دوو شیعر لەگۆرانیەکانی ھونەرمەندی شۆڕشگێڕ ئەحمەد کایا

دەستم لێ مەدە! دەسوتێی!

لەفارسیەوە/ ئازاد نجم

منداڵیم ، بە کارکردن لەنێو کێڵگەکاندا بەسەر برد.
گەنجیشم ، لە نێو ڕێپێوان و کۆڕ و کۆبونەوە قەدەغە کراوەکان.
زۆر زو کەوتمە زیندانەوە.
زۆر زو تامی ئازاری قامچیم چێشت.
لە نێو ژورە تەسک و تاریکەکان گینگڵمدا.

ئێستاش دەمەوێ بە نێو دەشتێکی بێ سنوردا ڕاکەم ،
بێ ژماردنی ھەنگاوەکانم ،
بێ ئاوڕدانەوە لەدواوەی خۆم.
بێ ترس و بێ نیگەرانی ، ڕاکەم چەشنی ئەسپێکی کێوی.

ھیچ لە عیشق نازانم ئازیز!
نیگەرانی من مەبە ، خۆم ڕێگای خۆم دەدۆزمەوە.
لەو دەشتەدا بەپێی پەتی و بەوپەڕی تواناوە ،
موەکانی قژم لەچنگی بادا و چاویشم لەکێوەکانە.
دەمەوێ ڕزگارم بێت لەو کۆتەی مەرگ خستویەتیە گەردنم.
دڵم بریندارە.
دەمەوێ ڕاکەم – عیشقی من – دەمەوێ ڕاکەم …
ئەگەر نەگەڕامەوە ، لێم ببورە.

مامۆستای ڕاکردنم.
پۆستەری دۆزینەوەم ، بە ھەمو دیوارەکانەوەیە،
منداڵێک دەتوانێ بمناسێتەوە.

دەستم لێ مەدە! پڕیشکت بەردەکەوێ!
دەستم لێ مەدە! ئالودە دەبی!
شێت مەبە! دەستم لێ بدەی ،
کاتێ دەزانی لەناو ئاگری.

دەمەوێ تێپەڕم بە تەنیشت دوکەڵ و درۆکاندا.
دەمەوێ تێپەڕم بە ناوجەرگەی تاریکی و برینەکاندا.
لە نەبینینی جوانی ، لە بێ پارەیی ، لە بێ خودا مانەوە …
نامەوێ لەگەڵ کەسدا ململانێ بکەم.

ئەوەندە ڕادەکەم تا جگەرم دەبێتە ئاو.
وەک ئەو کەسانەی بەتەنیا عەرەق دەخۆنەوە و
بە تەنیا مەست دەبن.
وەک ئەو کەسانەی بە بیستنی دەنگی گوللەیەک
جێگاکانیان تەڕ دەکەن.
وەک ئەو کەسانەی دوای لە سێدارە درانی شۆڕشگێڕێک ،
لاپەڕەی ڕۆژنامەکان بەپرسە و سەرەخۆشی ڕەش دەکەنەوە.
بێ شەڕ ،
بێ زیندانی کردن ،
بێ ھاتوھاوار …
دەمەوێ ئەوەندە ڕاکەم ، تا دەمرم.

دەمەوێ بۆ دوایین جار دەستت بگرم!
نامەوێ بگریت!
چاوەکانم بەڕقن لەگەڵتا ،
سازەکەشم لەگەڵ گۆرانیەکانتا.
کاتژمێرەکەم لەسەر جیابونەوە ڕێک کردوە و
ئامادەم!
خەونەکانم ھەڵدەگرم و دەڕۆم.
درۆ کردن نیشانەی بێ تواناییە.
دەمەوێ خۆم بگەیەنمەوە گوللەکان
دەمەوێ بمرم خۆشەویستم!
ئەگەر لە ژیاندا مامەوە ،
لێم ببورە!

مامۆستای ڕاکردنم
پۆستەری دۆزینەوەم ، بە ھەمو دیوارەکانەوەیە،
منداڵێک دەتوانێ بمناسێتەوە.

دەستم لێ مەدە! پڕیشکت بەردەکەوێ!
دەستم لێ مەدە! ئالودە دەبی!
شێت مەبە! دەستم لێ بدەی ،
کاتێ دەزانی لەناو ئاگری.

دەگەرێمەوە

ڕۆیشتنم یەکجاری نیە ،
چونکە تینوێتی بۆنی گوڵە بەھاریەکانم لە گەڵدایە.
پێیان بڵێ پرسەم بۆدانەنێن ،
من نەمردوم ،
وەناشمرم.

جێگا گەرمەکەم ھەڵمەگرنەوە ،
لە ژێر بەفرەوە چرۆ دەکەم و دێمەوە.
لە بڵێسەی ئاگری خەونەکانی ئێوە لەدایک دەبم.
چەشنی گەردەلولێک بەڕێدا دێم.

چایەکەم با سارد نەبێتەوە ،
چاوەڕێم بن ،
وەک چۆن نێو چاوەکانی من جێتان بو ،
بەو چەشنەش  دەخزێمە نێو جێگاکەم ،
جێگام لەنێو باوەشی خۆتاندا بۆبکەنەوە ،
چەشنی منداڵێکی گریاو دەگەڕێمەوە.

سەرچاوە / دیوارھا سخن نمیگویند/ ترجمە/ یغما گلرویی _ ایدین اقاخانی/ نشر نگا١٣٨٦