هونەرمەندان و هەڵبژاردن

بەهۆى نزیکبونەوەى وادەى هەڵبژاردنى پەرلەمانى کوردستانەوە بانگەشەکردن و ریکلامکردن بۆ لیستە سیاسیەکان دەستى پێکردووەو بەدڵنیایشەوە بەهۆى ئەوەى کە لەهەڵبژاردنى ئەمجارەى پەرلەمانى کوردستاندا چەندین لیست و قەوارەى سیاسى جیاواز بەشدارى هەڵبژاردنەکان دەکەن، بانگەشەکردن بۆ لیستەکان زۆر چڕوپڕتر دەبێت لەجاران و هەموو کایەکان دەگرێتەوە. ئەم لیستانە لەم هەڵبژاردنەدا هەموو فاکتەرێکى نەتەوەى و ئاینى و هونەرى بەکاردەهێنن، بۆئەوەى کە زۆرترین دەنگ بۆخۆیان کۆبکەنەوە. بەڵام ئەوەى کە لێرەدا گرنگە ئەوەیە کە ئەو هونەرمەندانەى خۆیان بە هونەرمەندى جدى دەزانن، تێکەڵى ئەم کایەیە نەبن و هونەر و گۆرانیەکانیان نەخەنە بەرژەوەندى لست و قەوارەیەکى دیاریکراوەوە، چونکە بەم کارە قورسایى هونەرى خۆیان لەدەستدەدەن و دەبنە داردەستێک بەدەست ئەو لیست و قەوارە جیاوازانەوە کە بۆ بانگەشەکردن بۆخۆیان هەموو شتێک بەکار دەهێنن و بەپێى ئەزمونەکانى رابردوى هەڵبژاردنیش باز بەسەر هەموو کارە ئەخلاقیەکانیشدا دەدا.

بۆیە پێویستە لەسەر هونەرمەندە جدیەکانى کوردستان کە بەو پارە زۆرەو زەوى دابەشکردن و کۆنسێرتگێرانە حیزبیانە رازى نەبن و مێژووى هونەرى و قورسایى جەماوەرى خۆیان لەبەر خاترى سیاسەت نەفەوتێنن، بەتایبەتى لەکاتێکدا کە هەتا ئێستا بارودۆخى هەڵبژاردن لەکوردستاندا نەگەیشتۆتە ئاستێک کە دەنگ بە پرۆگرام و بەرنامەى لیستەکان بدرێت، بەڵکو ئەو دەنگانە بۆ حزب و کیانێکى سیاسى دیاریکراوە کە بەبآ ئەوەى هیچ پرۆژەیەکى جدى هەبێت بەشدارى لە هەڵبژاردندا دەکات و بە بەکارهێنانى سومبولە نەتەوەى و ئاینى و هونەریەکان هەوڵى کۆکردنەوەى دەنگەکانى دەدات.

راستە کە لەکوردستاندا ئەو کەسانەى هونەرەکەیان لەپێناو حزب و کەس و لایەنێکى دیاریکراودا بەکاردەهێنن ژیانێکى خۆش و پێداویستیەکى هونەرى زۆر و هۆڵى حازر و گەڕان بەوڵاتاندا و ئەنجامدانى کۆنسێرت لە هەرشوێنێک کە بیانەوێت و رابواردنیان بۆ فەراهەم بووە، ئەوەش راستە کە هونەرمەندانى جدى تەنانەت هۆڵى گەورەشیان پێنادرێت بۆئەوەى ئەو کۆنسێرتەى تێدا ئەنجام بدەن کە بەهەوڵ و ماندوبوونى خۆیان سازى دەکەن، بەڵام دەبێت ئەوەش بزانن کە تەنها ئەم هەڵوێستەیان بۆ مێژوو دەمێنێتەوەو لەجیاتى هونەرمەندى حزب و لایەنێک دەبنە هونەرمەندى نەتەوەیەک.

دیارە لەم بابەتەدا مەبەست لەوە نییە کە نابێت هونەرمەند هەڵگرى ئایدۆلیۆژیا و بیرێکى دیاریکراوبێت، چونکە ئەویش وەکوو هەر مرۆڤێکى سادە مافى ئەوەى هەیە کە ئینتماى سیاسى هەبێت، بەڵام پێویستە هونەرەکەى نەخاتە خزمەتى ئەو حزب و لایەنەوە کە ئینتماى بۆهەیە. دیارە ئەمەش لەکاتێکدایە کە هونەرمەند بیەوێت ببێتە هونەرمەندێکى نەمر و لەبیرنەکراو، چونکە ئەو هونەرمەندانەى بەشان و باڵاى حزبدا هەڵدەدەن، جگە لەوەى جەماوەرەکەیان لە سنورى حزبەکەى خۆیان تێناپەڕێت، لەگەلڕ ئاوابونى خۆرى حزبەکەشیاندا خۆرى هونەرى ئەوانیش ئاوادەبێت. من لێرەدا هیوادارم کە کیانە سیاسیەکانیش بەهۆى هەڵبژاردنەوە ژیانى هونەرى و کۆمەڵایەتیمان تێکنەدەن و سیاسەت لە ژیانى تایبەتیمان دور بخەنەوە، بەهۆى بانگەشەکردنیش بۆ لیست و کیانى خۆیان، ئاواز و نۆتەى هونەرى لە خەڵکى نەتۆرێنن.

دەبێت بەدەر لە هونەرمەندانیش هاوڵاتیانى ئاسایش ئاگادارى ئەوەبن کە ئەم هەڵبژاردنە ژیانى کۆمەڵایەتیان تێکنەدات و سیاسەت تێکەلڕ بە ژیانى تایبەتى خۆیان نەکەن، بەتایبەتى لە هەڵبژاردنى ئەمجارەدا کە دەنگوو ڕەنێگى جیاوازتر هەیەو ململانێکان زۆر قورسترن، زۆریش بوون ئەو ژن و مێردانەى کە بەهۆى بیروبۆچونى جیاوازیانەوە لە سەر دەنگدان لێک جیابوونەوە، کەم نەبوون ئەو خوشک و برایانەى کە پەیوەندیە کۆمەڵایەتیەکانیان بەهۆى هەڵبژاردنەوە لێک دابڕا. زۆر گرنگە هەست بەوەبکەین کە خودى هەڵبژاردن لەخزمەت ئێمەى مرۆڤدایەو هچ پێویستناکات هونەر و پەیوەندیە کۆمەڵایەتیەکانمانى بۆ تێکبدەین.