کۆڕه‌و

به‌ندی عه‌لی

ئه‌م شیعره‌ له‌ساته‌وه‌ختی کۆڕه‌ودا نووسراوه‌

1991 .. پاوه‌/ دووئاوان

سه‌یرم مه‌که‌ن به‌تاسه‌وه
.. که‌من ته‌نیام
هه‌ڵگری یه‌ک ئه‌شکه‌نجه‌ نیم
میراتگری خه‌مه‌کانی هه‌موو دنیام

سه‌یرم مه‌که‌ن به‌تاسه‌وه
من دڵم مرد
چاوه‌کانیشم به‌ده‌ست خۆم
وه‌ده‌رهانی و به‌دیاری بۆ
حافزه‌که‌ی شیرازم برد
.. تافلیمی ئه‌م حه‌سره‌ته‌ لێباته‌وه‌
تۆفانی ڕه‌و
هه‌ره‌س به‌به‌فری کێو دێنێ
دایکێ ، کۆرپه‌یه‌کی بێ گیان
ڕائه‌ژێنێ
باوکێ بۆ کیسه‌ نانی سواڵ
چووه‌ ده‌رێ و نه‌هاته‌وه‌

سه‌یرم مه‌که‌ن به‌تاسه‌وه‌
من مرۆڤی چاخه‌ به‌ردینه‌کان نیم و
له‌چیرۆکه‌ ئه‌فسوناویه‌کانیشه‌وه‌

نه‌خوڵقاوم
ماوه‌یه‌که‌ ڕوخساری خۆم
له‌ئاوێنه‌ی خه‌یاڵیشدا نه‌بینیوه‌
واده‌زانم له‌سه‌ره‌تای ئه‌زه‌له‌وه‌
کۆچه‌ریم و
وه‌لێ هه‌ر له‌جێی خۆیدایه‌
کیسه‌ڵه‌ ڕه‌وتی هه‌نگاوم
سه‌یره‌.. دونیا
منی بێ باڵ و بێ نینۆک
له‌کێ بڕکێی داڵه‌کانی ئاسمانی خواو
گورگه‌ ڕه‌نگاوڕه‌نگه‌کانی عه‌رشی زه‌وی
له‌سه‌ر لاکم .. چۆنه‌ ماوم

سه‌یرم مه‌که‌ن به‌تاسه‌وه‌
ئه‌گه‌ر له‌مڕۆوه‌ متمانه‌ به‌مزراحی
به‌خت نه‌که‌م
مووروه‌ ڕه‌نگاوڕه‌نگه‌کانی ئاسوده‌ییش
له‌هیچ بسته‌ نیشتمانێ نه‌دۆزمه‌وه‌
له‌سه‌حه‌ری ژیانه‌وه‌
له‌به‌ربه‌یانی فامه‌وه‌
که‌یف له‌ژووره‌ داخراوه‌کان نابینم و
پڕ به‌دڵیش تۆڕی جاڵجاڵۆکه‌ی ڕقم
بۆ ده‌روازه‌ی سنووره‌کان ئه‌هۆنمه‌وه‌
ئه‌ی چاوه‌ زۆر زه‌قه‌کانی
خاڵه‌کانی پشکنینی سه‌ر ڕێی قه‌ده‌ر

پرسی شوناسه‌مان مه‌که‌ن
مناڵدوانه‌ی یه‌ک داییکین
له‌ئه‌مڕۆوه‌ ، ئێمه‌و .. سه‌فه‌ر