١
خودایە
تۆ خۆت لەناو
کۆشک وتەلارەکانی
هەنگویندا دانیشتویت
چوار دەورت بە فریشتەی
چاوجوان و باڵاجوان چنراوە
بۆچی پێت تاوانە
من ئازیزەکەی خۆم ماچ بکەم !!!
٢
خودایە
تەنها داوام هەر ئەوەیە
بە قودرەتی ئیلاهی خۆت
فرمێسکی ماسییەکان بسڕە
یان دنیا وەک پەڕە سیخارێک
بپێچەرەوە و با بڕۆین !!!
٣
خودایە
ئەگەر ڕۆژێک
وەک مێخەکێکی لارەمل
سەرم نەوی کرد بۆ زەوی
لەبەر بێ هێزی سەرو لەبەر هیچ شتێک نییە
لەبەر گەورەیی دایکمە !!!
٤
خودایە
بەهەشت و پەری بۆ خۆت
دۆزەخ و ئاگر بۆ خۆت
ڕێم بدە
بە ماچ کردن
تۆڵە لە یار بکەمەوە !!!
٥
خودایە
ئەگەر بەهەشت وەک سلێمانی
دڵ گیر نەبێت نامەوێ
گەر جەهەننەم وەک دووری
دایک سەخت بێ
تاوانم چییە ئەمنێری بۆ ئەوێ !!!
٦
خودایە
هەتا کەی ڕەشەبا
لاسکی گوڵەکان بشکێنێ
هەتاکەی ماسییەکان
دڵ شکاو لەئاودا دانیشن
کاتێتی بتبینم پێت بڵێم
بڕوانە بۆ خوارێ و بەسێتی !!!
٧
خودایە
ئەی کەسی بێکەسان
چەند ساڵە چاوەڕێین سەرێکمان لێ بدەی
ئەو هەموو هەڵەبجەو گەرمیانە
چاوەڕێی لوتفت بوون
نەهاتی
ئەم جارە گەر هاتی سەر چاوان
لەمەودوا کوردەکان
زۆرناکەن لەمیوان !!!
٨
خودایە
تەنیا تۆ
لە عەشقی شاراوەی کچان و
لە خەمی نەبڕاوەی ناودڵی دایکم و
کورد ئەچی
تەنیا تۆ
لە تینوێتی دەوەنی ڕوتەڵەی چیاکان تێئەگەی
تۆ هەرخۆت
لەساتی کوشتنی ژنان و
شکانی ئاوێنە و
توانەوەی مۆمەکان
ئەزانی
تەنیا تۆ
وەک ئەوان بێکەسی
هەر ئەوان وەکو تۆ
بەتەنیان !!!
٩
خودایە
ئەترسم ڕۆژێ بێت
ئەم دڵە گەورەیەم
دڵۆپێک خوێن چییە
لە ناویا نەمێنێ
ئەم دنیا گەورەیە جێگای من نەبێ
خودایە لەو ڕۆژە تاریک و تونەدا
قەت نەکەی ئەم دڵەم لەبیر کەی !!!
١٠
خودایە
سور بزانم بۆ بەیانی
گۆڕیچەم بۆ هەڵدەبەستن
میرازی ناو گۆڕم ئەکەن
سور بزانم
لەبەر دەرگای ماڵەکەمان
هاوڕێکانم خەمبار خەمبار ڕاوەستاون
باوکم بەدوای شیعرێکی (نالی) دا ئەگەڕێ
لەسەر گۆڕەکەم بینوسێ
پەشیمان نابمەوە
لەوەی کردومەو وتومە !!!
١١
خودایە
چیتر بەرگەی
شکانی مینای دڵەکان ناگرم
نامەوێ سوتانی هەورەکان ببینم
هەڵوەرینی گوڵەکان بەسێتی
چیتر هاوکێشەی وونبون
بەمن شیناکرێتەوە
شەمەندەفەری ژمارە هیچ بنێرە
دەمێکە چاوەڕوانم
خودای من !!!
١٢
خودایە
بێ پرسی خۆم هاتمە دنیا
بی ئاگا دەڕۆم
بەڵام لێرە
ئەوەی بمەوێ خۆم ئەیکەم
ئەوەی کە بۆشم نوسراوە
وەک وانەی کۆن
نایخوێنمەوە ئەی سڕمەوە !!!
١٣
خودایە
ڕەشەبایەک هەڵکە
هەرچی لافیتەی دیواری مزگەوتەکانە
فڕێبە بۆ سەرە نوێلک
تەنورەی بەری کچانی زانکۆ هەڵبەرەوە
سوخمەی هەڵواسراو بەتەنافی ماڵە دراوسێوە
بفڕێنە بۆ ماڵی ئێمە
ئەرز و ئاسمان پێئەکەنن
شار ئەبێت بە بەهەشت !!!
ڕێباز عوسمان عزیز
ستۆکهۆڵم
2012-02-16
diwaninali@hotmail.com
ڕازی دڵ لای خودا
