خه‌و

به‌ندی عه‌لی 2010

دوێشه‌و که‌سێ هاته‌خه‌وم

ووتم تۆ کێی

ووتی ئه‌گه‌ر خوا بناسی

من هه‌واڵنێرێکی ئه‌وم

ووتم باشه

له‌عه‌رشی ئه‌و ره‌حمانه‌وه

چ هه‌واڵێکی نوێت پێیه

بۆ ئه‌وانه‌ی

چاوه‌ڕێی سێبه‌ری ته‌رمی

ئه‌و په‌پووله‌ پاییزانه‌ن

باڕه‌شی بێڕه‌نگی فیتنه‌ی

میرخاسه‌ جه‌رده‌کانی جه‌نگ

فڕاندنی

چ هه‌واڵێکی نوێت پێیه

له‌وه‌ڵامی ئه‌و نامانه‌ی

کچه‌ یاخیه‌کانی زه‌وی ناردیانن

ئاگری دۆزه‌خی ئه‌ویش

سوتاندنی

چ هه‌واڵێکی نوێت پێیه‌

بۆ قه‌ره‌بوی

پێنج هه‌زار نێرگزی خنکاو

به‌بۆنی سێو

دارسێوه‌کانی بێستانی به‌زه‌یی خوا

ئه‌و دارانه‌ی .. بۆ عاشیقان

بوون به‌سێداری سێداره‌و

تابووتی مه‌رگێکی ناکاو

چ هه‌واڵێکی نوێت پێیه‌

بۆ ئه‌و کاریله‌ ووردانه‌ی

بێ جینایه‌ت

به‌ده‌م هه‌نیسک و ژانه‌وه

مه‌مکی ووشکی ژیان ده‌مژن

ئه‌ویش هه‌ر له‌کوێره‌کانی و

پرته‌قاڵی گوشراو ئه‌چێت

غه‌یری قه‌ترانی برسێتی

هیچی تری لێوه‌ نایه‌ت

ووتم ده‌بێژه‌ ده‌ی توخوا

فریشته‌ی چاو زه‌قی دان ڕیچ

بۆ وه‌ڵامی

ئه‌و هه‌موو ده‌رده‌ به‌سوێیه‌

چ هه‌واڵێکی نوێت پێیه‌

ووتی هه‌ر هیچ

منیش له‌حه‌سره‌تی وه‌ڵام

که‌وه‌ک دوپشکێ پێوه‌ی دام

وه‌ک چۆله‌که‌ی ڕاچڵه‌کیوی

ژێر ڕه‌هێڵه .. له‌خه‌و هه‌ستام