ئێران.. لاوازی و بێدەسەڵاتی و پەککەوتەیی دیکتاتۆر!

ئاوڕدانەوەیەک لە دەسەڵاتی دیکتاتۆری ویلایەتی فەقیهی!

عەبدوڕەحمان گەورکی، نووسەر و شرۆڤەکاری سیاسی

عەلی خامنەیی و بەرپرسانیتری رژێمی ئێران و پاسدارانی دەهۆڵژەنی ئەوەن کە هاویشتنی مووشەک و فڕۆکەی بێفڕۆکەوان لە ناو ئێرانەوە بەرەو دەرەوەی سنوورەکانی ئێران “سەرکەوتنێکی گەورەیە” و ناویان ناوە “بەڵێنی راستگۆیانە”!

تەلەفزیۆنی رژێمی لە رۆژێ ٣٠ی خاکەلێوەی ئەمساڵ بڵاویکردەوە کە ئەمیر عەبدوڵڵاهیان، وەزیری دەرەوەی ئێران، پێشوەختە ئەمریکای لە هێرش بۆ سەر ئیسرائیل ئاگادار کردۆتەوە. به پێی سەرچاوە رۆژنامەوانی و رەسمییەکانیش، لە سەدا 99ی مووشەک و درۆنەکان، بەر لە گەیشتن بە ئامانجەکانی، خراونەتە خورارەوە. ئەنجامی هاویشتنی زیاتر لە ٣٢٠ مووشەک و فڕۆکەی بێفڕۆکەوان، برینداربوونی منداڵێکی عەڕەب بووە! باس لەوە کراوە کە ژمارەیەک لەو مووشەک و فڕۆکە بێفڕۆکەوانانە لە ناوخۆی ئێران و عێراق کەوتوونەتە خوارەوە و ئەمکارە لەلایەن خەڵکی ئێران و کۆڕ و کۆبوونەوە دەرەکییەکان گاڵتەی پێکراوە!

هەر لەسەر ئەم هێڵە لاواز و بێدەسەڵاتییە بوو کە پاسدار محەممەد باقری، سەرۆکی ستادی هێزە چەکدارەکانی خامنەیی، دوای چەند کاتژمێرێک لە کۆتایی هاتنی ئەمکارە گاڵتەجاڕانەیە وتی: هێرشەکەمان کۆتایی هاتووە و نامانەوێت درێژەی پێبدەین! پاسدار حسێن سەلامی، فەرماندەی سوپای پاسدارانیش وتی: ئەگەر ئیسرائیل هێرش بکاتە سەر (ئێران)، لە ئێرانەوە هێرشی بەرپەرچدانەوەی بۆ دەکرێت. ئاماژەی بەوەشکرد: بەرنامە و رێکوپێکی ئەم ئۆپەراسیۆنانە بەجۆرێکە کە توانیویانە ئامانجەکان لە قووڵایی ئیسرائیلدا بپێکن. وەزیری دەرەوەی رژێمیش لە کۆبوونەوەی لەگەڵ باڵیۆزەکانی وڵاتانی دەرەوە لەم پێوەندییەدا وتی کە 72 کاتژمێر بەر لە هێرشکردنەکانمان بۆسەر ئیسڕائیل، ئەم وڵاتانەمان ئاگادار کردووەتەوە.

چاوخشاندنێک بە دەرهاویشتەکانی ئەم هەنگاوە گاڵتەجاڕانەی رژێم لە ئاستی نێودەوڵەتیدا

·                    وەزیرانی دەرەوەی وڵاتانی گروپی 7 و لەوانە: کەنەدا، فەرەنسا، ئاڵمان، ئیتالیا، ژاپۆن، بریتانیا و ئامریکا، لە ٣١ی خاکەلێوەدا بەیاننامەیەکی هاوبەشیان بڵاوکردەوە و ناڕەزایەتیان دەربڕی بەرامبەر بە سەرکوتی ناوخۆیی لە ئێران و “پێشێلکردنی توندی مافەکانی مرۆڤ” و بانگەوازیان دا لەمەڕ “پێشێلکردنی مافەکانی مرۆڤ” و رژێمی ئێرانیان بە بەرپرسیار لە کردەوەی دوژمنکارانە و ناسەقامگیرکەر لە ناوچەکەدا زانی و ئامادەیی خۆیان دەربڕی بۆ سزادانی زیاتری ئەم رژێمە.

• لە رۆژی ٣١ی خاکەلێوەی ئەمساڵ، چارڵز میشێل، سەرۆکی ئەنجوومەنی ئەوروپا، هەڕەشەی لە رژێمی ئێران کرد کە “گەمارۆی زیاتر دەخەینە سەر ئەم رژێمە… چونکە رژێمی ئێران هەڕەشەیە بۆ سەر ئاسایشی ناوچەکە”. (ماڵپەڕی کۆمیسیۆنی ئەوروپا، ٣١ی خاکەلێوەی 2024)

• لە رۆژی ٣١ی خاکەلێوەی ئەمساڵ، ئەنجومەنی پیرانی بلژیکا بە کۆی دەنگ، بڕیارنامەی “پێشێلکردنی روو لە زۆربوونی مافەکانی مرۆڤ لەلایەن رژێمی ئێرانەوە”ی پەسەند کرد. ئەم بڕیارنامەیە کە رەنگدانەوەی ئاڕاستەی سیاسیی گشتییە لە ئەوروپا، بانگەشەی 4 پرسی بەپەلە دەدات: “گرتنەبەری رێوشوێنی خێرا بۆ رزگارکردنی گیانی زیندانیانی سیاسی کە مەترسیی ئیعدامیان لەسەرە، لێپرسینەوە لە رێبەرانی رژێم لە (4) دەیە تاوانی دژ بە مرۆڤایەتی و ژینۆساید، پشتیوانیکردن لە مافەکانی خەڵکی ئێران بۆ بەرخۆدان لە بەرانبەر رژێمی ئێراندا” بە دامەزراندنی کۆماری دیموکراتیک و ناوزەدکردنی تیرۆریستیی سوپای پاسداران”. پێویستە ئاماژە بەوە بکرێت کە رژێمی دیکتاتۆریی ئێران لە ساڵی ٢٠٢٣دا لانیکەم ٨٦٤ کەسی لە سێدارە داوە.

• ئەنجوومەنی نوێنەرانی ئەمریکا، پڕۆژە یاسای “ئاشتی بە رێگەی دەسەڵات لە سەدەی بیست و یەک”ی پەسەند کرد کە لەلایەن مایکل مەککۆڵ، سەرۆکی لیژنەی کاروباری دەرەوە پێشکەشکرا، بە 361 دەنگی (ئەرێنی) بەرامبەر 57 دەنگی (نەرێنی) و رەوانەی ئەنجومەنی پیران کرا بۆ پەسەندکردنی. ئەنجومەنی پیرانی ئەمریکا ئەم پڕۆژە یاسایەی پەسەند کرد. ئەم پڕۆژە یاسایە لە راستیدا “کۆی چەند پرۆژەیاسایە” و بە چەند قۆناغێکی پەسەندکردنیدا تێپەڕیوە و لەگەڵ پەسەندکردنی هەر بابەتێک لەلایەن سەرۆکی ئەمریکاوە دەبێتە “یاسا” و جێبەجێ دەکرێت. ئەم پڕۆژە یاسایە، خۆی زۆر بابەتی لە خۆی گرتووە و لەوانە: ١٥ بەش و لانیکەم ٦ گەڵاڵەیتری دژ بە رژێمی ئێران: پڕۆژە یاسای “پاراستنی نەوتی رژێمی ئێران رابگرن”، پڕۆژە یاسای “بەرەنگاربوونەوەی هەناردەکردنی بەرفراوانی مووشەک لەلایەن رژێمی ئێرانەوە”، پڕۆژە یاسای مەهسا، واتا پڕۆژە یاسای “گەمارۆکانی سەر وەلی فەقێ” و سەرۆک کۆماری ئێران و فەرمانگەکانی سەر بە ئەوان بەهۆی پێشێلکردنی مافی مرۆڤ و پشتیوانیکردن لە تیرۆر، پڕۆژە یاسای “نا بۆ تەکنەلۆژیا بۆ تیرۆر”، پڕۆژە یاسای “لێپرسینەوە بکەن لە رێبەرانی ئێرانی” و پڕۆژە یاسای “گەمارۆدانی دامەزراوە داراییە بیانییەکان لە پێوەندی لەگەڵ کڕینی نەوت و بەرهەمە نەوتییەکان و باری نەناسراو لە ئێرانەوە”. چاودێران پێیان وایە دوای پەسەندکردنی کۆتایی ئەم پڕۆژە یاسایە لەلایەن سەرۆک کۆمارەوە، ئەمریکا بە ناچاری، سیاسەتی خۆی بەرەو رووخاندنی رژێم دەگۆڕێت.

·                    پێشتر و لە رۆژی 30ی خاکەلێوەیش، ئەمریکا و 47 وڵاتیتر بەیاننامەیەکیان لە دژی رژێمی ئێران دەرکرد کە مووشەک دەرکردنی رژێم و هێزی نیابەتییەکانی ئەویان بە راشکاوی سەرکۆنە کرد و ئەم هەنگاوە مەترسیدار و ناسەقامگیرییەیان بە هەڕەشەی جیددی بۆ سەر ئاشتی و ئاسایشی نێودەوڵەتی راگەیاند.

·                    پێش ئەوەیش، (145) ئەندام کۆنگرێسی ئەمریکا لە بڕیارنامەی (1148)دا، داوایان لە حکومەتەکەی خۆیان کرد “دان بە مافەکانی گەلی ئێراندا بنێت بۆ دروستکردنی ئێرانێکی دیموکراتی، لەسەر بنەمای جیاکردنەوەی ئایین و دەوڵەت و نائەتۆمی” و ئینجا پشتیوانییان کرد لە پلاتفۆرمی موقاومەتی ئێران کە لە (10)خاڵدا راگەیاندراوە. لەم بڕیارنامەیەدا هاتووە: مانەوەی رژێمی ئێران بە شێوەیەکی جیدی پەیوەستە بە سەرکوتکردنی ناوخۆیی و چالاکییە تیرۆریستییەکانی لە دەرەوەی وڵات بە رێگەی کەڵک وەرگرتن لە تاقمە تیرۆریستەکانیەوە. هەروەها ئەم بڕیارنامەیە بە ئاماژەدان بە جاڕنامەی مافی مرۆڤ و جاڕنامەی سەربەخۆیی ئەمریکا، “مافی خەڵکی ئێران بۆ رووخاندنی حکومەتی ستەمکار” بە مافی سروشتی و رەوای ئەوان دەزانێت. جەختکردنەوە لەسەر لەسێدارەدانی زیاتر لە (30) هەزار زیندانیی سیاسی بە فەتوای خومەینی لە هاوینی ساڵی 1988 بەشێکیتری بڕگەکانی بڕیارنامەی ژمارە (1148)ی کۆنگرەی ئەمریکایە.

ترسی رژێم لە بەرەوپێشەوەچوونی گەل!

خەڵکی ئێران و جیهان گاڵتەیان بە کردەوەی نەزۆکانەی رژێم و هاویشتنی مووشەک و فڕۆکەی بێفڕۆکەوان بەرە دەرەوەی سنوورەکانی ئێران کرد بە جۆرێک کە داوودەزگاکانی رژێمی ئێران رایانگەیاندووە هەرکەسێک گاڵتە بەو کارە بکات دەستبەسەر دەکریت و…

لەم رۆژانەدا کە رووخساری شەڕخوازانە و تیرۆریستیی رژێمی ویلایەتی فەقیهی بۆ جیهان ئاشکرا بووە، ئەم رژێمە هەوڵدەدات سەرنجی جیهان لە بەرکەوتنی “سەری رەشەمارەکە”، بەرەو سەرکوتکردنی ژنان و چین و توێژەکانی ئێران رابکشێت و هاوکات رێژەی لەسێدارەدانەکان بەرز بکاتەوە. خامنەیی بە بیانووی “بەدحیجابی” فەرمانی بە دەزگای قەزایی خۆی کرد کە سەرکوتی ژنان چڕتر بکاتەوە.

دوا وشە!

کاتی ئەوە هاتووە هەمووان چاوی خۆیان بەڕووی چارەسەری راستەقینەدا بکەنەوە. رێگریکردن لە دەستپێڕاگەیشتنی بۆمبی ئەتۆمی و پێشگرتن بە تێرۆریزم و کوتایی هێنان بە دەستوەردانی بەربڵاو لە کاروباری وڵاتانی ناوچەکە و بە تایبەتیش ریشەکێشکردنی هێزی بە وەکالەتی رژێمی ئێران، تەنیا یەک رێگەچارەی هەیە و ئەویش رووخاندنی ئەم رژێمەیە لەسەر دەستی خەڵک و بەرخۆدانی ئێران. لەم پێوەندییەدا رێوشوێنی پێویست و بەپەلە بریتین لە: “ناوزەدکردنی سوپای پاسداران وەک هێزێکی تیرۆریستی، وەگەڕخستنی بڕگەی چەخماخە و چالاککردنی بڕیارنامەکانی ئەنجومەنی ئاسایش لە دژی پڕۆژە ئەتۆمییەکانی رژێمی ئاخوندی و سەپاندنی سزای هەمەلایەنە لە دژی ئەم رژێمە”.

***