانیان ڕوو لە كوردستان دەكەن.
* تا چەند پێویستە كە دەرهێنەر و ئەكتەری كوردی خۆیان لەگەڵ ڕۆژگاردا نوێ بكەنەوە؟
ــ تا ڕادەیەك زۆر پێویستە كە دەرهێنەرەكانمان خۆیان لەگەڵ پێشكەوتنی ڕۆژگاردا بگونجێنن، موتابعەی كارە جیهانییەكان بكەن، واتە دەرهێنەر نابێ وەكو 20 ساڵ پێش ئێستا بیر بكاتەوە، چونكە نەوەیەك پەیدابووە حەز لە نوێكاری دەكات.
* بۆچی زۆر لە كارە هونەرییەكانی ئێستا لە ڕووی كوالیتییەوە لاوازن؟
ـ بێگومان كارێك بە كوالێتی باش ئەنجام بدرێت، پارەیەكی زۆری دەوێت، لەوانەیە ئەو پارە زۆرەش لە توانای دەرهێنەری كوردا نەبێت، بۆیە ئەركی وەزارەتی ڕۆشنبیری و لایەنە پەیوەندیدارەكانە كە كەرەستەی پێشكەوتووی هونەری بخەنە بەر دەست دەرهێنەری كوردی تاوەكوو ئەوانیش لە ڕووی كوالیتییەوە كاری ئاست بەرز ئەنجام بدەن.
*باكگراوندی ڕۆشنبیری تا چەند پێویستە لە نێو ئەكتەری كوردیدا هەبێت؟
ـ شتێكی زۆر گرنگە كە هونەرمەندی كورد باكگراوەندێكی ڕۆشنبیری هونەری هەبێـت، بەردەوام بخوێنێتەوە، بەدواداچوون لەسەر شتە هونەرییەكان بكات، چونكە وەك دەزانرێت ئێستا ڕۆژنامە و گۆڤار زۆرن، ئەكتەران دەتوانن بەردەوام خەرمانەی هونەری خۆیان زیاد بكەن، بەڵام هەندێك جار دەبینرێت كە ئەم باكگراوندە ڕۆشنبیرییە لە نێو هەندێك ئەكتەری كورد نابینرێــت و پێ ناچێت كە بابەتی هونەر و ڕۆشنبیری هونەرییەكان بخوێننەوە.
*لە كاتی ئێستادا چی بكرێت بۆ هونەرمەندانی كورد؟
ــ ئەركی وەزارەتی وەزارەتی ڕۆشنبیرییە كە دەستگایەكی گەورەی هونەری دابمەزرێنێت بۆ كۆكردنەوەی ئەو هونەرمەندانەی كە خاوەن ئەزموونێكی زۆری هونەریین، بە كۆكردنەوەی ئەم هونەرمەندانە و دانی مووچەیەك پێیان، ئەوانیش دەتوانن لەمەودا كاری جیدی و چاكتر ئەنجام بدەن، چونكە ئەگەر هونەرمەندێك خەریكی بژێوی كاری خۆی بێت، بەیانیان كارێك بكات و ئێوارانیش كارێكی دیكە بكات، ناتوانێت سەرقاڵی كاری هونەر بێت، لەم كاتەیشدا ئەوەی زیانی پێ بكەوێت تەنیا هونەریی كوردییە.
*دوایین پڕۆژەی هونەرییتان چییە؟
ــ لە كاتی ئێستادا چەند دەقێكی ئامادەكراوم هەیە، بەڵام بیرم لێ نەكردۆتەوە كە بیدەمە كام دەرهێنەر، چونكە دەترسم بیدەمە دەرهێنەرێك و دەقەكانم لێ سەقەت بكات، بۆیە ئەگەر توانیم دەرهێنەرێك بدۆزمەوە دەقەكەم وەك خۆی بگەیەنێت، ئامادەم پێی بدەم.
ئاریان دەرگەڵەیی
