حەیدەر عەبدولڕەحمان : ئەوەندەی فیستیڤاڵی سینەمایی لە ھەولێر ساز دەکرێت , نیو ئەوەندە فیستیڤاڵ لە ھۆلیۆد ئەنجام نادرێت ! ئەوەتا گەورەترین وڵاتی سینەما ساڵێ جارێک فیستیڤاڵ دەگێڕێت , ئەمە وای کردووە فیستیڤاڵ سەنگ و نرخ و بەھایێکی گەورەی خۆی ھەبێت و وەک لای ئێمە نەبێتە کەرەستەیەکی دەڵاڵ خانە و مەزاتی پێ بکرێت و کەسانێکی نامۆ بە سینەمای لە پاڵدا پێ شاباش بکرێت .. سینەما لای ئێمە ئەوەندە سووکایەتی پێ دەکرێت , ئەو پیشەسازییە زەبەللاحە کە کەم لە وڵاتانی جیھان دەرەقەتی دێن , ببێتە پیشەسازییەک لە رنینی کەنگرو تۆرکە سانا تربێت و ئەوەی بێ و چڕنۆکی لێ بگرێت , پاشان لە بەد بەختی سینەما ھەموو ھونەرەکانی دیکەی وەک شێوەکاری و موزیک و ئەدەبی و کولتوورییەکان پەراوێز کراون و کەم بیستوومە لە نێو ئەو ھەموو داھێنانن و پێشکەوتنە دیارانەی بوارە ھونەرییەکانی دیکەدا چەند ساڵ جارێک نیمچە فیستیڤاڵێکییان بۆ ئەنجام بدرێت ! کەچی چڕنۆک گرتنەکە ھەر لە سینەمایە , وەک ئەوەی ئێمە ئەوەندە دەوڵەمەندو تەژی بین لەو ھونەرە , منداڵانی ئێمەش بە رەچەڵەک سینەما کار بن نەک ھەر گەورەکانمان , وەک ئەوەی ئاسمانی کوردستان بریسکەیان بێت لە ئەستێرە زەبەللاحەکانی سینەماو ھۆڵە سینەماییەکانی زرمەیان بێت لە بینەرو , کوردستان تەژی بێت لە کۆمپانیای سینەمایی جۆراو جۆر ..
زۆر کەڕەت من ھەر خۆم لە خۆم دەپرسم تۆ بڵێ ی ئەوانەی ئەو زنجیرە فیستیڤاڵە سینەماییانە یەک لە دوای یەک و ھەریەکەو لە ژێر ناونیشانێک ساز دەکەن , لە چمکی راستەقینەی فیستیڤاڵ و ئامانجەکانی فیستیڤاڵ گەیشتبن ؟ یان تێ گەیشتوون و دەیانەوێت خۆیانی لێ نا بەڵەد بکەن ؟ ئایا ئەوەی بە ناوی فیستیڤاڵەوە دەکرێت شتێ لە ئاستی سینەما دەگۆڕێت , یا تەنھا پرۆپاگەدەیەکی راگەیاندنەو بەرھەمەکانییان لە بەرژوەندی ھەر لایەک بێت تە نھا لە بەرژەوەندی سینەمادا نیە ؟ ئایا ئەم فیستیڤاڵە بە ناو سینەماییانە رۆڵ دەبینن لە دروست کردنی کادیری سینەمایی , یاخود پەروەردە کردنێکی ئیقلیجی ئەوانە ؟ ئایا کادیری سینەما بە فیستیڤاڵ دروست دەبێت یا بە ئەزموونو خوێندن و خولی سینەمایی ؟ وەڵامی راستەقینەی دەیان پرسیاری دیکەی لەم جۆرە لە گیرفانی ئەو لایەنانەیە کە ئەو جۆرە فیستیڤاڵانە ساز دەکەن .. بەڵام من وزۆرانی وەک منیش نازانن بۆ دەریان ناخەن ؟!
وڵاتێکی بێ سینەما بەڵام تەژی لە فیستیڤاڵی سینەمایی !
