یوسف خەلیل: هاوڕێ نەكەن ئەم چەمكە لە بیر بكەن چونكە من و تۆ وەفایە كۆت و بەندی خۆشەویستی یەكدیمان دەكات و دونیایەكمان بۆ دروست دەكات كە تەنها مرۆڤ پەپولە ئاسا رابەرە و گوڵی بۆنداریش بۆ هەمیشە رۆژانە دیاری دەستیەتی ، دەبا من و تۆ كێبڕكێ بكەین بۆ وەدەستهێنانی ئەو چڵە گوڵە كە لەگەڵ خۆیدا زەردەخەنەی ژیانمان پێشكەش دەكات ، ئێستاش گوێ لەم بەڕێزانە دەگرین بزانین خوێندنەوەیان بۆی چییە؟
جەزا عارف :
– سیفەتێكە لەو كردە جوانانەی كە پێویستە لە هەموو كەسێكدا هەبێت ، چونكە كەسایەتی مرۆڤ بەهێز دەكات ، ئەگەر كەسێك وەفادار بێت لەلای خەڵكی خۆشەویست دەبێت بە پێچەوانەشەوە هەمیشە بێزراوە ، وەفاداری خۆشەویستی نێوان تاكەكانی كۆمەڵگا پتەو دەكات …
پەیمان ئەحمەد :
– لەلای تاكەكانی كۆمەڵگا دوو جۆر پێناسە دەبینرێ ، یەكیان لەسەر بنەمای خوێنە كە تا ئێستا لە (90%) زیاتر وەفاداری لە نێو رەگەزی جیاواز و خێزان بەتایبەتی بەردەوامە هەرچەند زانست زۆر بە توندی خۆی خزانۆتە نێو بنەماكانی كۆمەڵایەتی كۆمەڵگای كوردی و لە دەرەوەش لەگەڵ تێكشكانی بنەماكاندا تا هەنووكە (60% و 70%) بۆ سەرەوە بەهای خۆی پاراستووە ، دووەمیان لەسەر بنەمای بەرژەوەندی یە ، كە كۆمەڵێك شت وادەكات كەسەكان لە یەكدی نزیكببنەوە كە بنەماكانی مرۆڤبوونی لەخۆ نەگرتووە ئەمەش ئاكامی بەرەو باش نەچووە و ناچێت ، نەمانی وەفا لەنێو تاكەكاندا هەڵوەشاندنەوەی هەموو بنەماكانە ، وەفا تاكە بەهایە كە لە هەموو سوچێكی جیهاندا بەردەوامی و مانەوەی زیاتر دەدات بەتاك و بەشەكانی كۆمەڵگا بۆ پێشكەوتنی وڵات لە گشت بوارێـــــكدا …
نیگا ئیسماعیل :
– زۆرجار كەكەسێك بەوەفا بێت بەسەمەرە لێی دەڕوانم! چونكە وەفاداری وشەیەكی پیرۆزە و بوونی لە خودی مرۆڤدا دوو هێندەی تر جوانتر و پیرۆزتری ئەكات ، ئەمانەش دەگەنن لەنێو ئێمەدا؟! پێویستە بەوەفابین بۆ خاك و نیشتمان و دایك و هاوڕێ و ئەو مامۆستایەی بۆ ساتێكیش بێت چەند زانیارییەكی پێبەخشیوین ، هەروەها پەیوەندی نێو كەسەكان ئەگەر وەفا نەبێت رێز و خۆشەویستی چۆن دروست ئەبێت لە نێوانیاندا ؟ بەداخەوە رەشبینم لەم كۆمەڵگەیەدا چونكە بەدەگمەن ئەوە بەدی ئەكەم تیایدا !!
بەختیار مەحمود :
– لەگەڵ پێشكەوتنی زانست و سەردەمدا وشە و مانای وەفاداری كاڵبونەوەی بەخۆوە بینیوە ، ئەگەر مرۆڤ بێبەش بوو لە دەربڕینی وەفا بەرانبەر بەو كەسەی كە چاكەی لەگەڵ كردووە ئەوا پێم وایە مرۆڤێكی نەخۆشە !! پێویستە بەرزترین ئاستی وەفا پێشكەش بكرێت بە گەورەترین مرۆڤ كە لە دایكدا خۆی نمایش دەكات …
هۆزان محەمەد :
– خودی هەر تاكێك لە كردەی وەفادا .. وەفادارە یا بێ وەفایە ! جا ئەگەر دوو تاك بەریەك كەوتن و هەردوولا بارگاوی بوون بەوەفا .. ئەوا رێز و خۆشەویستی تیایاندا باڵا ئەكات ، جا ئەو دوو تاكە هاوڕەگەز بن یاخوود دوو رەگەزی جیا ، گەر لایەكیان لەمبارەیەوە خاڵی بێت دەرئەنجامی پەیوەندییەكان بەگرفت و ناخۆشی كۆتایی دێت ! بەكورتی لە بارەی كاریگەرییە باشەكانی وەفادارییەوە دەڵێم كەسی خاوەن وەفا بوونی دەبێتە هۆی باڵابوونی رێز و خۆشەویستی و پەرەدان بە رۆحی هاوكاری و ئارامی و دڵنیایی ….. بێ وەفایش هۆكاری نانەوەی گرفت و لاوازكردنی پەیوەندییەكان و دواجار لێكترازانە ! ئەمەش كاریگەری خراپی خاوەن ئەم رۆحیەتەیە ، بەوەفا بوونیش پەیوەستە بە فراوانبوونی ئاستی رۆشنبیری تاكەكەنی كۆمەڵەوە و لێرەشەوەیە سەرچاوە دەگرێ بۆ هەموو شتەكانی دیكە …
فەیروز حسێن :
– وشەیەكی تەواو و پڕاو پڕ لە میهر و بەخشندەیی و پێزانین و لێپرسراوێتی یە ، تاكەكانی كۆمەڵ بەهەموو چین و توێژەكانەوە لە هەبوونی ئەم كردە جوانە بێبەش نین و كەم تا زۆر هەستی پێئەكەن و لە كاتی پێویستدا بەشێوەیەكی (ئیجابی یا سلبی) كاردانەوەی خۆی بۆی هەیە ، وە لە تاكێك بۆ تاكێكی تر دەگۆڕێ و هەموو هەستێكیش كاردانەوەی باش و خراپی هەیە لە ئێستای ژیانی رۆژانەماندا و بەتایبەتی لەم سەردەمەدا كاردانەوەی (سلبی) زیاتر هەیە ! ئەویش بەهۆی گۆڕانی ژینگە و بارودۆخی مرۆڤایەتی سەردەمی ئێستا و زانیاری و رۆشنبیری و بەخوودبوونی تاكەكانمان ، وە زیاتر بێمتمانەیی تاكەكانی كۆمەڵ كاریگەری هەیە و بەرەو ئاقارێكی خراپتری دەبەن ، ئەوەشمان لە یاد نەچێت لە هەموو سەردەم و سەدە و كات و شوێنێكدا ئاستێك یان پلەیەك یان رێژەیەك هەیە بە (ئیجابی) بوون بنوێنێ وە چەند هەبوونی كەمبێت بەڵام هەر دەمێنێ لەناو كۆمەڵگای مرۆڤایەتیدا ..
ئاوات كەریم :
– جوانترین كردار كە هەبێت لە مرۆڤدا وەفادارییە ، بەڵام بەداخەوە ئەمڕۆ كەمبۆتەوە .. ئەمەش دیاردەیەكی خراپە و دەبێتە هۆی نەمانی پەیوەندییە كۆمەڵایەتیەكان و لە كۆتاییدا هەرەسهێنانی كۆمەڵگاكەشی لەوانەیە لێ بكەوێتەوە ، وە بەتایبەت لە نێوان هەردوو رەگەزدا بەڕێژەیەكی بەرچاو كەمبۆتەوە ئەگەر بەراوردی بكەین بەسەردەمەكانی پێشتر ! وە بەهەمان شێوە دایك و باوك بۆ منداڵەكانیان و بە پێچەوانەشەوە ! لەهەر جۆرە كارێكدا ئەگەر وەفا نەبێت سەركەوتن نایەتە دی ! ئەگەر تاكەكانی كۆمەڵ وەفادار بن بەرانبەر بە خۆیان و خاك و وڵات و نیشتمان و گەلەكەیان ئەوا باشترین كۆمەڵگەیان دەبێت كە دەبێتە بنەمای سەركەوتن و خۆشگوزەرانی تاكەكانی كۆمەڵ ، یا دوو خۆشەویست ئەگەر وەفا هەبێت ئەوا دەتوانن بنەمای ژیان و خۆشگوزەرانی دابمەزرێنن وە بەپێچەوانەشەوە ناتوانن ژیانێكی ئاسودە دروست بكەن …
سەرنج :
– جێی خۆشحاڵییە كە زۆرینەی دەنگەكان وەفاداریی بەجوانترین و كاریگەرترین بنەماكانی كۆمەڵگە دادەنین ، بەڵام گۆڕانكاری سەردەم و هێنانەكایەی تەكنەلۆژیا بە هۆكاری لەناوچوونی ئەم هەستە دەزانن .. بەڵام ناكرێت تەكنەلۆژیا كە خۆی لە خۆیدا بۆ خزمەتی مرۆڤ هاتونەتە ئارا وەك خۆی بەكاری بهێنین ئەوجا بزانن ئاكام بەرەو كوێ دەچێت بەڵام بەداخەوە ئێمە شتەكان پێچەوانە بەكاردەهێنین و خۆمان دەكەینە قوربانی…
Discussion about this post