ئەوانەی لایان شەرمە کوردبن ، مافیان نیە درۆکانیان بکەن بەکاڵا

سامان فەرەج

“کــــەس بە ئەلـــــفازم نــــەڵــــێ خۆ کردییە خۆ کوردییە

ھەر کەسێ نادان نەبێ خۆی تالیبـی مــــەعنــا دەکــــا”

سامان حەمە فەرەج /لەندەن

لڤین ئەو دەزگا و دامەزراوەیە کە ڕاگەیاندنی تەسک کردۆتەوە بۆ تەنها خاڵێک کە ئەویش پروپاگەندەیە،بۆ فرۆشتنی زانیاری لەشێوەی کاڵا وبەدەستهێنانی بژێوی باش بۆ خاوەنەکانی گەلێک ڕێگای ناڕەسەن و ناواقعی ئەگرێتەبەر .لە هەرشوێنێ بەهەر زمانێک جنێو و لکەدارکردن بەدیبکات ئازایانە بۆی ئەدات لەتەپڵ وبانگەشەی بۆ ئەکات بەبێ ئەوەی ئاستی مەعریفی و ئەخلاقی نووسەرەکە هەڵسەنگێنێ، ئەمەش یەکێکە لەو هۆکارە سەرەکیانەی کە بووەتە هێنانە خوارەوەی ئاستی لڤین و لەدەستدانی خوێنەر و بێ ڕەواجی بوونی. لە تازەترین هەواڵ و بەدواچونیا  تایتڵێکی کۆن و سواو ، وێنەیەکی عودەی سەدام و کاک مەسروربارزانی داناوە ،گوایە خەڵکی هەولێر ئەودووکەسە بەهاوشێوەی یەکدی ناوئەبەن ،وئەم بابەتەشی لە سەرچاوەیەکی ئنگلیزی وەرگرتووە ،وەک نووسراوە..ئەوەی من لام مەبەستە ڕاستکردنەوەو هۆشیاری دانە بە زۆرینەی خەڵک لە سەر بابەتی لەم جۆرە نەک لە قسەکردن لەسەر کەسایەتی بارزانی و عودەی و خەڵکی هەولێر…پێش هەر شت ئەو بابەتە لە ڕۆژنامەی فایننەشەڵ تایمزدا بڵاوکراوەتەوە کە بڵاوکراوەیەکی بازرگانی وداراییە و زیاتر لە بیست پێگەی هەیە لە دەوڵەتانی دنیادا و بنکەی سەرەکی و مێژووییەکەی لەندەنە ،بەڵام بە پلەی هەشتەم ڕۆژنامەی بریتانی ئاماژەی پێ ئەکرێ وهەموو خوێنەرێکی بریتانی تامەزرۆی نیە ئەمەش پەیوەستە بە ناوەڕۆک و بابەتەکانی ئەم بڵاوکراوەیە کە زیاتر وتایبەترە بەکەسان و کۆمەڵە بازرگان وسەرمایەدارێکی جیهانی و بریتانی و ناباو بوونیەتی لەگەڵ زۆرینەی خوێنەر و ئاستی زۆرینەی خەڵک.

نووسەری ئەم بابەتەش کە خانمێکە ،تریسکە حامید، بابەتێکی کۆن و سواوی لەسەر کێشەی گەندەڵی ولێپرسینەوە نووسیەوە لەسەر کوردستان و سەرلەبەری بابەتەکە ئەوە ئەخاتەڕوو کە ئەم خانمە لای نەنگە هەولێر باس بکرێ وەک دوبەی عارەبی و کۆمەڵێ خاڵی لاوازی ئیداری و کۆمەڵایەتی کوردستان بەگشتی و هەولێر بەتایبەتی ئەخاتە ڕوو کە ڕەنگە زۆرینەی ئەم شتانەی ئەم دەمی تێ ژەنیوەو بەداهێنانی ئەزانێ لە هەموو کەناڵەکانی کوردیدا باسی لێوەکرابێ و دوورونزیک کێشە و بابەتی حکومەت وحیزب و خەلکیش بێت ،خاتوو تریسک وهاوشێوەکانی لەوجۆرە کەسانەن کە لایان شەرمە  کوردبن و لەسەربچوکترین مافی کوردیش بێنەوەڵام و لە هیچ خۆپیشاندان وبۆنەیەکی کوردی وکوردستانیا بەدیبکرێن، بەڵام بەشانازیەوە لەگەڵ عارەبە لەشبازەکانی کەنداوی عارەبیدا بێتە هاوکار و تۆماری جوانی کارامەیی دوبەی و قەتەر بڵاوکاتەوەبەزمانی ئنگلیزی ،کەسانێک کە کوردبوون بەسوکایەتی بزانن و لە پایتەختەکانی دنیادا لەگەڵ بازرگانی عارەبدا بەرەبابن چی پەیوەستیان ئەکات بە کوردوکوردستانەوە؟ ئەوانە نابنە فەریاد ڕەس ومتمانەی کورد،ئەوەی لەدەستیان دێت تانە و دژایەتی کردنی لانەی کوردە ،نەک بۆ بەهێزکردن و دانانی پرۆژەی نوێ تەنها بۆ دڵدانەوەی نەیار وناحەزانی کورد وبەس،هیوادارم لەئایندەدا کەسانی وەک تریسکە هەوڵبدەن هەستی کوردبوونیان بەهێزبکەن و تاچی تروەک دلسۆز وکوردێکی بەشەرەف لە نووسینەکانی بروانین وئازایانە لەهەولیێرا بچێت بەگژ کەمووکوڕی وگەندەڵیداو یەخەی بەر پرسەکان بگرێت ،نەک لەدوورا لە سوچی بڵاوکراوەیەکی بیانی دا ، کورد بکات بەناڕەسەن وگەندەڵ و سوکایەتی بکات بە قەوارەی کوردی یەوە چونکە  جەماوەر ماندوو بوو لە درۆ لە دژایەتی و ملشکاندن ،خوازیارم لڤین چی یەکانیش کەمێک بەخۆیانە بچنەوەو هەرچی وتی یاع کوردستان شاباشی بۆ نەکەن ..