به‌هاری ئازادی

به‌ندی عه‌لی .. پاییزی 2011

ئه‌م وه‌رزه یارۆ له‌به‌هار ئه‌چێ

زۆر ئه‌ترسم به‌هاره‌ درۆزنه بێ و

گه‌مه‌ی گۆڕینی ده‌مامه‌کان

ئه‌ی ئه‌وه‌ نیه‌ هێشتا ته‌می گومان

تابناری ئه‌م کێوه‌ خه‌مه‌ی سه‌ر دڵمانی

داپۆشیوه‌و له‌به‌فری سڵیش

خه‌ریکی تاشینی په‌یکه‌ری

خواوه‌نده‌کانین

ئه‌ی ئه‌وه‌ نیه‌ هیشتا

هه‌وار هه‌ر له‌ئه‌شکه‌وت ئه‌چێ و

ئێمه‌ش وه‌ک ئه‌هلی ئه‌شکه‌وت

پاش خه‌وی قوڵی ده‌یان ساڵه‌

هه‌مان پیاوی نیانده‌رتاڵی له‌ش توکن و

مه‌چه‌ک ئه‌ستوور سه‌رقه‌تاری خێڵمانه‌ و

وه‌ک ڕانه‌ مه‌ڕ تێمان ئه‌خوڕێ

ئه‌رێ ئه‌ی بۆچی ، یارۆ

گوڵه‌کانی ئه‌م به‌هاره هێشتا

چاوخه‌واڵوون و

وه‌ک گوڵه نایلۆنه‌کانی نێو

ئینجانه‌کانی حه‌سره‌ت

نه‌ڕه‌نگیان هه‌یه‌و نه‌بۆن

ده‌ پێم بڵێ یارۆ بۆ تاهه‌نوکه‌ش

باڕه‌شی فریودان ته‌ته‌ری

په‌پووله‌کانی عیشقه‌و

گڕیش دواهه‌واری سه‌رفه‌ریان

ئاخر گه‌ر به‌هاره‌ یارۆ

ئه‌م ڕه‌وه‌ کولله‌یه بۆ

به‌ر له‌جۆزه‌ردانی ئومێد

نیشتوونه‌ته‌ سه‌ر ده‌شتی

خه‌ونه‌ هێشتا چه‌که‌ره‌کان

ته‌نانه‌ت ڕێ ناده‌ن چڵه‌ خه‌ونێ

قولانجێ باڵا بکاو

بگاته‌ سه‌حه‌ری پێش به‌یانێ

ڕه‌نگه‌ ئه‌م به‌هاره یارۆ

دێوجامه‌ بێ

ده‌نا ئه‌م هه‌موو ڕاوچیانه‌ کێن

ڕژاونه‌ته سه‌رشه‌قام و به‌ڕۆژی ڕووناک

سوێسکه‌و که‌وه شه‌یداکانی نیشتمان

ئه‌ده‌نه‌به‌ر ته‌رزه‌ بارانی مه‌رگ

خۆ ئه‌گه‌ر به‌هاره‌ یارۆ

ئه‌ی ئه‌و هه‌موو گه‌ڵای حوزنه‌ بۆ

له‌م دره‌خته پیره‌ی ژیان هه‌ڵئه‌وه‌رێ

لێم زویر مه‌به یارۆ که‌نه‌توانم

گوڵی متمانه‌ له‌م به‌هاره بچنم و

دیسان گوێم له‌قاقای

سوخریه‌تی قه‌ده‌ر بێ

به‌دڵه‌ ساویلکه‌و روحه‌ خۆش خه‌یاڵه‌که‌م

هه‌رچه‌نده‌ پڕ به‌دڵ حه‌ز ئه‌که‌م یارۆ

ئه‌وه‌ی ئه‌یڵێم وڕێنه‌ی سه‌رخه‌وی دوای

که‌لله‌ مه‌ست بوونی شه‌و بێ

نه‌ک خورپه‌ی چرپه‌ی حه‌قیقه‌ت