سەندیکای ھونەرمەندانی کوردستان ئیدانەی تۆپبارانی تورکیاو ئێران دەکات

ئەنجوومەنی سەندیکای ھونەرمەندانی کوردستان لەبەیاننامەیەکدا ئیدانەی بۆردومانەکانی سنووری کوردستان لەلایەن وڵاتانی تورکیاو ئێران دەکات، ئەمەش دەقی بەیاننامەکەیە…

بەیاننامەی ناڕەزایی
جەماوەری کوردستان
ھونەرمەندانی ھێژا
ماوەیەکە ھەردوو دەوڵەتی ئێران و تورکیا بێ گوێدانە یاسا نێو دەوڵەتیەکان و مافەکانی مرۆڤ کەوتونەتە تۆپ بارانکردن و بۆردومانکردنی ناوچە سنوریەکانی ھەرێمی کوردستان لە بناری قەندیل و ھاوکات لە ناوچە دابڕێنراوەکانیشدا و بە تایبەتی لە مەندەلی و جەلەولاو سەعدیە و شارەبان ڕۆڵەکانی گەلەکەمان بونەتە ئامانجی تیرۆریستە شۆڤێنیەکان و زۆر لە ڕۆڵەکانی ئەم گەلە لە ناوچە جیاجیاکان شەھید و بریندار بوون و زۆر خێزانیش لەو ناوچانە ئاوارە بوون لەسەر زێد و ماڵی خۆیان ،  لەشاری خانەقینیش ڕووباری ئەڵوەن لەلایەن کۆماری ئیسلامی ئێرانەوە ووشک دەکرێت کە کاریگەری لەسەر ژیان و گوزەرانی خەڵک دروستکردووە .. بێگومان ئەو شاڵاوە دوژمنکارانەی ھەردوو دەوڵەتی ئێران و تورکیا پیلانێکی بەرنامە داڕێژڕاوە و  بێدەنگی حکومەتی ناوەندی عێراقی فیدراڵ لە ئاست ئەم ڕووداوانەدا جێ ی سەرسوڕمانە! .. بۆیە ئێمە وەک سەندیکای ھونەرمەندانی کوردستان ئەم دەستدرێژیانە بۆ سەر خاکی ھەرێم مەحکوم و ڕیسوا دەکەین و داواکارین لە حکومەتی ھەرێمی کوردستان بەھانای خێزانە زەرەرمەندەکانەوە بێت و ھەوڵبدات لە ڕێگەی نەتەوە یەکگرتوەکانەوە سنورێک بۆ ئەم دەست درێژیانە دابنێت .
سەربەرزی بۆ ڕۆڵەکانی گەلەکەمان و سەرشۆِڕی و ڕیسوایی بۆ دوژمنانی کورد.

سەندیکای ھونەرمەندانی کوردستان
٢٣/٨/٢٠١١