دیـــدار نانەکەلی : خۆ خزاندنە نێو پاڵەوانیەتیە نێودەوڵەتیەکان بۆ ھەڵبژاردەی تۆپی پێی کوردستان بە شێوەیەکی فەرمی لەنێو چاڵاکیەکانی یەکێتی تۆپی پێی جیھانی (فیفا) زۆربەی ئەستەمیەکانی تێپەڕاند و توانی نیشانی بدات کە ھێز و توانای پڕ لە بەرائەت و برایەتی وەرزش دەتوانێت ھەموو ئەو ھەنگاوانەی پێشکەوتنی ووڵاتێک ببڕێت کە زۆر جار سیاسەت دەرەقەتی نایەت و تێیدا دەستەوەستان دەوەستێت.
لە کاتێک کە خەونی ھەموو وەرزشدۆست و وەرزشەوانێکی کوردستان بوو کە ھەڵبژاردەکەیان لەنێو رکابەڕیە نێودەوڵەتیەکانببینن، بەرەوپێشچوونی قۆناغەکانی سەرکەوتنی ئاستی وەرزش لە ھەرێمدا توانی بەشێک لەو شاخە سەھۆلبەندانیە بشکێنێت و دەستی پێش ھەنگاوە سیاسیەکان بێخی. چونکە ئەو ھەنگاوانەی ئیستا ھەڵبژاردەکە دەیبرێت پێشوەختە لەگەڵ سەربەخۆیی ووڵاتێکی ئازاد و پشتیوانکار.
پاش چوار جار بەشداربوون لە جامی جیھانی ھەرێمەکان و بەدەستھێنانی پلەی دووەم لە دوو پاڵەوانیەتی، ھەڵبژاردەی تۆپی پێی کوردستان توانی میوانداری جامی (ڤیڤا) بکات لەنێو خاکی ھەرێمی کوردستان.پێنجەم پاڵەوانیەتی جامی ھەرێمەکان لە بەرواری ٤/٦/٢٠١٢ لەسەر یاریگای نێودەوڵەتی شەھید فەڕەنسۆ ھەریری لە ھەولێری پایتەخت بە بەشداری ٩ ھەڵبژاردە کە دابەشکرابوون بۆ سەر ٣ گرووپ دەستی پێکرد.
ھەڵبژاردە بەشداربووەکان پێکھاتبوون لە کوردستان، بیابانی رۆژئاوا، ئۆکستانیا، زەنزیبار، رایتیا، تامی ئیلام.
قوبرسی تورکیا، دارفور، پرۆڤنس.
یاری کردنەوەی ئەو پاڵەوانیەتیە لەنێوان ھەڵبژاردەی کوردستان و بیابانی رۆژئاوا بوو کە یاریەکە لە بەرژەوەندی ھەڵبژاردەی خاوەن ماڵ کۆتایی پێھات بە ٦ گۆڵی بێ بەرامبەر.ھەرچەند وەکو پێشبینی دەکرا کە ئاستی تەکنیک و ئەزموون و لێھاتووی ھەڵبژاردە بەشداربووەکان لە یەکتر جیاوازبوون.ھەربۆیە چەند ئەنجامێکی سەیر لە تۆپی پێ لەو پاڵەوانیەتیە تۆمارکرا بە تایبەت لە بەرامبەر ھەڵبژاردەی دارفور کە تەنھا لە ٢ یاریدا ٣٣ جار تۆڕی گۆڵەکەیان ھەژاند.بەڵام میوانداریکردنی ھەموو ھەرێمی کوردستان بە شارەکانی ھەولێر و سلێمانی و دھۆکەوە بۆ رکابەریەکانی ئەو پاڵەوانیەتیە، تام و چێژی خستە دڵ و دەروونی وەرزشدۆستانی کوردستان.
بەشێوەیەکی گشتی ئاستی میوانداریکردنی پاڵەوانیەتیەکە و رێکخستنی چاڵاکی پێنجەمین جامی (ڤیڤا) سەرکەوتووترین پاڵەوانیەتی مێژووی جامی جیھانی ھەرێمەکان بوو کە تەمەنی کەمتر لە ٨ ساڵە .
ھەڵبژاردەی تۆپی پێی کوردستان بە سەرپەرشتی راھێنەر عەبدولڵا مەحمود و بە پێکھاتەیەکی بەھێز و ئاوێتە لە یاریزانانی ھەولێر و سلێمانی و کەرکوک و دھۆک و زاخۆ توانی ئاستێکی باش و دڵخۆشکەر پێشکەشی ھاندەرانی بکات و خاڵێکی پرشنگدار لە سەرەتای مێژووی خۆیدا بنوسێتەوە، کە لە ئایندەدا دەکرێ ببێتە ھاندەرێک بۆ خۆ خزاندنە نێو پاڵەوانیەتیە نێودەوڵەتیە مەزنەکانی یەکێتی تۆپی پێی جیھانی.
ھەڵبژاردەی تۆپی پێی کوردستان مێژووی پرشنگداری خۆی دەنوسێتەوە
