کورتەفیلمی ئەنتێنا لە ھەولێر نمایش دەکرێ

مەسعودی مەلا ھەمزە : دوای بەدەستھێنانی چەند خەڵاتێک لە عێراق و جیھاندا، ناوەندی فیلمسازانی ھەولێری سەندیکای ھونەرمەندانی کوردستان کورتەفیلمی ئەنتێنا لە سیناریۆ و دەرھێنانی عەدنان عوسمان نمایش دەکات.

بەگوێرەی راپۆرتی راگەیاندنی لقی ھەولێری سەندیکای ھونەرمەندانی کوردستان، ناوەندی فیلمسازان لەو لقە، بۆ بایەخدان بە تواناکانی فیلمسازانی کورد و نیشاندانی بەرھەمەکانیان بە ھونەرمەندان و بینەرانی کورد، وەک دەستپێکی چالاکییەکانیان کورتەفیلمی ئەنتێنا نمایش دەکەن و دواتریش گفتوگۆیەکی کراوە لەسەر کورتە فیلمەکە رێکدەخرێ.
ھەر لەو راپۆرتە راگەیەنراوەدا ھاتووە کە بە ئامادەبوونی ستافی کورتە فیلمەکە ئەو کورتە فیلمە لە کاتژمێر ٥ی ئێوارەی رۆژی دووشەممە ٢/٥/٢٠١١ لە ھۆڵی بەڕێوەبەرایەتی شانۆی ھەولێر نمایش دەکرێ و دواتر ئامادەبووان و بەشداربووانی نمایشەکە گفتوگۆ لەبارەی فیلمەکەوە دەکەن.
لەکۆتایی راپۆرتەکەدا ھاتووە کە ناوەندی فیلمسازانی ھەولێری سەندیکای ھونەرمەندانی کوردستان بەردەوام دەبێ لە نمایشکردنی فیلم و کورتەفیلمە کوردییەکان، بە ئامانجی خزمەتکردنی فیلمسازان و نیشاندانی بەرھەمەکانیان بە ھونەرمەندان و بینەران.