دوای ئەوەی ماوەیەک کاتی بڵاو کردنەوەی سیدیەکەی دواکەوت لەچەند رۆژی داهاتوودا ئەلبومی (وەفایی) هونەرمەند (عەدنان کەریم) بڵاو دەکرێتەوە

دوایین ئەلبومی گۆرانی هونەرمەند (عەدنان کەریم) بەناوی (وەفایی)ـە، ئەو سیدیە تازەیەی پێکهاتووە لە (8) تراکی گۆرانی کاری موزیکی ئەو بەرهەمەی لەلایەن گروپی موزیکی (کامگاران) ئەنجامداوە، لەچەند رۆژی داهاتوودا لە رێگەی ناوەندی بڵاوکراوەی هونەری “ئارۆ” بڵاو دەکرێتەوە.  (سیروان محمەد) بەر پرسی ناوەندی بڵاوکراوەی هونەری “ئارۆ” لەشاری سلێمانی لێدوانێکی دا بەهەفتانەمەی “هونەری هەولێر”ـی راگەیاند : “ئەو بەرهەمە تازەیەی هونەرمەند (عەدنان کەریم) بەپێ بۆندێک لە نێوان ناوەندەکەی ئێمە و هونەرمەند، کاری چاپ و بڵاوکردنەوەی ئەلبومەکە دەکەوێتە ئەستۆی ئێمە، لەلایەن خۆمانەوە هەوڵێکی زۆرمان داوە، ئەو سیدیە تازەیەی (عەدنان کەریم) بەباشترین شێوە لەسەرجەم شارەکانی کوردستان بڵاو بکرێتەوە”.

دەربارەی هۆکاری دواکەوتنی بڵاوکردنەوەی ئەلبومە تازەکەی هونەرمەند (عەدنان کەریم)، کە وابڕیار بوو، ماوەیەک بەر لە ئێستا بڵاو بکرێتەوە، بەرپرسی ناوەندی “ئارۆ” لەمبارەیەوە روونی کردەوە و گوتی : “راستە ئەو بەرهەمە دەبوایە لەکاتێکی زووتر بڵاو بکرێتەوە، بەڵام هەندێک بارودۆخ هەیە دێتە پێشەوە زۆرجار نازانی لەناکاو دەبێتە گرفت، بۆ نموونە  کاری چاپ کردنی بەرهەمەکانی ناوەندەکەی ئێمە هەمووی لە وڵاتی تورکیا ئەنجام دەدرێت، هەندێک رێو شوێن هەیە پێوستە پابەند بی لەگەڵ سیستەمی ئەو وڵاتە ئەگەرنا تووشی گرفت و دواکەوتنی بڵاوکردنەوەی بەرهەمەکە دەبینەوە، جگە لەوانەش پێش مانگ و نیوێک خەڵکی کوردستان، وەک زۆرینەی خەڵکی جیهان هەمووی خەریکی سەیرکردنی یارییەکانی مۆندیال بوو، لەو کاتەدا بڵاو کردنەوەی بەرهەمی گۆرانی باش نەبوو، سەراڕی هەموو ئەوانەش بابەتی کۆپی کردنی بەرهەمەکە لەناو بازاڕەکاندا، کە بەداخەوە تەنها ئێمە و خودی هونەرمەندەکان تووشی زەرەر دەکات، ئەوەیان گرفتێکی یەکجار گەورەیە، زۆر بەداخەوە لەم وڵاتەی ئێمەدا یاسا بۆ هەموو شتێک هەیە تەنها بۆ مافی بەرهەمی هونەری هونەرمەندان نیە، کە چەندیین ساڵە هونەرمەندانی کورد و کۆمپانیاکانی چاپ و بڵاوکردنەوەی سیدی لەکوردستان ئەو باجە دەدەن، ئیتر نازانین پەنا بۆ کێ بەرین تاوەکو رێگە لەم بێسەرو بەریە بگرین، بروابکەن چەندیین بەرهەمی هونەرمەندان هەیە لە ئێستادا ئامادەیە لە ترسی کۆپی کردن ناوێرین بڵاوی بکەینەوە!!”.
(سیروان) لە کۆتایی دا گوتی : “ئەلبومە تازەکەی (عەدنان کەریم) لە چەند رۆژی داهاتوودا بە شێوەیەکی فراوان لەسەرجەم شارەکانی کوردستان بڵاو دەکرێتەوە، لەدوای بڵاو کردنەوەی ئەلبومە تازەکەی وابڕیارە لە چەند مانگی داهاتوودا هاوڕێ لەگەڵ گروپی موزیکی (کامگاران) زنجیرە کۆنسێرتێک لەشارەکانی هەولێر و سلێمانی سازبکات”.
ئەلبومی (وەفایی) (عەدنان کەریم) بریتیە لەم گۆرانیانە :..
یەکەم گۆرانی ئەو ئەلبومە بەناوی (ریشەی دڵ)ـە، هۆنراوەی شاعیر (وەفایی)ـە، ئاوازی هونەرمەند (عەدنان کەریم) خۆی دایناوە، دابەشکردنی موزیک (ئەردەشێر کامگار)ـە.
دووەم گۆرانی بەناوی (خەندەی گوڵ)ـە، هۆنراوەی ئەو گۆرانییەش شاعیر (وەفایی)ـە، ئاوازی هونەرمەند خۆی دایناوە، دابەشکردنی موزیک هونەرمەند (هۆشەنگ کامگار)ـە
سێیەم گۆرانی بەناوی (هیجری تۆ)ـیە، هۆنراوەی هەریەک لە شاعیران (ئەحمەد موختار بەگی جاف و ناری)ـە، ئاوازی هونەرمەند (عەدنان کەریم و هۆشەنگ کامگار)ـە، دابەشکردنی موزیک (هۆشەنگ کامکار)ـە.
چوارەم گۆرانی بەناوی (لەرزانێ)ـە، هۆنراوەی هەریەک لەشاعیران (مەولەوی و وەلی دێوانە)ـیە، ئاوازی (فۆلکۆر)ـە، دابەشکردنی موزیک (ئەردەوان کامگار)ـە.
پێنجەم گۆرانی بەناوی (ناڵەی بولبل)ـە، هۆنراوەی (وەفایی)ـە، ئاوازی هونەرمەند خۆی دایناوە، دابەشکردنی موزیک (هۆشەنگ کامگار)ـە.
شەشەم گۆرانی بەناوی (ئەم دڵەم)ـە، هۆنراوەی (ئەحمەد موختار بەگی جاف)ـە، ئاوازی (عەدنان کەریم) دایناوە، دابەشکردنی موزیک (ئەردەوان کامگار)ـە.
حەوتەم گۆرانی بەناوی (یادی جاران)ـە، هۆنراوەی (مەولەوی)ـە، ئاوازی هونەرمەند خۆی دایناوە، دابەشکردنی موزیک (ئەرسەلان کامگار)ـە.
هەشتەم گۆرانی بەناوی (نەشئەی بادە) ئاوازی هونەرمەند (عەدنان کەریم) خۆیەتی، دابەشکردنی موزیک (ئەرسەلان کامگار)ـە.
کاری تۆمارکردنی دەنگی ئەو ئەلبومە تازەیەی لە ستۆدیۆکانی (سیاە و رەها) ئەنجامداوە، هەروەها کاری ئەندازیاری دەنگ لەلایەن (سیاوەش کامگار) جێ بەجیگراوە، لەلایەن (ئومێد نیگبین) کاری (ماسترینگ)ـی گۆرانییەکانی ئەنجامداوە.
عەبدولغەفار عەبدوڵڵا