نه‌ورۆز

2008

به‌ندی عه‌لی

هێنده‌م به‌سه‌ ، له‌نه‌ورۆزا

خه‌و به‌گوڵه‌

ڕه‌نگاوڕه‌نگه‌کانی عیشق و

به‌هه‌ره‌سی

شاخه‌ به‌فر پۆشه‌کانی

خه‌می ده‌هره‌وه‌ ببینم

هێنده‌م به‌سه‌ ، له‌و ڕۆژه‌دا

پریشکێکی نوێی به‌رکه‌وێ

خه‌ڵوزه‌ دامرکاوه‌که‌ی

هیوا ، به‌وه‌شتی ئه‌سرینم

هێنده‌م به‌سه‌ ، له‌نه‌ورۆزا

سروشتی مه‌نگ

بێته‌وه‌ ده‌نگ

به‌هاژه‌ی چه‌م و ڕووباری

هێنده‌م به‌سه‌ ، له‌و ڕۆژه‌دا

کورته‌ چیرۆکێکی مێژوو

گه‌ر ئه‌فسانه‌و خه‌یاڵیش بێ

ببێته‌ سه‌ردێڕی شیعرێ

بۆ سرودی به‌ره‌نگاری