سه‌یرم که ‌

سه‌یرم که ‌
له‌ به‌ینی په‌نجه‌کانته‌وه‌
سه‌یرم که‌ ‌
ڕه‌ونه‌قی تێڕوانینم هێنده‌ کزه‌
به‌شی چنینه‌وه چوار وشه‌ نکا
له‌ میحرابی نیگات

خه‌وفم له‌ هه‌موو ته‌لیسمێک هه‌یه‌
له‌ نغرۆ بوونی زه‌مه‌ن ئه‌ترسم
ئه‌و زه‌مه‌نه‌ی وه‌ک سیگاریک
له‌به‌ینی دوو په‌نجه‌ی جه‌لادێکدا
به‌شی نه‌فه‌سێکی تری ماوه
منیش له‌ناو ته‌پڵه‌کی پڕ سوتوی
ئه‌م چه‌رخه‌دا عه‌یامێکه‌ ڕاکشاوم
سوتوی ژیان ئه‌پرژیته‌ سه‌ر روخسارم و‌
سیا بوونی کات ئه‌بینم
سه‌یرێکم که‌
ئه‌وه‌ته‌ له‌سه‌ر ته‌ریقه‌تی ته‌نیایی
له‌ حزورتا ئه‌وه‌نده‌ ساده‌ ئه‌بمه‌وه‌
سواڵی هه‌موو شتێک ئه‌که‌م
شاڵه ‌پرته‌قاڵیه‌که‌ی سه‌رشانم
داده‌خه‌م
مسقاڵ…مسقاڵ
زمڕوتی وشه و
پیرۆزی سه‌رنج
مه‌ودای نێوانمان
سواڵ ئه‌که‌م
بمبینه‌ چه‌ند که‌ساس و هه‌ڵڕژاوم
له‌ به‌رده‌متا
هه‌رچی هیهری تۆ هه‌یه‌ ببارێته‌ سه‌ر
شاڵه‌که‌م
ئه‌وه‌ی خۆشم هه‌موی هه‌ڕاجی ئه‌که‌م
هه‌مووی ئه‌ده‌م به‌ پشویه‌ک له‌ ژێر سێبه‌ری
کاتژمێره‌ کۆنه‌که‌ی ده‌ستتدا
تا هه‌نگاویک نزیکم ئه‌کاته‌وه‌ له‌ دوێنی
بۆ چرکه‌یه‌ک کچێنیم بکرمه‌وه‌
دواتر مسقاڵ مسقاڵ قه‌رزه‌کانت
ئه‌ده‌مه‌وه

‌
حیات مجید په‌رخی