شه‌وێکی پاییز

به‌ندی عه‌لی .. 2010

شه‌وێکی پاییز

شار به‌قژی په‌خشانی شه‌و

خۆی داپۆشی

دره‌خته‌کان ڕووت و قووتن

هه‌ناسه‌یان ئه‌بێ به‌ته‌م

گه‌ڵا زه‌رده‌ وه‌ریوه‌کان

ڕه‌دووی ڕه‌شه‌با ئه‌که‌ون

هه‌ور یه‌خه‌ی خۆی دائه‌دڕێ و

به‌خوڕ ئه‌گری .. ئه‌هلی گه‌ڕه‌ک

له‌که‌نار ده‌ریاچه‌ی خه‌وا

ڕاوی سووره‌ ماسیه‌کانی خه‌ون ئه‌که‌ن

ژووره‌که‌م ، کپ و خامۆشه‌و

شه‌قام له‌ودیو په‌نجه‌ره‌وه هه‌ڵده‌له‌رزێ

سێبه‌ری موسافیرێکیش

له‌شانۆی دیواره‌کانا ، نمایشی

مۆنۆدرامایه‌کی کورت ئه‌کا

قژی شه‌و قه‌ترانی خه‌می لێ ئه‌چۆڕێ

پشیله‌ی ماڵه‌ هاوسێکه‌ی به‌رامبه‌رمان

ئه‌ویش له‌پشت په‌نجه‌ره‌وه

تێم ئه‌ڕوانێ و

به‌بزه‌ی سه‌ر لێوی زه‌ردی گڵۆپه‌کان

چاوه‌کانی بریسکه‌یان دێ

من له‌ده‌فته‌ری روحا

شیعرێک بۆ غوربه‌ت ئه‌نووسم

ئه‌ویش په‌ڕه‌ی ته‌نیایم ئه‌خوێنێته‌وه‌‌

ئای .. خودایه‌

ئه‌گریجه‌ ڕه‌شماریه‌کانی

شه‌وی غوربه‌ت ، چه‌ند درێژن