سه‌کۆی ئازادی

به‌ندی عه‌لی .. به‌هاری 2011

سه‌کۆی ئازادی

ئێوه‌ سه‌یری

گه‌مژه‌کانی نیشتمان که‌ن

له‌سوتانی سه‌کۆیه‌کدا

جاڕی مه‌رگی ده‌نگ ئه‌ده‌ن و

ته‌رمی ڕه‌نگی حه‌ق ئه‌بینن

ئاخر ئه‌و خۆشخه‌یاڵانه‌ وائه‌زانن

ئازادی هه‌ر

ته‌خته‌و بزماری سه‌کۆیه‌

وائه‌زانن ، ئازادی هه‌ر

مایکرۆفۆن و موکه‌به‌ره‌و

چه‌ند سه‌فته‌یه‌ک له‌کاغه‌زو

هه‌ندێ لافیته‌ی په‌ڕۆیه

ئێوه‌ سه‌یری

پیاوه‌ خه‌ڵه‌فاوه‌کانی نیشتمان که‌ن

وائه‌زانن ، زه‌بری تفه‌نگ

بورکان ئه‌کات به‌سوتماک و

لافاو ئه‌کات به‌جۆگه‌له‌و

زیکری زریان به‌گۆمی مه‌نگ

وائه‌زانن ، به‌چاوی سوور

دڵی زه‌مه‌ن ئه‌وه‌ستێنن له‌لێدان و

په‌رداخی پڕی بێزاری

ئه‌ترسێنن له‌ڕژان و

هه‌نگ په‌شیمان ئه‌که‌نه‌وه‌

له‌ماچی سه‌رمه‌دیی گوڵ و

هه‌ڵگوردی بێداران ئه‌که‌ن

به‌کێوی تور

ئێره‌ نیشتمانی گوڵه‌

نا نا نه‌خێر ، لێره‌ مه‌ڕوێن

ئێوه‌ هه‌رگیز نه‌سلی گوڵ نین

تا به‌زمانی گوڵ بدوێن