خه‌می ئه‌مشه‌و

به‌ندی عه‌لی .. پاییزی 2011

ئه‌مشه‌و خه‌مێ ده‌مخواته‌وه‌

تێناگه‌م بۆ تێر نابێ لێم

ڕه‌نگه‌ پێی وابێ وه‌ک چه‌می

باده‌ی به‌هه‌شت هه‌ڵده‌قوڵێم

خه‌مێکی چه‌ن بێ ئاگایه‌

له‌ئه‌سراری ڕاوی نێچیر

تازه‌ به‌نیازه سه‌رمه‌ست بێ

به‌شه‌رابی مێوێکی پیر

نه‌خێر نا ئه‌ی خه‌می ناشی

مه‌حاڵه‌ مه‌ی له‌من بتکێ

که‌چنگێ مێووژی ڕه‌ش بم

توینێتی تۆم چۆن پێ ئه‌شکی

بڕۆ ئه‌ی خه‌م یه‌خه‌م به‌رده‌

هه‌وای ئه‌مشه‌و ساردو سۆڵه‌

له‌م خه‌راباتی عومره‌دا

روحم په‌رداخێکی چۆڵه‌

شه‌ڕم پێ مه‌فرۆشه‌ ئه‌ی خه‌م

به‌هیچ ناگه‌ی ، ڕه‌نج خه‌ساری

له‌بازاڕی شه‌ڕا ، ئه‌مشه‌و

من فرۆشیار ، تۆ کڕیاری