چیت لێم ئەوێت؟ لەوە زیاتر
دڵ ناخەمە زێر پێتەوە
لەوە زیاتر ڕێگا نادەم
دڵ لەعەشقت بتوێتەوە
چیت لێم ئەوێت؟! بۆچى هاتوویت؟
لەسەر رێگاما وەستاوى
کە بۆ من شەختەو زریان و
بۆ خەڵکیش تیشکى هەتاوى
تۆ کچێکى بارانى بویت
ڕژایتە نێو ژیانمەوە
دواتروسکەى مۆمى عەشقت
لەچاوانما کوژاندەوە
وەکو شەماڵ خۆت نیشاندا
بەمنى تەنیاو کۆچەرى
وەلێ ئەفسوس تەرزى دڵم
بەڕەشەباى تۆ هەڵوەرى
چیت لێم ئەوێت؟ تازە دڵم
بەتۆ هیچ سوکنایى نایە
بڕۆ ئیتر لەمن دووربە
تەمەنم ڕوو لەکۆتایە
زانا حەمە غەریب
