حیزب

به‌ندی عه‌لی

2010

به‌گشت په‌نجه‌یه‌کدا ده‌چێ و

هه‌موو جۆره‌ نقێمێکیشی بۆ ده‌بێ

ئه‌شێ بۆ گشت بۆنه‌یه‌کیش

ئه‌گه‌ر له‌خۆیانی بکڕی

ئه‌ڵقه‌ی حیزب

بۆ قژی چه‌ورو ووشک ده‌بێ

چاره‌سه‌ره‌ بۆ کڕێش و ڕشک و ئه‌سپێ

جوانترین ڕه‌ونه‌قیش ئه‌دا به‌ئه‌گریجه‌

ئه‌گه‌ر خۆیان بۆت بنووسن

شامپۆی حیزب

له‌هه‌موو گوێیه‌کی ده‌که‌ن گوێڕایه‌ڵ بێ

ئه‌گه‌ر نا مۆڵه‌تی جوانیی پێنابه‌خشن

له‌پێشبڕکێی جوانترین گوێی جیهانیدا

گواره‌ی حیزب

له‌گشت گۆشه‌یه‌که‌وه‌ خۆتی تیاده‌بینی

ڕاست و چه‌پیش وه‌ک خۆیه‌تی و

چۆنت بوێ سیماشت وا نیشان ئه‌دا

ئه‌گه‌ر  له‌به‌رهه‌یوانه‌که‌ی خۆیانه‌وه‌

سه‌یری بکه‌ی

ئاوێنه‌که‌ی ماڵی حیزب

نه‌ک له‌زم زم

له‌بارانی فرمێسکی خواش پیرۆزتره‌و

ده‌چین چڵکی له‌ش ده‌شۆرێ

ئه‌گه‌ر پاش سه‌ده‌یه‌ک گوناه

به‌مه‌رامی تۆببه‌ خوتی پێ بشۆری

ئاوی حه‌مامۆکی حیزب

کاڵایه‌که‌و به‌هه‌موو باڵایه‌ک ده‌بێ

له‌زستانا ، گه‌رم هێنده‌ی فه‌رووی وورچ و

له‌هاوینا ، فێنک وه‌ک توێی ئاوی کانی

ئه‌گه‌رچی مۆدێلی زۆره‌

وه‌لێ هه‌ر یه‌ک ڕه‌نگی هه‌یه‌و

له‌به‌ریکه‌یت ده‌بیت به‌پادشای جوانی

ئه‌گه‌ر لای خۆیانی بدروی

کراسی حیزب

وه‌ک مه‌لێکی ئه‌فسوناوی

به‌ره‌و ئاسمانی ڕه‌هایی ده‌تفڕێنێ

گه‌ر باڵیشت پێوه‌ نه‌بێ

له‌وێشه‌وه‌ هه‌موو دونیا به‌جۆرێکی تر ده‌بینی

هه‌ر وه‌ک ئه‌وه‌ی خۆت ده‌ته‌وێ

گه‌ر به‌کره‌که‌ی به‌ده‌ستی خۆیانه‌وه‌ بێ

کۆلاره‌ی خه‌یاڵی حیزب

هه‌موو ده‌رگاکانی ژیان ده‌کاته‌وه‌

ده‌رگای خه‌زنه‌کانی زێڕو

عه‌مباره‌کانی گه‌نم و

کۆشکه‌ سه‌رسوڕمێنه‌ره‌کانی قه‌راخ شارو

گوڵستانه‌ قه‌ده‌غه‌کانی شوهره‌ت و

ده‌رگا ئه‌فسوناویه‌که‌ی به‌ختیش

ئه‌گه‌ر ئه‌و ده‌ستانه‌ بسڕیت هه‌ڵیده‌گرن

کلیلی حیزب