زیرهک ژێدار/بهریتانیا : ئهم بابهته له ههواڵیکی سهرنج راکێشهوه سهرچاوهی گرتوه. له میدیاکاندا بلاو کراوهتهوه که گوایه رێکخراوی عێراقی ئهمرۆ به هاوکاری رێکخراوی یهکێتی رۆژنامهنوسانی عێراق سێ هونهرمهندی گۆرانی بێژی ئهمسالی ههڵبژاردوه بۆ باشترین و پڕ جهماوهرترین له کاری هونهریدا.
ئهوانیش( زیاد ئهسعهد، ئهیوب عهلی، پهیوهند جاف). جێی گرنگی پێدان و دهستخۆشیه ئهم ههوڵه و زیاتر هاندان و به بهها زانینی کاری هونهرمهندانه. بهڵام ئهوهی جێی سهرسورمان و کهمێک پێکهنینه بهم مهسهلهیه، ئهویش ئهوهیه ئایا رێکخراوی رۆژنامهنوسان کاری هونهرمهندان ههلدهسهنگێنێت یان رێکخراوی هونهرمهندان؟ دیاره هیچ جیاوازیهک نیه لهنێوان کاری هونهری و رۆژنامهوانیدا؟! دیاره رۆژنامهنوسانیش بونهته پسپۆری هونهری؟ ئهی سهندیکای هونهرمهندان کاریان چیه ؟ دواتر ئهم ههلسهنگاندن و دهستنیشان کردنه به چ پێوهرێکه؟! ئایا ئهوهی جهماوهری زۆر بێت یان ئهوهی کاری هونهری باش و بهرچاوی کردبێت؟ ئهگهر به جهماوهر بێت و به کوالێتی کاری هونهری نهبێت . پێم وایه گۆرانیبێژی ترمان ههنه لهسهر ئاستی ههموو کوردستاندا جهماوهریان زیاتر بێت لهوانهی که ناویان هێنراوه! ئهوه چهندایهتیه یان چۆنایهتی؟ لهههموشی سهیرتر دهڵێت هونهرمهندی ئهم سال! ئایا هونهرمهندی ئهم ساڵ ئهوهی بهرههمی ئهمسالی بڵاو کردۆتهوه و لهسهر کارو بهرههمهکهی ههلسهنگاندنی بۆکراوه یان ههر حهزی چهند کهسێکه بۆ هونهرمهندێک، که میزاجی ههڵبهز و دابهزیان نیشتۆتهوه سهر شانی گۆرانیبێژێک؟ ههر له ههواڵهکهدا ئاماژه بهوه دراوه که گوایه زیاد ئهسعهد چانسی له ئهیوب و پهیوهند زیاتره! ئهوهشیان کێشه نیه. زیاد گۆرانیبێژێکی چاک و بهتواناو بههرهداره. بهڵام ئهوهی من زانیبێتم وهک بهرههمی خۆی سالانێکی زۆره تهنانهت گۆرانیهکی بهرههم نههێنراوهو بلاو نهکراوهتهوه. بهلام دیاره پسپۆران شارهزاییهکهیان ئهوهنده چره و قوڵه ههر بهههست و پێشبینیهوه دهتوانن باش و خراپی بهرههمهکان دهست نیشان بکهن. ئهگهر نا خۆ هێشا گوێبیستی بهرههمی تازه بلاو نهکراوهکهی زیاد ئهسعهد نهبوینهو باوهر ناکهم خۆشی بزانێت کهی ئهم بهرههمه( نهک بلاو دهکرێتهوه) بهڵکو کاری ستۆدیۆی تهواو دهبێت! لهگهل ههر ههولێکی بهرهوپێشچوون له کوردستاندا دهبێت ههردهم فاولێکی تیادا بکهوێت. منیش داوا له برا فیتهرو دکتۆرو مهلاکان دهکهم من دهست نیشان بکهن بۆ سهرۆکایهتی عێراق. رهنگه به پێوهری ئهوان من کهسێکی جهماوهری و لێهاتوبم و شایهنی ئهو پۆستهبم!!
