بۆ ڕه‌قیبێکی به‌دحاڵ

من به‌زمانی گوڵ ئه‌دوێم

تۆ به‌زمانی دڕک و خار

من هه‌میشه‌ ڕوو له‌خۆرم

تۆ هاوته‌ریبی شه‌وی تار

من هه‌ر گوڵ ئه‌گرمه نه‌یار

تاڕه‌نگ و بۆنی گوڵ بگرێ

تۆ گوڵ ئه‌بوغزێنی هه‌تا

له‌سنگی هیچ یارێ نه‌درێ

من ڕه‌نگه‌ لێک جیاوازه‌کان

له‌ڕه‌نگێکا نغرۆ ناکه‌م

نیشتیمانی ده‌نگه‌کانیش

له‌سه‌ر ده‌نگێ تاپۆ ناکه‌م

تۆ له‌چرپه‌ی با ئه‌ترسی

نه‌با ڕێکه‌وت باست بکا

شوشه‌ عه‌تری حه‌ق ئه‌ڕێژی

ڕه‌نگه‌ بۆنی کاست بکا

ئه‌ی ڕه‌قیبی چاو خه‌واڵو

ئه‌گه‌ر سه‌رمه‌ستی ڕابه‌وه‌

وا به‌یانه‌و خه‌یاڵی تۆ

هێشتا هه‌ر وابه‌سته‌ی شه‌وه‌

پێڵوه‌کانت هه‌ڵگڵۆفه‌و

به‌هتر بڕوانه‌ کازیوه‌

بزانه‌ له‌جه‌نگی نێوان

گوڵ و دڕکا کێ به‌زیوه‌

نه‌ونه‌مامه‌کانی شه‌قام

یان په‌رژینه‌کانی تفه‌نگ

خورپه‌کانی دڵی ڕووبار

یان پرخه‌کانی گۆمی مه‌نگ

پێم بڵێ کامیان به‌زیون

توتیه‌کانی ماڵی والی

یاخود فه‌قێ ڕووته‌کانی

حوجره‌ پڕ عیشقه‌که‌ی نالی

نا ئه‌ی ره‌قیب تۆ به‌دحاڵی

گوڵ له‌باڕه‌ش چۆن ئه‌ترسێ

تاهه‌ڵاڵه‌ی عیشق مابێ

بوون له‌نه‌بوون کوا ئه‌پرسێ

من هه‌تاهه‌م قوفڵه‌کانی

زیندانی خه‌م ئه‌پچڕێنم

هه‌ر منیشم بۆ سبه‌ینێ

له‌جێی تفه‌نگ گوڵ ئه‌ڕوێنم

نا نا نه‌خێر ئه‌من هه‌رگیز

هاوسه‌فه‌ری تفه‌نگ نابم

له‌سه‌ر وه‌رینی هه‌ر گوڵێ

دڵنیابه‌ بێده‌نگ نابم