موکەڕەم ڕەشید تاڵەبانی
تەمووزی ٢٠٠٥
دەریایەک لە دەریایەک ئاووس بوو
دوای سی سەدەو سی دەیەو سی ساڵ و
سی مانگ و سی ھەفتەو سی رۆژو سی کاژێر
دەریایەک لە دەریایەک لەدایک بوو
لە ئامێزی دەریایەکدا ھەڵچوو
لە مێژووی دەریادا
دەریایەک دەریایەکی ھەڵلووشی
دەریایەک گازی لە گوێی دەریایەک گرت
دەریایەک لە ناو شەپۆلی دەریایەکدا نغرۆ بوو
دەریایەک مێژووی دەریایەکی خوێندەوە
دەریایەک لە جوگرافیای دەریایەک تۆرا
دەریایەک رووبارەکانی دەریایەکی راونا
دەریایەک کانی دەریایەکی کوێر کردەوە
دەریایەک سەنگەری لە دەریایەک گرت
دەریایەک کوودەتای لە دەریایەک کرد
دەریایەک چوو لە قاوەخانەی دەریایەک رۆنیشت
دەریایەک بە شەقامی قەڵاتی دەریایەکدا تێپەڕی
رای لە شۆستەکانی دەریا نەبوو
بەدەوری شەست مەتری دەریادا خولایەوە
قاوەیەکی تاڵی لە گازینۆی شەوانی دەریادا ھەڵقوڕاند
شەوی بە پاسەوانی لە دەوری قەڵاتی دەریادا بەسەر برد
ھەموو وایەرەکانی کارەباو تەلەفۆنی پێ ناشیرین بوو
بە قەد دارتێل و دیوارەکانی ماڵەکانی گەڕەکەکاندا بێ بەرنامە راکێشراون
دیمەنی کۆڵان و شەقامی پایتەختی دەریایان ناشیرین کردبوو
بێزی لەو ھەموو ئۆتۆمبیلانە ھاتەوە کە رێ بە رێبوار نادەن
بە ناو دەریای دەریادا گەشتی دەریایی بکەن
دەریایەک ھەموو خاڵەکانی پشکنینی شاری دەریای بەسەر کردەوە
ھیچیان نەیانگوت بۆ کوێ دەچیت
لە کوێوە دێیت
کوا ناسنامەکەت
خەڵکی کوێیت
شەپۆلەکانت چی دەکەن
کەی ھەڵدەچن
کەی کەشتیەکان نغرۆ دەکەن
چۆن باندە دەریاییەکان دەستگیر دەکەن
چۆن شەونخوونی دەکێشن
چۆن ماڵە گومان لێکراوەکان دەپشکنن
چۆن گەڕەکە بێئاوەکان دڵنیا دەکەنەوە
ئاوی ئیفرازیان پێ دەگات
چۆن خەون بە شەقامێکی قیرتاوو شارێکی خاوێن و
پایتەختێکی بێ تژی لە مەڕو ماڵات و
گیسک و بزن و تەگەو بەران و
مریشک و کەڵەشێرو جووجەڵەو
شەقامی ھەلڕکەنراوو پڕ لەقۆرت و قیرتاونەکراوو
بێ کارەباوو ئاوو
بە ئاساییش دەکەنەوە
دەریایەک پرسیارێکی لە دەریایەک کرد
دەریایەک خەونی بە بەژنی دەریایەکەوە بینی
دەریایەک چووە داخوازی دەریایەک
باوک و دایکی دەریا
داوای دوو کیلۆ زێڕی عیار بیست و یەکیان کرد
دەریا
گفتی نەداو نەگەڕایەوە
چوو لە دوورگەکانی سۆمەترە
خۆی تووڕە کرد
ھەڵچوو
ھاواری کرد
چەندین دوورگەی وەرگەڕاندو
چەندین کۆرپەی دەریای نغرۆ کرد
چەندی خنکاند
چەندی بێ سەرو شوێن کرد
چەندی ھەر ڕامالی
چەندی خستە بن ھەرددو باڵی
نەنیشتەوە
تا دەریای نەیاری خۆی نغرۆی ژێر دەریا کرد
دەریایەک بێزی لە دەریایەک ھاتەوە
لە رۆخی دەریایەک رۆنیشت
ئاوڕی لە دەریا نەدایەوە
دەریایەک گوێی دەریایەکی راکێشا
نەخەڵەتێت نقوڕچک لە دەریایەک بگرێت
دەریایەک چووە سەربانی ماڵی دەریایەک
تەماشای کچی دەریای کرد
دەریا لە دەزگەی ئاسایش سکاڵای تۆمارکرد
تا کاتی دادگەیی دیاری دەکرێت
دەریایەک بەردەمی دەریایەکی گرت
دەریایەک ترەکسووتی وەرزشی دەریایەکی لەبەر کرد
لە گۆڕەپانی دەریایەکدا دەستی بە یاری کرد
دەریایەک بە پارکی دەریایەکدا پیاسەی دەکرد
تینوو بوو لە ئاوی بۆڕی فرۆشگەی دەریا ئاوی خواردەوە
دەریایەک لە بیابانی دەریایەکدا لە تینوواندا کوێر بوو
دەریایەک لاژەی بۆ دەریایەک دەگوتەوە
قومێک ئاوی دەریای پێ ڕەوا ببینێت
دەریایەک نوێنی بووکێتی دەریایەکی راماڵی
دەریایەک لە دەرگەی دەریایەکی دا
داوای مەنجەڵێک ئاوی ئیفرازی کرد
دەریایەک کارەبای گەڕەکیان کوژایەوە
مۆمی دەریایەکی داگیرساند
دەریایەک کەپووی دەریایەکی شکاند
دەریا لە بنکەی پۆلیسی تاوان سکاڵای تۆمارنەکرد
دەریایەک کوڕێکی بوو لە دەریادا خنکاندی
دەریایەک لە مۆتێلی پایتەختدا دانیشت
داوای دوو پەرداخ ئاوی دەریای کرد
دەریایەک بەلەمی نێو کەشتی دەریایەکی بینی
سڵاوی لێنەکرد
پاسەوانانی دەریایی گازکرد
لە زیندانی کناری دوورگەی دەریایەکدا بیبەستنەوە
دەریایەک لە پەنجەرەی دەریایەکەوە رۆشتە ژوورێ
جگە دەریا ھیچ دەریایەکی نەدیتەوە
دەریایەک بلیتێکی بڕی
سەیری فلیمی دەریایەکی کرد
باسی بەسەرھاتی نغرۆبوونی دەریایەکی دەکرد
پاڵەوانی فلیمەکە دەریایەک بوو
کەناری دەریای نەدیتبوو
دەریایەک گۆشتی برای دەریایەکی خوارد پێی ھەرس نەبوو
دەریایەک کەزیی دەریایەکی راکێشا
کەوتە نێو دەریایەکەوە
جلەکانی تەڕ بوون
دایکی دەریای سەرزەنشتی کرد
دەریایەک رۆیشتە پایتەخت
لە خاڵی پشکنینی دەریایەک،
دەریایەک بە بارمتەی گرت
داوای دەریایەک دۆلاری کرد
دەریا نەیبوو ، دەریا لەسەری دا
خوێنی دەریا رژا
دەریایەک دەریای خوێناوی کرد
قومێک ئاوی دەریایان بۆ نەبرد
دەریایەک لە بازاڕی دەریا سەتەلایتی دەریای کڕی
بەکارتەوە کەناڵی دەریای وەرنەگرت
دەریایەک لە دەرکەی نووسینگەی ئینتەرنێتی دەریا چووە ژوورێ
سەیری سایتی دەریای دەریای دەکرد
دەریایەک ئیمێلێکی لە دەریای دەستەخوشکیەوە بۆ ھات
نەیخوێندەوەو دیلێتی کرد
دەریایەک سەری لە ماڵی دەریای ئامۆزای دا
دەریای ئامۆزای لەسەر کار بوو
ھاوسەرەکەی خوڵکی نەکرد
دەریایەک لەگەل دەریایەکدا دیمانەیەکی سازدەدا
پرسیاری دەریای لێکرد
دەریایەک خەونی بینی ببێتە دەریایەک
خەونی دەریایەک قووت بدات
دەریایەک چامەی دەریای دەنووسی
لە نێو دێڕی دەریادا
خۆی ڤەشێردبوو
دەریایەک لە ناو باخچەی چامەی دەریایەکدا گیرسایەوە
ھەموو کێشەکانی تەڕکرد
دەریایەک لە ئامێزی دەریایەکدا باوێشکی دا
لەسەر نوێنی دەریایەک خەواندیان
دەریایەک خەونی سەیری بینی
دەریایەک لەناو لەپی دەریایەکدا توایەوە
بوو بە دڵۆپی دەریایەک
بۆ نێو دەریا گەڕایەوە
دەریایەک دەریای بینی
پڕ دەریایەک گریا
دەریای بۆ بێنن
دەریایەک چووە خوازبێنی دەریایەک
باوکی دەریا قایل نەبوو
بە دەریای شاد بکات
دەریایەک سروودی دەریای دەگوتەوەو
لە دەریای ئاوازدا خنکا
ژێواری دەریا پێینەزانی
دەریایەک ھات مانگی دەریا ببینێت
لە لێواری دەریادا بزربوو
دەریایەک دەریای دەریای دەویست
ماڵی دەریای دەریایان پێ نیشان دا
لەگەڕەکی دەریادا
منداڵە وردکەی گەڕەک
بەدوای کەوتن
تا پێیکرا لە دەریادا خۆی بزرکرد
دەریایەک دەریا بوو بە دەریا
دەریای دەریای بە دەریا کرد !!!
