جاشبیر..

بیر بەرهەمی کارکردنی خانەکانی مێشکە، توانای لێکدانەوە و تێگەیشتنە لەدراوەکانی دەوروبەر هەروا خواستە داواکراوەکانی پێ ئامادە دەکرێ لەپڕۆسەی بیردۆزیدا دوایی دەگۆڕێ لۆ جێبەجێ کردن لەپرۆسەی کردەیی. بیرکردنەوەی خۆڕسک و داهێنەری بەسود جێگای هان و ڕێزن بەڵام کۆی بیرۆکە هاوردە یا خوازراو یان سەپێندراوەکان دەبێ دوای هەڵسەنگاندن وەرگیرێن و جێبەجێ بکرێن بەپێی مەرج و هەلەکان. کوردستان جێی تاقیکردنەوەی چەندەها بیروبۆچوون و بیرزانی بووه چ لەڕێی داگیرکارانەوە یان هاتنی بەخواست و بێ خواستی خۆمان بەبێ شەڕ بەشێنەیی. جاشایەتی لەفەرهەنگی سیاسی کوردا بەوانە دەگۆترێ بەکرێگیراوی بەپارەی دوژمن دژ بەبەرەی گەل و نیشتمانن.

لەوانەیە جاشێکی جەستەیی زیانی لەسنورەکی بەرتەسکدابێ بەڵام ئەوانەی جاشبیرن زیانی زۆر زیاتر دەگەیەنن پیرۆزیەکانی نەتەوە و نیشتمان دەشێوێنن. جاشبیرەکان زۆر جار بەناوی یەکسانی و مرۆڤایەتیەوە دەخزێنە ناو کۆمەڵ، بەناوی نێونەتەوەیی و جیهانگەریەوە بەشێوەیەک مێشک شۆراوە دەبن گەل و نیشتمانیش ناشیرن دەکەن و لەخۆپەرستی تاکی هەروەها بەرژەوەندیە مادیەکانی خۆیاندا ڕێشێوێنی گەنجان دەبن بەشێوەک کار لەداهاتووی نەتەوە بکەن.

نەتەوە و نیشتمان لای کۆی مرۆڤ گرینگە شوناس و هێزی هیزری تاکە لەهەموو سەردەم و قۆناغەکانی پێشکەوتنی ئێستا و داهاتوودا بەڵام ئەو جاشبیرانە لەنێونەتەوەیی چ ئەوپەڕی چەپ بن ماڕکسی یان ئەوپەڕی ڕاستڕەو هەروا توندڕەوی ئاینپەرست بەئومەمیەتی ئیسلامیشەوە کە زادەی بیری عەرەبە جوایەزیەکی ئەوتۆیان نیە. بەکوردی خوا، خودا لەخودی مرۆڤەوە پیرۆزی و باشیە ویژدانیەکانە هەتا بەلاتینیەکەش(Good) گۆد هەربەواتای گود واتا باشی ڕۆحی تاکی مرۆڤ تا ئێرە کێشەنیە بەڵام لەئاینگەرایەکان بەناوی پێغەمبەرایەتی نێردراوی خودا پەیامی بەرژەوەندی گەلی خۆیان دەگەیەنن هەندەک بەخۆشی هەندێ بەشەق و تۆقاندنی هەنوکەیی یان داهاتووی دوای مردن دەیسەپێنن.

جاشبیرەکان ئەوانەن شوێنکەوتووی ئەو بۆچوونە ڕاستوچەپانەن کە هەمیشە زیانیان بەتاکی مرۆڤەکانیان دەگەیەنن بەناوی پاداشتی چاکە و سزای خراپە لەبەرژەوەندیەکانیان. بیرسازە بێگانەکان تەنیا برینێک دروست دەکەن بەڵام جاشبیرە ناوخۆییەکان وەک بەکتریا و ڤایرۆسی مێشکی زیان بەکلتور و پیرۆزی خاکەکەی دەگەنێنن، بەدەسەڵاتی ناوخۆ دەڵێن: گەندەڵ بەڵام خۆیان کرمی ناو گون بۆنپیس و قێزەونی سیاسی و کۆمەڵایەتین.

دڵشاد تاقانە