فیلمی سینەمایی كوێستانی قەندیل لە دەرهێنانی هونەرمەند تەها كەریمی بڕیار وایە لە 15/5 و رۆژانیتر لە شاری سلێمانی و سەرجەم شار و شاروچكەكانی هەرێمی كوردستان نمایش بكرێت، ئەو فیلمە چیروكەكانی ژیان و كلتوری هاوبەش و بەریەككەوتنی چوار نەتەوەی كورد و تورك و عەرەب و فارس لە جوگرافیایەكی وەك كوێستانی قەندیلدا، بە زمانێكی سینەمایی دەگێرێتەوە.
تەها كەریمی دەرهێنەری فیلم لە لێدوانێكیدا بۆ هاوڵاتی ئاماژە بەوە دەكەات كە ئەو فیلمە باس لە رەنج و ئازار و بەریەككەوتنەكانی گەلانی رۆژهەڵاتی ناوەڕاست و بەتایبەت چوار نەتەوەی كورد و تورك و فارس و عەرب دەكات و وتی”ئەم فیلمە بەرهەمی هەست و نەستی منە و بە پێویستم زانیوە كە ئەو فیلمە دروست بكەم و وەك شێعری شاعیرێك، ”
چیرۆكی ئەو فیلمە لە زمانی 4 ئەكتەری سەرەكی و چەندین ئەكتەری باشوری كوردستان وەك كەمال جڵال قادر، ئاوارە حسێن، عەبدورەحمان محەمەد و عەلی مەجید زادە و 120 ئەكتەری ئەو چوار نەتەوەیەوە دەگێردرێتەوە.
دەرهێنەری فیلمی سینەمایی كوێستانی قەندیل دەڵێت “ئەم فیلمە باس لە رابردوو ئێستای پەیوەندیەكانی چوار نەتەوەی دراوسێ (كورد، تورك،عەرەب،فارس)دەكات، كە لە جوگرافیایەكی وەك كوێستانی قەندیل بەریەك دەكەون و هەوڵ دەدات چیرۆكێكی سینەمایی بگێرێتەوە”.
سێ هونەرمەندی ناوداری كورد رۆڵی سەرەكی لە فیلمی كوێستانی قەندیلدا دەگێرن ئەوانیش دكتۆر قوتبەدین سادقی مامۆستای شانۆ و عەینەدین مەریوانی و هونەرمەند جومەرد سترانبێژی باكوری كوردستان، یەكێك لە رۆڵەكانیتر لە لایەن میوانی بەرهەم، كامەران رئوف هونەرمەندی شانۆكاری باشوری كوردستان و لەمیا حسێن شێوەكاری عەرەب بەرجەستە دەكرێت.
فیلمی كوێستانی قەندیل لە رۆژانی 15/5 بەدواوە لە هۆڵی رۆشنبیری شاری سلێمانی نمایش دەكرێت و هاوكات لە گەڵ نمایشی ئەو فیلمە 3 فیلمی پێشوی دەرهێنەر و سیناریۆی فیلمی كوێستانی قەندیل وەك یەكەم سیناریۆی چاپكراوی كوردی لە لایەن چاپخانەی رەنج لە سلێمانی بڵاودەكرێتەوە.
فیلمی سینەمایی كوێستانی قەندیل بەرهەمی بەرێوەبەرایەتی هونەری سینەمای سلێمانی سەربە وەزارەتی رۆشنبیری هەرێمی كوردستانە و كە تەها كەریمی كاری دەرهێنان و كەیوان یوسفی كاری وێنەگرتن و هونەرمەند محەمەدرەزا وەتەندوست كاری مۆنتاژی بۆ كردووە و هونەرمەند فەردین خەلعەتبەری كە مامۆستای مۆسیقایە لە زانكۆی هونەر لەئێران كاری مۆسیقای فیلمەكەی كردووە.
فیلمی كوێستانی قەندیل یەكەم بەرهەمی درێژی هونەرمەند تەها كەریمییەو لە هەوڵیكی دیكەیدا بۆ بینەران و خوێنەرانی سینەما، سیناریۆی فیلمەكەی بە شێوەی كتێب چاپ كردووە كە دەبێتە یەكەم سیناریۆی كوردی چاپكراو، بڕیار وایە لەگەڵ سێ كورتە فیلمی پێشوی لەسەر یەك DVD، هاوكات لەگەڵ نمایشی فیلمەكەی بڵاویبكاتەوە.
