(جەلیل زەنگە) : ” لە 75% ئەو ئەكتەرانەی بەشداریی بەشی یەكەم و دووەمیان كرد لەبەشی سێهەمدا رۆڵیان نامینێت !!

زنجیرە درامای (گەردەلول) یەكێك بوو لەو بەرهەمە درامییە تەلفزیۆنیەی كە لە ساڵی (2005) بەشی یەكەمی هاتە بەرهەم و بەشی دووەمیشی لە ساڵی (2008) بەرهەم هات و لە شاشەی كوردسات نمایشكرا، ئ ەو زنجیرە درامایە لە نووسین و دەرهێنانی هونەرمەند (جەلیل زەنگەنە) بوو. ماوەیەك بەر لە ئێستا دەرهێنەری درامای گەردەلول ئەوەی راگەیاند، كە  بەنیازە بەشی سێهەمی زنجیرە دراماكەی بهێنێتەوە بەرهەم، بەڵام ئەوەی تێبینی دەكرێ تا ئێستا دەست نەكراوە بە وێنەگرتنی بەشی سێهەمی، چونكە ماوەی دوو ساڵ زیاتر بەسەر بەشی دووەمدا تێپەڕیووە و تا ئێستاكەش بەشی سیهەم نەچۆتە بواری بەرهەم هێنانەوە،

هەروەك (جەلیل زەنگەنە)ـی دەرهێنەریش ئاماژەی بۆ دەكات، سیناریۆی دراماكەی نووسیووەو ئامادەیە و چاوەڕێی ئەوە دەكات دەست بكرێت بەكاری وێنەگرتنی، لە میانەی بەدوا داچوونێكماندا لێدوانێكی تایبەتدا بۆ خوێنەرانی هەفتەنامەی “هونەری هەولێر” هونەرمەندی دەرهێنەر (جەلیل زەنگەنە) باسی لە هۆكاری دواكەوتنی كاری وێنەگرتنی زنجیرە دراماكەی كرد، هەروەها باسی لە ناوەرۆكی بەشی سێهەمی زنجیرە درامای گەردەلول و كاتی دەستپێكردن و وێنەگرتنی دیمەنەكانی بەرهەم هێنانی ئەو بەشەی ئەم جارەی بۆ باسكردین.
لە دەستپێكی لێدوانەكەی داهونەرمەندی دەرهێنەر (جەلیل زەنگەنە) دەربارەی هۆكاری دەست پێنەكردن و دواكەوتنی كاری وێنەگرتنی بەشی سێهەمی دراماكەی گوتی : “ماوەی دوو ساڵ و نیو خەریكی نووسین و ئامادەكردنی ئەو بەشەی ئەم جارەی گەردەلول بووم، نزیكەی (6) مانگە سیناریۆی بەشی سێهەمی زنجیرە درامای “گەردەلول” تەواو كردووە و ئامادەیە، چاوەرێی ئەوە دەكەم بودجەی دابین بكرێت لەلایەن كەناڵی ئاسمانی (كوردسات)، ئەوانیش خەریكی گفتوگۆن بۆ ئەوەی ئەو بودجەیە دابین بكەن بۆ ئەو بەشە، چونكە بودجیەكی زۆرە  ئیتر منیش چاوەڕێم كە لەوانەیە تا دوو هەفتەی دیكە یەكلای ببێتەوە، ئیتر یان من داوای لێبوردن دەكەم لەجەماوەر و بینەرانی ئەو درامایە، یاخوود دەست دەكەم بە كاری وێنەگرتنی”.
هەروەها گوتیشی : “بەشی سێهەمی زنجیرە درامای گەردەلول بریتیە لە (60) ئەڵقەیە، هەر ئەڵقەیكیش بریتیە لە (55) خولەك، ناوەرۆكی سیناریۆی ئەم جارە زۆرینەی ناوچە و شارەكانی كوردستان لە خۆی دەگرێت، بە شێوەیەكی فراوان كارم لەسەر ئەوبەشە كردووە و زۆر بە ووردی كارم بۆ هەموو رووداوەكان كردووە، سەرچاوەی زۆر باشی مێژووییم بەكار هێناوە بۆ ئەوەی كارێك بێت بۆ هەموو خەڵك و خەباتی خەڵكی كوردستان بگرێتە خۆی”.
دەربارەی بەشداریی كردنەوەی ئەو هونەرمەندانەی كە لە بەشی یەكەم و دووەمی زنجیرە درامای گەردەلول رۆڵیان هەبوو، ئایا لەو بەشدا بەشدار دەبنەوە یان نا ؟ لەوەڵامدا (جەلیل زەنگەنە) گوتی :”تا ئێستا ئەو هونەرمەندەی كە لێم دابڕاوە و بەشداریی ناكاتەوە لەگەڵمدا، ئەویش هونەرمەندی كۆچكردوو كاكە (بەهاددینی حەلیم)ـە، كە پارساڵ بەداخەوە كۆچی دوایی كرد و بەجێ هێشتین، ئەگەرنا هونەرمەندەكانی دیكە، ئەوەی بەشداریی دەكاتەوە سەر سەرم، ئەوەی بەشداریش ناكاتەوە كێشەم نیە لەگەڵ هیچ كامێكیان و زۆر رێزیشان دەگرم، تائێستا هیچ هونەرمەندێك پێی نەگوتوم بەشداریی ناكەم لەو بەشەدا، ئەوەی واشیگوتووە خۆی لە سیناریۆكەدا بوونی نیە، واتە سیناریۆكە پێویستی بە ئەو رۆڵانە نیە لەو بەشەدا،چونكە من پێشتریش لە چەند لێدوانێك و دیمانەیەك، كە لەگەڵمدا سازكرابوو گوتم لە 75%  ئەو ئەكتەرانەی بەشداریی بەشی یەكەم و دووەمیان كرد لەبەشی سێهەمدا رۆڵیان نامینێت، بەڵام هەندێك لەو ئەكتەرانە من لەگەڵ هەموویانم نیە و رێزم بۆ هەموویان هەیە  كە بەشدارییان لەبەشی یەكەم و دووەمی ئەو درامایەدا كرد، ئەگەر (گەردەلول) نەبوایە ئایا ئاوا بەو شێوەیەی ئێستاكە كە هەن دەناسران لەناو خەڵكی دا؟! بەڵام هەر ئەو گەردەلولەیە چەندان ئەكتەری دیكەش لە بەشی سێهەمدا دەناسێنێت بەخەڵك و بینەر، هیودارم تووشی مەغروریی و لە خۆبایی بوون نەبن، ئەگەر هاتوو ئەوانەی كە وا ئێستا ناسراون لە رێگەی گەردەلول و ناینەوێت بەشداریی بكەن من بەدیلم زۆرە بۆ ئەوانە، بۆیە من رێزم بۆ هەموویان هەیە ئەوەی بەشداریی دەكات من كێشەم نیە و بەشدارییان پێ ئەكەمەوە، ئەگەرنا من جارێكی دیكەش ئەیڵمەوە جێگەرەوە یاخوود بەدیلم زۆر زۆرە”.
هەر دەربارەی بەشداریی كردنەوەی ژمارەی ئەو ئەكتەرانەی دەست نیشانی كردووە، بۆ ئەو بەشەی ئەم جارە دەرهێنەری درامای گەردەلول گوتی : “ژمارەی ئەو ئەكتەرانەی لەو بەشەی ئەم جارەی گەردەلولدا بەشداری دەكەن زۆرن، تەنیا سەرەكییەكان بریتین لە (100) ئەكتەر، لە زۆربەی شارەكانی كوردستان ئەكتەرم هەڵبژاردووە، هەر شارێك بە شێوەزاری خۆی قەسە دەكات لە دراماكەدا، دیمەنەكان و رووداوەكان هەریەكەو لە شاری خۆی وێنە دەگیرێت، چونكە گەردەلول ئەم جارە بەشێوازێكی دیكەو بە بەرگێكی دیكەوە دەهێنمە بەرهەم، گەردەلول تەنها گەردەلولی ناوچەیەك و لایەنێك و شارێك نیە، بەڵكو گەردەلول موڵكی میلەتێكە و دڵنیام ئەو بەشەی ئەم جارەش زۆر بەهێزتر و جوانتر دەبێت لە بەشی یەكەم و دووەمیش”.
(جەلیل زەنگەنە) هەر دەربارەی ئەو ئەكتەرانەی بەشداریی لە بەشی سێهەمدا دەكەن، گوتی : “لەگەڵ زۆربەی هونەرمەندانی شاری هەولێر گفتوگۆم كردووە، خۆشبەختانە هەر هەموو ئەوانەی من قسەم لەگەڵیاندا كردووە، ئامادەیی خۆیان نیشانداوە بەشداری لەبەشی سێهەمدا بكەن سوپاسیان دەكەم، هیوادارم هونەرمەندان لە هەموو شارێك و لە هەموو پارچەكانی كوردستان یەكترییان خۆشبوێت و هەمیشە هاوكار و هاوڕێی یەكتربن لەكار و بەرهەم هونەرییەكاندا”.
هونەرمەندی دەرهێنەر دەربارەی ئەوەی ئایا ئەو بەشەی ئەم جارەی گەردەلول دوا بەشی گەردەلولە یاخوود بەشی دیكەی بەدواوە دێت ؟ لەوەڵامدا گوتی : “زنجیرە درامای گەردەلول لە (5) بەش پێكدێت و واتە دوای بەشی سێهەم دوو بەشی دیكەش بەدوای ئەودا دێت، هیوادارم ئەو بەشانە بهێنمە بوون، چونكە لە میانەی ئەو پێنج بەشدا نەوەی ئێستا و هەموو كەسێك خەبات و خۆراگری و قوربانییەكانی خەڵكی كوردیی پێ ئاشنا دەكەم، چونكە پێویستە ئێمە وەكو هەر نەتەوەیەكی دیكەی سەر رووی ئەو زەمینە، بەزمانی هونەر بە زمانی دراما مێژووی خۆمان بنووسینەوە و وە ئەرشیفێكی نەتەوەیی بزانین خاوەنی چین و چیمان كردووە، لە پێناوی ئازادیی و سەربەرزی خاك و ژیانی خۆمان”.
لە كۆتایی لێدوانەكەی دا هونەرمەند (جەلیل زەنگەنە) گوتی : “ماوەی وێنەگرتنی بەشی سێهەمی زنجیرە درامای گەردەلول، ئەوەی من پێشبینی دەكەم و كاتم بۆ داناوە ساڵێكی پێویستە ئەگەر هیچ كێشەیەك نیەتە پێش كارەكانمان، بۆیە هیوادارم لە ئایندەیەكی نزیكدا ئەو بودجەیە دابین بكرێت، بۆ ئەوەی چیتر كات بەسەرمان تێپەر نەبێت و دەست بكەین بەكاری وێنەگرتنی، هیوادارم كارێك بكەم بەدڵی خەڵك و هەموو تاكێكی كورد بێت”.

عەبدولغەفار عەبدوڵڵا