دوای ئەوەی “دەرباز یونس” بەرێوەبەر و خاوەنی ماڵپەڕی (کوردمیلۆدی)، هاوکات وەکو بەرپرسی لاپەڕەی هونەری هەفتەنامەی (باس) سەردانی ماڵی حەسەن سیساوەیی کرد و لە نێزیکەوە حالی هونەرمەندی ناوبراوی بۆ لایەنی پەیوەندیدار بەهونەرو بینەرانەوە خستەڕوو، مەکتەبی تایبەتی سەرۆکی هەرێم “مەسعود بارزانی” لە سەر داوای سەرۆک خۆیەوە سەردانی ماڵی ناوبراو دەکات و ژووری ژیانی تایبەتی ئەو نۆژەن دەکاتەوەو هاوکات هاوکاری باشیشی دەکات.
لەم بارەیەوە محەمەد کە کوری خوشکی حەسەن سیساوەییەو هاوکاری ژیانی ناوبراو دەکات و بەیەکەوە لە خانوویەکی شارەدێی باسرمە دەژین، گوتی “دوای ئەو دیمانەیەی کە کاک “دەرباز یونس” بۆ مام حەسەنی ئەنجامدا، چەند کەسێک لە مەکتەب سەرۆکی کاک مەسعود بارزانییەوە لەسەر داوای ئەوەو هاتن و ژوورەکەی ناوبراویان نۆژەن کردەوەو هاوکاری باشیشی کردین، هاوکات بۆ ئەو ئوتوموبێلەی کە داوای کرد بەڵێنیان پێداین لە ماوەیەکی نێزیک بۆی دابین بکەن”.
لای خۆشییەوە حەسەن سیساوەیی گوتی “ئەمن گەلەک سوپاسی کاک دەربازی دەکەم کە بە واستەی وی یارمەتی منیان دایەو چاوانی ماچ دەکەم، رەبی خوا مرازی حاسر کا”.
دەرباز یونس وەک خۆی سەبارەت بەو بابەتە گوتی “من هیچ شتێک ناڵێم، ئەم کارەی خۆشم بە منەت بەسەر کەسەوە نافرۆشم، چونکە ئەمە کاری منەو دڵخۆشم بەهۆی منەوە هونەرمەندێکی وەک حەسەن سیساوەیی هاوکاری کراوە، هاوکات سوپاسی مەکتەب سەرۆک کاک “مەسعود بارزانی” دەکەم و هاوکاری ئەوان بۆ هونەرمەندێکی وەک حەسەن سیساوەیی جێگای رێز و بەرز سەیرکردنە”.
لە چەند مانگی رابردوو دەرباز یونس وەک رۆژنامەنووسێک سەردانی ماڵی حەسەن سیساوەیی کرد، دیمانەیەکی درێژ و هاوکات راپۆرتێکی ڤیدیۆیی بۆ ئینتەرنێت سەبارەت بەسەختی بارودۆخی ژیانی ئەو کەڵە هونەرمەندە لە ئینتەرنێت و هەفتەنامەی (باس) بڵاوکردەوە، دوای ئەوە لێژنەیەک لە مەکتەبی سەرۆکی هەرێم لەسەر داوای بەرێز کاک مەسعود سەرۆکی هەرێمی کوردستان سەردانی ماڵی ناوبراو دەکات و ژووری ژیان بەسەربردنی نۆژەن دەکاتەوەو هاوکاریش پێشکێش بەحەسەن سیساوەیی دەکات.
(کوردمیلۆدی)
سوارە کافرۆشی
