دوا نامه‌

ئیتر نامه‌م بۆ مه‌نێره‌

به‌نیاز نیم بیخوێنمه‌وه

تۆ که‌ له‌ رۆحمدا نه‌مای

حه‌ز ئه‌که‌م بۆت بنێرمه‌وه؛

*

هه‌ر په‌یامێ تۆ بینێری

به‌ر له‌ بینین ده‌یناسمه‌وه‌

نامه‌وێ هیچم پێ بڵێی

چونکه‌ وه‌ڵام نا‌ده‌مه‌وه؛‌

**

ته‌مه‌نێ چاوه‌ڕێم کردی

ئاوڕت لێ نه‌دامه‌وه‌‌

چۆن بتوانم جارێکی تر

دڵم به‌ تۆ بده‌مه‌وه‌

***

وه‌کو جاران ڕه‌نگی جوانی

له‌ سیماتا به‌دی ناکرێ

ته‌نیا شیعرم وه‌ک خۆی ماوه‌‌‌

نامه‌وێ خه‌م یه‌خه‌ی بگرێ؛

****

ئه‌و سه‌رده‌مه‌ خۆشم ویستی

که‌ خه‌می سامانت نه‌بوو

سه‌روه‌تی من دێڕێ شیعره‌‌

له‌ جاران لام پیرۆز تر بوو؛

*****

که‌ ئه‌تزانی من هه‌ژارم

بۆ دڵی خۆت دایه‌ ده‌ستم

تۆ له‌‌ کۆشک و ته‌لاردای

منیش له‌ مه‌یخانه‌ مه‌ستم؛.

گه‌شبیر ئه‌حمه‌د

gashbir@hotmail.com

به‌ کاتی شکانی ئاوێنه‌یه‌ک

کۆتای پاییزی 2006