هاتن بۆ هه‌مووان نییه‌

تۆ بۆت هه‌یه‌ بێیت

مناڵانی کۆڵان بۆیان هه‌یه‌ بێن

موسافیره‌ غه‌مگینه‌کان

عاشقانی پێکراو

پۆسته‌چییه نیگه‌رانه‌کان‌ و

پیره‌مێرده‌ ده‌سفرۆشه‌ زویره‌کان بۆیان هه‌یه

بێن

هاتن بۆ هه‌مووان نییه‌

به‌ڵام تۆ بۆت هه‌یه‌ بێیت و

تار‌ژه‌ن و غه‌مژه‌ن و ده‌فژه‌نه‌کان

باغه‌وانانی ته‌نیای باخه‌ دووره‌کان‌

په‌ڕه‌سێلکه‌ ته‌ڕه‌کان

کۆتر و په‌پووله‌ و شه‌مشه‌مه‌ وردبینه‌کان

له‌قله‌قه‌ حه‌کیم و زیکزیکه‌ قسه‌ زله‌کان

هه‌ر هه‌موو هه‌ژدیها و فیل و نه‌هه‌نگ و تیمساحه‌کان

هه‌ر هه‌موو مێرووله‌ و هه‌نگ و کرم و

خاڵخاڵۆکه‌کان بۆیان هه‌یه‌

بێن

هاتن بۆ هه‌مووان نییه‌

به‌ڵام تۆ بۆت هه‌یه‌ بێیت

به‌یانییه‌ک زوو ده‌چم بۆ سه‌فه‌ر

به‌ جانتایه‌که‌وه‌

له‌ چایخانه‌که‌ی گه‌راج راده‌وه‌ستم و

چاوه‌ڕێ ده‌که‌م هه‌ر هه‌موو بێن