کەیوان کەریمی لە وتووێژ لەگەڵ گۆڤاری گرینگی ڤڕایتی: فیلمەکەی من بەشوێن هیوادا دەگەڕێت

مەنسوور جیهانی ـ سینەماکاری کورد “کەیوان کەریمی” لە وتووێژ لەگەڵ گۆڤاری گرینگی سینەمایی “ڤڕایتی” Variety گوتی: فیلمەکەی من بەشوێن هیوادا دەگەڕێت و هیوایەک کە ونبووە، لەڕاستیدا فیلمەکانی من بە شوێن ئەم هیوایەدا دەگەڕێن.

“ئێد مێزا” Ed Meza لە گۆڤاری گرینگی سینەمایی “ڤڕایتی” Variety لە بابەتێکدا بە مانشێتی “بەرنامەی La Fabrique و داهاتووی سینەمای جیهان” ئاماژەی بە 10 باشترین پرۆژەی بەرچاویی دنیا لە بەشی La Fabrique du Cinema لە حەفتاوسێیەمین خولی فێستیڤاڵی نێونەتەوەیی فیلمی کانی فەڕەنسا لە ساڵی 2020 کردووە و ئەوانی بە بینەرانی جیهانی خۆی ناساندووە.

لە سەرەتای وتاری گۆڤاری گرینگی سینەمایی “ڤڕایتی”دا هاتووە: لە نێوان ئەم 10 پڕۆژەیە، دوو پڕۆژە سرنجی جیهانی بۆلای خۆیان ڕاکێشاوە؛ دەرهێنەرەکانیان لە دنیادا سینەماکارانێکی بەرچاون، کە “کەیوان کەریمی” بە نوێترین پرۆژەی سینەمایی خۆی بە ناویی “ئایا ئێوە شتێک سەبارەت بە هیوا دەزانن؟” Do you know anything about Omid? یەکێکە لەوان. دوای سازکردنی فیلمی دیکۆمێنتاری بڵندی “نووسین لەسەر شار” Writing on the City و هەروەها فیلمی سینەمایی “تەپڵ” Drum لە ساڵی 2012 و چەندین ساڵ، سازنەکردنی هیچ فیلمێک، “ئایا ئێوە شتێک سەبارەت بە هیوا دەزانن؟” نوێترین بەرهەمی ئەم سینەماکارەیە کە سەبارەت بە بنەماڵەیەکە کە دوای شۆڕشی ئێران بە شوێن منداڵەکەیاندا دەگەڕێن. ئەم پڕۆژەیە، ئێستاکە لە قۆناغی ڕاکێشانی سەرمایەدایە و کۆمپانیاکانی جیهانی فیلم، بڕیاروایە کە سەرمایەکانی خۆیان دابنێن و ئەم فیلمە بەرهەمبهێنن.

لە بەشێکی دیکەی ڕاپۆڕتی گۆڤاری “ڤڕایتی”دا نووسراوە: ئەو پرۆژانەی کە لە بەشی La Fabrique du Cinema هەڵبژێردراون، بەرهەم گەلێکن کە دەرهێنەرەکانیان لە بەهرەمەندانی چوارگۆشەی ئەم دنیایە دێنەئەژمار کە لە فێستیڤاڵی نێونەتەوەیی فیلمی کانی فەڕەنسا بۆ داهاتووی سینەما ناسێندران.

لە درێژەی ئەم وتارەدا، گۆڤاری “ڤڕایتی” لەگەڵ “کەیوان کەریمی” وتووێژی کردووە، ئەو سەبارەت بە “ئایا ئێوە شتێک سەبارەت بە هیوا دەزانن؟” ڕایگەیاند: فیلمی من بەشوێن هیوادا دەگەڕێت و هیوایەک کە ونبووە، لەڕاستیدا فیلمەکانی من بە شوێن ئەم هیوایەدا دەگەڕێن. کەواتە دەتوانن ئەو درەئەنجامە وەربگرین کە “ئایا ئێوە شتێک سەبارەت بە هیوا دەزانن؟” بە جۆرێک، سەبارەت بە مێژووی ئێران، ئومێدوارە.

کەریمی لە درێژەی قسەکانی خۆیدا گوتی: سیناریۆی ئەم فیلمەم لە سەردەمێکی تایبەت بە مێژووی ئێران نووسیوە، بە هۆی ئەوەی کە کۆبیرەوەریی هەموومان سەبارەت بە ڕابردوو و ئێستایە کە پێویستە هەموو کاتێک وەبیریبهێنینەوە و سەبارەت بەو خۆڕاگربین؛ لەبەر ئەوەی کە ئەم بیرەوەریانە لە دەست نەدەین.

لە بەشێکی دیکەی ڕاپۆڕتی گۆڤاری “ڤڕایتی” نووسراوە: ئەم 10 پڕۆژەیەی کە لە لایەن بەشی La Fabrique du Cinema و “ئەنستیتۆی فەڕەنسا” بۆ پێشکەش کردن و ناساندن لە بازاڕی ئۆنلاینی حەفتاوسێیەمین خولی فێستیڤاڵی نێونەتەوەیی فیلمی کانی فەڕەنسا هەڵبژێردران، ڕنج و مەینەتی جۆراوجۆر لە تەواوی بابەتەکان لە خۆدەگرن، لەوانە: جەنگ، نابەرابەری ڕەگەزیی، گوشاری دەرەکی، نابەرابەری نیژادی و تەنانەت سەبارەت بە سەردەمی دوای ئیستعمارن و هەر بەم هۆیەوە، ئەم 10 دەرهێنەرە هەر کامیان لە سووچێکی ئەم جیهانە وەکوو ئەفریقیا، ڕۆژهەڵاتی ناوەڕاست، ئەمەریکای باشوور، ڕۆژهەڵات و ڕۆژهەڵاتی ئەورووپا ئامادەن.

هەروەها “جیوفری مێکناب” Geoffrey Macnab لە ماڵپەڕ و گۆڤاری “ئاکادیمیای فیلمی ئەورووپا” European Film Academy سەبارەت بە “سینەمای ئێران” لەگەڵ هەندێک لە سینەماکارانی ئەم وڵاتە وتووێژی کردووە و لە سەرەتای ئەم وتارەدا سەبارەت بە “ئایا ئێوە شتێک سەبارەت بە هیوا دەزانن؟” نوێترین پرۆژەی سینەمایی “کەیوان کەریمی” نووسیوییەتی و لە درێژەدا لەگەڵ ئەم سینەماکارە سەربەخۆیە وتووێژی کردووە.

بۆ زانیاریی زیاتر:

https://variety.com/2020/film/global/la-fabrique-presents-10-world-film-projects-keywann-karimi-1234646584/?utm_medium=email&utm_source=exacttarget&utm_campaign=eshowdaily_cannes&utm_content=213091&utm_term=796885

بەڕێوەبەرایەتی ڕاگەیاندنی گشتیی پڕۆژەی سینەمایی “ئایا ئێوە شتێک سەبارەت بە هیوا دەزانن؟”.