دەشنێ لەوە زیاتر مەمانڕەنجێنە

نووسینی: زانا دزەیی

دوای ٣ ساڵ دابڕان لە گۆرانیگوتن، دەشنێ بە گۆرانییەک خۆی لە میدیاکان دەرخستەوە کە بە بڕوای ئەو گۆرانییەکەی نزیکە لە روح، بۆیەشە ناوی ناوە “ئازاد”، من واز لەوە دێنم دوورکەوتنەوەی ٣ ساڵ پاشان دەستپێکردنەوە کارێکی ئاسان نابێ بۆ دەشنێ بۆئەوەی جارێکی دی لەسەرپێ بوەستێتەوە، چونکە بەڕاستی ئەو کەوتووە، ئەوە جێدێڵم بۆ خۆی، چونکە ئەو لەمن باشتر دەزانێ پارە گەورەکانی جارانی لێ بڕاوە، بۆمنیش ئەوە گرنگە باسێکی کورت لەم گۆرانییە بکەم کە لەم ھەفتەیەدا بە کلیپێکی ئێمەنەیشن بڵاوی کردەوە.
دەبێ دەشنێ ئەوە باش بزانێ ئەگەر پێشتر تاقانە بوو ھەموو کارێکی لێ وەردەگیرا و لە مەیدانەکە ساغی دەکردەوە، بەڵام ئێستا زیاتر لەیەک رکابەری ھەیە، بۆیە پێویستە دەست بۆ کاری لاواز نەبا ئەگەر بیەوێت ببێتەوە یەکێک لە دیارەکان.
بەھەرحاڵ گۆرانی “ئازاد”. ھەم لەرووی تێکستەوە ھەمیش لەرووی میلۆدییەوە ھێندە نزیکە لەگۆرانییەکی ئامۆژگاریکاری منداڵان ھێندە نزیک نییە لەگۆرانییەکی ئاسایی کە ھونەرمەندێک بۆ گەورەکانی گووتبێ. سەرەڕای ئەوەی کارێکی زۆر وردی بۆ دەنگی کراوە کە ئەوەش گەورەترین کێشەی دەشنێیە. چونکە دەنگی دەشنێ ناتوانێ بە ئاسانی دەرقەتی ھەموو جۆرە میلیۆدییەک بێت. بۆیە من لەسەرەتای دەرکەوتنی دەشنێ ئامۆژگاریم بۆی ئەوە کە دەست بۆ گۆرانی ئیقاع ببات و گرنگیەگی زۆر بە موزیک و دانس و کلیپ بدا، لەوێوە بتوانی

ھونەرێکی بەھێزترمان نیشان بدا کە پێی دەگوترێت ھونەری “ئیستعراجی”. واتا ھونەری نمایش و ھونەری چاو، ئەمەش لەھەموو دنیا ھونەرێکی گرنگ و کاریگەرە ئاسایە دەشنێ لەم جۆرە ھونەرەدا تواناکانی تاقی بکاتەوە و لەو بڕوایەدام سەرکەوتوو دەبێ.

بەڵام ئەم جۆرە ھونەرەی کە دەشنێ پێشکەشی ئێمەی دەکات زۆر زەحمەتە لێ وەربگیردرێت و بەردەوامبوون لەسەری بەئاوابوونی خۆی کۆتایی دێت، وەکو چۆن لە حەوت ساڵی کارکردنی لەبواری گۆرانیگوتن نەیتوانی بەجۆرێک خۆی دروست بکات ئەگەر ھونەرمەندی تریش بێنە ناو مەیدان بەڵام دەشنێ ھەر ھەبێ و رێگە نەدا کەس تۆپەکەی لێ بسەنێت. وەکو چۆن ھێلی لەڤ زۆر بە ئاسانی تەنیا بەیەک گۆرانی مەیدانی بە دەشنێ چۆڵ کرد، دوای سێ ساڵ دوورکەوتنەوە دەبوو بەکارێکی زۆر بەھێزتر خۆی نیشانی ئێمەمان و رکابەرەکانی بدایە نەک ئەم کارەی بە کە بەراستی بە یەکێک لەکارە ھەرە خراپەکانی دەشنێ دەبینم.
ھیچکات ئەوەندەی ئێستا دەشنێ پێویستی بە راوێژکار نییە، بۆیە زۆر گرنگە پێش ھەر کارێک راوێژ بەکەسانی شارەزا لەھەر سێ بواری موزیک و دیزاینەر و کلیپسازدا بکات، واز لە دژایەتیکردن بێنێ و بە جۆرێک کار بکا رق و کینەی کەسی تری لەدڵ نەمێنێ، چونکە ئەگەر رۆژێک لەرۆژان بە حوکمی ئەوەی نزیک بوومە لە دەشنێ دەبێ ئەوەش بزانم کە ئەو کەسێکە بە رق ئیش دەکا و وا تێگەیشتووە ھەر کچە کوردێک بە ئینگلیزی گۆرانی بڵێت و ھەوڵی ناوبانگی جیھانی بدا ئەوە دژە دەشنێیە و ئەوەشی گۆرانی بە کوردی بڵێت و ھەوڵی ناوبانگی جیھانی نەدا ئەوە خۆشەویستی دەشنێیە!! بەڵام من ھەموو کات ھەوڵمداوە دیوە راستەقینەکەی نیشان بدەم، نەخێر ھەر ھونەرمەندێک رەنگ و ھونەرێکی جیاواز پێشکەش دەکات و بەلای بینەریش چێژێکی جیاواز دێتە بەرگوێی، خۆ بای ئەوەشم ھێشتۆتەوە کە خوا ئافرەتی بەجۆرێک دروستکردووە لەگەڵ سروشتی خۆی غیرەی ھەیە، ئەگەر ئەم ئافرەتە فریشتەش بێت کە پێی دەگوترێت “غیرەی ئافرەتانە”. دەکرێ ھەموو ئافرەتە ھونەرمەندەکانمان بەدەر نەبن لەم غیرە، بەڵام نەبێتە ھۆی دژایەتی وەکو دەشنێ و ھێلی لەڤ دەستیان پێکردووە.
ھیوادارم چیتر دەشنێ بە ئەم بەرھەم لاوازانە نەمانڕەنجێنێ و دەنا دڵنیام ئەگەر رق و کینە فڕێ بدا تواناکانی دەشنێ زۆر لەوە زیاترە کە لەم بەرھەمەدا نیشانی داوین.