بۆ جه‌وهه‌ر نامیق

به‌ندی عه‌لی .. به‌هاری 2011

وام ئه‌زانی

له‌جه‌خارستانه‌کانی ڕقا

گوڵه‌به‌ڕۆژه‌کانی موحیبه‌ت ناپشکوێن

وام ئه‌زانی

له‌شه‌وه‌ قه‌ترانیه‌کانی جه‌هلا

مۆمی مه‌عریفه‌ هه‌ڵنابێ

وام ئه‌زانی

ئه‌وه‌ی توخنی گه‌ڕه‌گی داهۆڵه‌کان که‌وێ

هه‌ر ئه‌بێت به‌داهۆڵ و به‌س

وام ئه‌زانی

ئه‌وه‌ی ئاشنا بوو به‌کورسی

ماڵی ئه‌بێ به‌چۆکدایان

وام ئه‌زانی

له‌پاییزی هه‌ڵوه‌رینا

هه‌موو دره‌خته‌کانی عیزه‌ت ڕووت و قوتن

وام ئه‌زانی

له‌ڕۆژانی کڕێوه‌یا

هه‌ر هه‌موو گیانله‌به‌ره‌کان ئه‌بنه‌ په‌یکه‌ر

وام ئه‌زانی

نه‌نگه‌ له‌ژێر خۆڵی ده‌هرا

دیسان بدره‌وشێته‌وه ، جه‌وهه‌ر

وام ئه‌زانی .. وام ئه‌زانی