رۆژی 26/7/2011 كاتێك دوا تازەترین (ژمارە 73)ی رۆژنامەی رووبەرمان چاپ و بڵاوكردەوە، لە ژێر گوشارێكی زۆری ماددی بەروونكردنەوەیەك تەنها یەك هەفتە راگراتنی رووبەرمان راگەیاند، بەداخەوە قەدەر وایكرد ژمارەی دواتر و بەیانی سێ شەممەش 16/8/2011 كە ژوانی بەیەكگەیشتنی رووبەر و خوێنەرانە، نەتوانین رۆژنامەكەمان چاپ و بڵاوبكەینەوە.
راستە بەڵێنمان بە خوێنەرانمان و ئەو هاوكارە نووسەر و رۆژنامەنووسە بەرێزانە دابوو كە هەموو سێ شەممەیەك چاوەڕێی رووبەرن، كە دوای یەك هەفتە پشوو بە شێواز و ستایلێكی نوێوە بەردەوام بین، بەڵام قەیرانی ماددی رێگەی نەداین ئەو بەڵێنەمان بە جێ بگەیەنین.
لەم رونكردنەوەیەدا وێڕای داوای لێبوردن لە خوێنەران و هاوكارانمان، سەرنجتان بۆ كۆمەڵێك راستی رادەكێشین و چاوەڕوانی پشتیوان و هاوكاری هەموو لایەكین.
جێگای نیگەرانییە رۆژنامەكەمان جگە لە قەیرانی ماددی، رووبەرووی ئاستەنگیش بۆتەوەو لە خوێنەرانمانی ناشارینەوە هەڕەشەی راگرتنی یەكجاری رووبەریش هەیە، وەكو وەفا و رێزێك بۆ ئەو كەسانەی پێمانەوە ماندووبوون، لەم روونكردنەوەیەدا وردەكارییەكەی ناخەینەڕوو، هەڵیدەگرین بۆ كات و ساتی تر.
بەڵام سەرەڕای ئەوانەش هەوڵی زۆری جددی و دڵخۆشكەر هەن كە پشتیوانی لە بەردەوامی رۆژنامەكەمان دەكەن و بە هەموو شێوەیەك پشتیوانی رووبەرن و بە پاڵپشتی ئەوان چاوەڕوانی تێپەڕاندنی ئەو دۆخە قەیراناوییە دەكەین، لەئەگەری بێ ئەنجامبوونی پشتیوانی ئەو دڵسۆزانەمان، لە پێناو بەردەوامی رووبەر پەنا بۆ هاوكاری رێكخراوە بیانییەكانی تایبەت بە هاوكاری میدیاكان و قونسڵ و نوێنەرایەتی وڵاتانی ئەوروپا و ئەمریكا لە هەولێر و تەنانەت ئەو كەسایەتییە گرینگاكانەی گۆڕەپانی كوردستان كە پشتیوانی میدیای ئازاد و بوێرن، دەكەین. لەكۆی بارەكانیشدا دڵنیایی بە خوێنەرە دڵسۆزەكانی رووبەر دەدەین لەچاپ و بڵاوكردنەوەی رووبەر و رووبەری داهێنان بەردەوام دەبین.
هەڵبەتە سەرەڕای ئاستەنگەكان، بەڵام لە ئۆفیسی سەرەكی خۆمان لە شاری هەولێر، كۆی ستافی رووبەر و رووبەری داهێنان لە كاری پیشەیی رۆژنامەوانی خۆمان بەردەوامین، هەرچەندە سەرگەرمی و پەرۆشیمان بۆ دەرچوونی رۆژنامەكە لەو دووسێ هەفتەیەی رابردوو دەستی گرتبووین رووبەرنێت كاراتر بكەین. بەڵام لێرە بەدوا تكا لە خوێنەرانی رووبەر دەكەین تا تێپەڕاندنی ئەو قەیرانانەی بەرۆكی رۆژنامەكەمانیان گرتووە، لە سایتەكەمان (رووبەرنێت – www.rubernet.net یان www.rubernet.co یان www.rubernet.info ) بابەتەكانمان بخوێنەوە.
بە رێز و پێزانینی زۆرەوە…
ستافی رۆژنامەی رووبەر و رووبەری داهێنان
هەولێر – 15/8/2011
