جەمالى دەلاک: دواى نیو سەدە لەخەبات و تێکۆشانى هونەرى و خەباتى بەرگریى نەتەوەیى ، لەڕۆژى جیهانى میوزیک لەڕێکەوتى ( 1/10/2010) هونەرمەند و پێشمەرگە ،کوڕى ڕۆژانى سەختى خەبات و تێکۆشان و کوڕى شارو شارۆچکەو گوندەکانى کوردستان ، کاکە حەمە جەزا بۆ هەمیشە دڵە جوان و میهربانەکەى دواى ململانێیەکى سەخت و دژوار لەگەڵ نەخۆشیدا ،لەئامێزى بنەماڵەو خانەوادەکەیدا لەشارى سلێمانى ، لە لێدان کەوت و بۆ هەمیشە ماڵئاوایى لێکردین و بەرەو هاوخەبات و هاوسەنگەرەکانى و هونەرمەند و هاوڕێ ئازیزەکانى بەتایبەت ( عەلى حاجى سەعەڕەش ) هەنگاوى هەڵگرت و بەجێى هێشتین ،
حەمە جەزا کەسایەتیەکى فرە دەوڵەمەند بوو لەهەموو بوارەکانى ژیان دا وەک ( هونەر، کۆمەڵایەتى ، بەرگریکردن لەنیشتمان و زمان و فەرهەنگى نەتەوەکەى ..تاد) ئەگەرلاپەڕەکانى هەریەک لەو بوارانە هەڵبدەیتەوە بێگومان پڕیەتى لەدەیان کارى جوان و سەرنج ڕاکێش ،کە کەسایەتى ئەو هونەرمەندە گەورەیەى تیادا بەرجەستە بووە ،
لەڕێکەوتى ( 26/10/2009 ) لەشارە دێرینەکەى کوردان ، لەشارە خۆشەویستەکەى هەولێر کە هونەرمەند حەمە جەزا تەمەنێکى زۆرى ژیانى تێدا بەسەر بردبوو کەهەموو ڕۆژەکانى لەو شارەدا بۆ کاکە حەمەجەزا دونیایەکى پڕ لە داهێنان و بەهرەمەندى و زێتر خۆ ئامادەکردن بوو بۆ برەو دان بەکاروانى هونەرى وهەستى نەتەوایەتى وجۆشدانى هەستى بەرگرى لە هونەرو نیشتمانەکەى دژ بەداگیرکەران ، لەو ڕێکەوتە و لەو شارە سەربەرزەدا ( هەولێر ) ، وەزارەتى ڕۆشنبیرى ولاوان خەڵاتى ڕێزلێنانى لە (هۆڵى پێشەوا ) بەخشییە هونەرمەند و پێشمەرگە (حەمەجەزا ) ئاى لەو ڕۆژە ، لەناخەوە قوڵپى گریانم دەهات و فرمێسک لە چاوەکانمدا قەتیس مابووخۆشى و ناخۆشى تێکەڵاوبوو بوون لەبەر دووهۆکار ،
یەکەمیان: زۆر خۆش حاڵ بووم بەوەى میللەتەکەم گەیشتۆتە ئەو ئاستەى بەر لە کۆچ کردنى کەسایەتیەکانى ،ڕێز لە هونەرمەند و بەهرەمەندەکانى خۆى دەگرێت ، ڕێز لەخەباتى پێشمەرگایەتى و هونەرە بەرزەکەى کاکە حەمە جەزا دەگرێت ، هۆڵى پێشەوا لێوان لێو ببوو لەکەسایەتى و هونەرمەند و هەوادارانى دەنگەبەسۆزەکەى کاکە حەمەو هاوسەنگەرانى ،لەتەواوى شارەکانى کوردستانەوە ئامادەى ئەو مەراسیمە بەرزە بوون ،
دووەمیان : کاکە حەمە جگە لەکەسایەتى هونەرى و نەتەوەیى ، هەمیشە بەکەسێکى ڕووخۆش و قسە خۆش و جوان و قەشەنگ و شیک پۆش بەبەرگى کوردى یەوە و ،خاوەنى سیمایەکى زۆرجوان و میهرەبان و ناسراوبوو،بەڵام لەو ڕۆژەدا هەستم بەبێتاقەتى و بێهێزى دەکرد و بەسیماى دا دیاربوو کە ئەو هێزو توانایەى جارانى نەماوە ، چونکە سەرەتاى توشبوونى بوو بەو نەخۆشیە مەترسیدارە ،
بۆمن جێگەى خۆش حاڵى بوو کەئەو ڕۆژە لەخزمەت کاکە حەمە و خانەوادەکەیى و هەموو ئامادەبووانى ئەو مەراسیمى ڕێزلێنانە دا بووم ،هەروەها لەجێى هونەرمەندوهاوڕێ و هاوسەنگەرى کاکە حەمەجەزا هونەرمەند ( ناسرى ڕەزازى ) بەداخەوە ئەوکاتە لەهەندەران بوو ، چەپکە گوڵى ڕێز و خۆشەویستى و وەفادارى پێشکەش بەکاکە حەمەجەزا بکەم و لەئامێزى بگرم ،
بەختم باشى هێنابوو وە سەربەرزم بەوەى کەلەنزیکەوە چەندجارێک لەخزمەتى ئەو مرۆڤە گەورەو ڕووح سپییە دا بووم و چەند جارێک قژە ڕەش و جوانەکەیم بۆ تاشیوە ،هەرگیز ئەو ڕۆژانەم لەیاد ناچێت ،بۆساتێکى کەم لەخزمەتی ئەو هونەرمەندە ئازیزە دا بووم ،
بەداخەوە هەواڵى مەرگى کاکە حەمە تاساندمى و لەناخەوە هەژاندمى ، نازانم چۆن گەیشتمە شارى سلێمانى ، بەدرێژایى ڕێ قوڵپى گریانم دەهات و فرمێسک بەچاوانمدا ڕێچکەى بەستبوو ،ئەو ڕۆژانە دەهاتەوە یادم کە دەنگى ئەو هونەرمەندە زیاتر بە هۆنراوەکانى ( هێمن و عەبدوڵا پەشێو ، شێخ ئەنوەر و شەهید مەلاعەلى و شەهید دڵشاد مەریوانى …. تاد ) ئاشناى دەکردین و بەسروودەکانى پیرۆزى خاکى کوردستان و پێشمەرگەى لەلا گەورەترو شیرینتر دەکردین ، و هەستى نیشتمان پەروەرى لەناخماندا دەچاند و پێى دەوتین یەک دەست بن و ئەم خاکە پێویستى بەهێزو بازووى ئێوەیە و نیشتمان و خاک و ئاوى وڵاتەکەتان خۆش بووێت ،بیرم لەوتە خۆش نەستەقەکانى دەکردەوە ، دەگەڕامەوە بۆ ئەو هەست و زەوقە جوانەى بەرامبەر بە ئامادەکردنى خواردن هەیبوو ،
کاتێک گەیشتمە مزگەوتى شێخ قادرى چوێسەو هاوشارییەکانم دى خەم و پەژارە باڵى بەسەر ئاسمانى شارو مزگەوتى ناوبراودا کێشابوو ،هەموو غەمناک و چاو بەفرمێسک بوون و لەناویەکدا دڵنەوایى و سەرەخۆشیمان لەیەکترى دەکرد ، چونکە هونەرمەند حەمەجەزا تەنها موڵکى بنەماڵەى ( حاجى عەلى بەگ ) و خانەوادەکەى نەبوو بەڵکو موڵکى ئێمە و هەمووان بووموڵکى هەموو میللەتی کورد بوو ، پاشان بەرەو گردى شێخ مارف لەگردى سەیوان و بینینى ئەو هەموو جەماوەرە غەمبارو ئازار چەشتووە ،لەتەواوى کوردستانەوە ئامادەى مەراسیمى بەڕێ کردن و ماڵئاوایی لە هونەرمەندى گەل و پێشمەرگەى شۆڕشەکانى کورد بوون ،
بەیەکێک لەهاوڕێ نزیک و خۆشەویستەکانى کاکە حەمە جەزا بەناوى کاک ( عەتاى بازرگان) وتم: کاک عەتا بنواڕە ئەو خەڵکەزۆرە لەهەموو چین و توێژەکانى تێدایە ، هونەرمەند بەهەموو بوارەکانیەوە ، پێشمەرگەى دێرین و هاوسەنگەرانى ، هاوڕێ نزیکەکانى و جگە لەخەڵکانى ئاسایى ،
هەزارجار ڕەحمەتت لێبێت و ڕووحت شاد کاکە حەمە بۆمێژووە جوانەکەت ، بۆ مێژووە پڕ سەروەرییەکەت بۆ کارو ڕەفتارە جوانەکانت ئافەرین بۆ تۆ حەمە جەزا بتوانى خۆشەویستى خۆت بخەیتە نێو دڵ و دەروونى ئەو هەموو مرۆڤەوە ،کە لەهەموو چین و توێژەکانى میللەتەکەم پێکهاتبوو ، ئەوکاتە زیاتر میللەتەکەم لەلا خۆشەویستر و ئازیزتربوو شانازیم دەکرد کەتاکێکى ئەم گەلەم و نەتەوەکەم ئەوەندە خەمخۆرى کەسەئازیزەکانیەتى و بەپەرۆشەوە بەرەو دونیاى فانى بەڕێى دەکەن ،
بەڕاستى نەتەوەکەم سەلماندیان لە بەخاکسپاردن و مەراسیمى پرسە لەمزگەوت لەشارى سلێمانى و شارى هەولێر و تەواوى کوردستان و هەندەرانیش ، کە چەند بەئەمەک و بەپەرۆشن بۆ لەدەستدانى ئەو کەڵە هونەرمەندە ،و زامێکى گەورەى خستە نێو دڵى هەمووان ، میللەتەکەم جێکەى شانازین و وەک خودى خۆم سەرى ڕێز و خۆشەویستى لەبەردەم تاک تاکى نەتەوەکەم لەبچوک تا گەورە دادەنەوێنم ،
چۆن لەمەراسیمى ڕێزلێنانەکەى کاکە حەمە چەپکە گوڵى خۆشەویستیم پێشکەش کرد ، ئەمجارەش بەداخەوە لەجێى هونەرمەندى ئازیز کاکە ناسرى ڕەزازى کە ئەو کاتیش لەشارى سلێمانى نەبوو و گەڕابۆوە بۆ وڵاتى سوید ، چەپکە گوڵى گەورەیى و ماڵئاوایم لەسەر گڵکۆکەى کاکە حەمە جەزا دانا ، ئەوەندە دەڵێم بەداخەوە هێشتا زۆر زوو بوو بۆ کۆچى دوایى حەمە جەزا
لەگەڵ بڵاوبوونەوە ئەو هەواڵە ناخۆش دڵتەزێنە، لەڕێگەى ڕۆژنامەو گۆڤارو سایتەکانەوە لێرەو لەوێ چەندین بابەت لەسەر کۆچى دوایى هونەرمەند و پێشمەرگە حەمەجەزا بڵاوکرایەوە و هەریەک لەڕوانگەى خۆیەوە خوێندنەوەى بۆ کەسایەتى ئەو هونەرمەندە کردووە ، چى لەبارەى ئەو هونەرمەندە گەورەو خۆشەویستەوە نوسرابێت هێشتا کەمە لەئاست مێژووى هونەرى و خەباتە ڕەواکەى لەنێو بزووتنەوەى ڕزگاریخوازى گەلەکەیدا ، چونکە زۆر لایەنى جوانى شاراوە لەژیانى ئەو پیاوەدا ماوە هێشتا پەى پێ نەبراوە ، دەست خۆش بۆ ئەو هەموو هەستە جوانانە بۆئەو خامە بەبڕشتانە هەربژین ، بەڵام ئەوەى جێگەى داخە لەدەرگاى زۆر بوارى ژیانى کاکە حەمە دراوەو خراوەتە بەر دییەى خوێنەر ، بەڵام هاوکارێک و هاوڕێیەکى ژیانى هەمیشەیى ڕۆژە سەختەکان فەرامۆش کراوە و کەسێک ئاوڕى لەماندووبوونى ئەو کەسایەتیە خۆڕاگرو ماندوونەناس ونەفەس درێژە نەکردۆتەوە ،
هەرچەندە من لەمەراسیمى ڕێزلێنان لەکاکە حەمە جەزا لەناو هۆڵى پێشەوا پێشنیارم کردوو لەڕوو پێمووت تکایە ڕێگەم بدە با دەستەکانت ماچ بکەم (گولزار _خەپە ) خان ، بەڕێزتان زۆر گەورەیت و تۆ لەپشتى ئەو کەڵە هونەرمەندەوەیت و بەشێکى سەرکەوتنى ئەو هونەرمەندە دەگەڕێتەوە بۆ بەڕێزتان ..
گوڵزار خان جگە لەوەى هاوسەرى ئەو هونەرمەندە مەزنەبووە ،لەهەمانکاتیشدا دایکى شەش جگەرگۆشەکەى کاکە حەمە بووە ،هاوسەنگەرو هاوخەباتى بووە لەڕۆژە سەختەکاندا لەشاخ و لەناوچە ئازادکراوەکاندا ، هاوڕێى بووە لە دەربەدەرى و ئاوارەیدا لەناوەو و دەرەوەى کوردستان ، ئەو خاتوونە زۆر گەوەرەیە پشت و پەناو هاوکارو کارئاسانى کارى کاکە حەمە بووە ، هەروەها خانەدان و میوان بەڕێخەرى دیوەخانەکەى کاکە حەمەجەزا بووە ، لەهەموو ئەمانەش گرینگتر هەزار ڕەحمەت لەگڵکۆکەى ، حەمە جەزا هەمیشە سیماى خۆش گوزەرانى و ئاسوودەیى و بەختەوەرى لەسیماى ئەو پیاوە میهرەبانەدا بەدى دەکرا ، ئەوەش باکگراوندى بەختەوەرى ناو خانەوادەکەیى بوو ،زۆر سوپاس بۆ تۆ ئەى خاتوونى گەورەو و بەخشندە گوڵزار خان هەروەها سوپاس بۆ یەکەیەکەى جگەرگۆشەکانتان تەمەن درێژ بن و ئێوە هەمیشە سەربەرزن بەهۆى ئەو مێژووە گەورەیەى کە کاکە حەمە جەزا هونەرمەند و پێشمەرگە پێشکەشى نەتەوەکەى کرد ،
هەزاران سڵاو لەبنەماڵەو خانەوادەکەت …
هەزاران سڵاو لەهاوڕێ هونەرمەند و هاوسەنگەرەکانت ….
هەزاران سڵاو لەتۆى هونەرمەند و پێشمەرگە ، ماڵئاوا خۆشەویستى هونەر ى مەقام و گۆرانى و میوزیکى کوردى ، ڕووحە سپییەکەت شاد و بەهەشت دوا مەنزڵگات بێت .
