پێش چەند ساڵێک قسە لە سەرنێوانی هەردوو هونەرمەندی گۆرانیبێژ (هاوتا ئەسعەد و هۆزان دەروێش) دەکرا، هەریەکەو بەجۆرێک باسیان لە نێوانی ئەو دوو هونەرمەندە دەکرد و چەند بابەتێکی جۆراو جۆر لەسەر نێوانی ئەو دوو هونەرمەندە دەهاتە باسکردن، بۆ نموونە دەگوترا (هاوتا ئەسعەد) لەسەر پارە لەگەڵ هۆزان نێوانی تێکچووە، هەندێک جاریش دەگوترا لەسەر چەند بابەتێکی تایبەتی نێوانیان ئەو دوو هونەرمەندە کێشەیان بۆ دروست بووە، لەمیانەی بەدوا دەچوونێکی رۆژنامەی (رووداو) ویستمان ئەو بابەتە بۆ خوێنەرانمان روون بکەینەوە.
(هۆزان دەورێش) خەڵکی رۆژئاوای کوردستانە لە رێگەی (هاوتا ئەسعەد) لەساڵی (1997) هاتۆتە باشووری کوردستان، یەکەم ئەلبومی گۆرانی (هۆزان) لەلایەن (هاوتا) سەرجەم ئاواز و میلۆدیەکانی بۆ ئامادە کراو لە ساڵی (1996) بەناوی (ئەز هۆزانم) لەوڵاتی سوریا تۆمار کراوە و پاشان بەشێوەیەکی فراوان بڵاو کراوەتەوە، ئەو کاسێتە و چەند گۆرانییەکی دیکە، کە بەشێوەی (دووانە – دوێت) هاوشان لەگەڵ (هاوتا ئەسعەد) تۆماری کرد و ناوبانگی باشی پەیدا کرد.
دوای ئەوەی ئەو دوو هونەرمەندە لە ساڵی (2002)ـەوە لێکدابڕان و لەیەکتر دوور کەوتنەوە، قسەو باسێکی زۆر کەوتە ناو خەڵک و جەماوەری هونەریی گوایە لەسەر چەند بابەتێک هەریەک لە هونەرمەندان (هاوتا ئەسعەد و هۆزان دەروێش) لەیەکتری دابڕان.
یەکێک لە هاورێیە هونەرمەندە نزیکەکانی (هاوتا) کە نەیویست ناوی بهێندرێت بۆ (رووداو) گوتی : (هاوتا ئەسعەد) توانی خانمە هونەرمەند (هۆزان دەروێش) بهێنێتە کوردستان و بەشێوازێکی چاک فێری گۆرانی گوتنی بکات، چونکە ئەو کات (هۆزان) لەتەمەنێکی زۆر مناڵی دابوو، (هاوتا) توانی شەخسیەتیکی زۆر چاک بۆ (هۆزان) دروست بکات و نەهێلێت بچێتە هەموو شوێنێک گۆرانی بڵێت، من لە نزیکەوە ئاگادار بووم زۆری هەوڵی لەگەڵ دەدا تاتوانی ئەو (هۆزان)ـی لێ دروست بکات، بەداخەوە ئەوەی کە روویدا شتێکی چاوەڕوان نەکراو بوو، چونکە من تائێستاکەش باوەڕ بەو قسانە ناکەم کە بۆ ئەو دوو هونەرمەندە وەک ریکلامێکی بێ مانا بەکار هات، من پێم وایە ئێستاکەش بۆیە بەرهەمەکانی (هۆزان دەروێش) بێ هێزی پێوە دیارە، چونکە (هۆزان) تەنها دەتوانێ لەگەڵ (هاوتا) و ئاوازەکانی ئەو سەرکەوتوو بێ، ئەو ئەلبومەی لەگەڵ هاوتا بەرهەمی هێنا لەگەڵ ئەو گۆرانیانەی بەیەکەوە تۆماریان کرد، ئێستاکەش تامو چێژی ئەو گۆرانیانە وەکو خۆی ماوەو چەندیین جاریش بیستوومە (هۆزان) گوتویەتی دابڕانی من لە (هاوتا) دابڕان بوو لە هونەر و هاوڕێیەکی باشی هونەرییم.
لەم بارەیەوە هونەرمەند (هاوتا ئەسعەد) لە لێدوانێکی تایبەتدا لەسەر ئەم بابەتە بۆ (رووداو) هێنامانە ئاخاوتن و گوتی : من هیچ کاتێک بابەتێک بەناوی کێشە لە ژیانی خۆمدا نەبینیووە، لە نێوانی خۆم هیچ هونەرمەندێکی کورد، دەربارەی ئەو قسەو باسانەی نێوانی من و (هۆزان دەروێش) ئەوانەی باس کراون و گوتراون و یاخوود دەگوترێن، هەمووی تەنها بریتی بووە لە ریکلامێکی بێ مانا و بێ ناوەرۆک، ئەویش بۆ یەک ئامانج ئەو کارە رێکخرا کە بریتی بوو لە رووشاندنی شەخسیەت و ناوبانگی من و هونەرەکەم، کە چەند کەسێک هەڵسان و بوون بەکارکتەر و دەرهێنەر بۆ ئەو دراما بێ ناوە، کە بەداخەوە وایان زانی خەڵاتی نۆبل و ئۆسکاریان پێ دەبەخشرێت، نەیزانی ئەوەی چاڵ بۆ خەڵک لێبدات لەدوایی دا دەبێ خۆی لەناو چاڵەکەدا دەبینێتەوە، بەداخەوە من کێشەم لەگەڵ ئەو خانمە هونەرمەندە نەبووە، بەڵکو (هۆزان) وەک وەرقەیەک بەکار هێندرا لەبەرامبەر من، بەڵام من بۆیە هیچ کاتێک قسەم لەسەر ئەو بابەتە نەکردووە و بۆیەکەم جارەیش بۆ رۆژنامەی بەرێزی (رووداو) ئەو قسەیە دەکەم چونکە ماوەیەک دەبیستم لە دیدارە رۆژنامەوانییەکانی (هۆزان دەروێش) پرسیاری (هاوتا ئەسعەد)ـی لێدەکرێت، ئەویش بێ گوناهی خۆی دەردەخات و باسی پاکی نێوانی من و خۆی دەکات، بەڵام من هیچ کاتێک گرنگیم بەو بابەتە نەداوە، بەڵام بەداخەوە تازە (هۆزان) بەخۆی دەزانێ کە بۆچ مەبەستێک بەکار هاتووە و کردوویانە بە ئامانجێک بۆ گەیشتنی مەرامی چەند کەسێک، جگە لەوانەش بۆیە من هەمیشە ئەو بابەتم خستۆتە زبڵ خانەی مێژوو، چونکە تائێستا لەم وڵاتەی ئێمە نەم بینیووە هیچ مرۆڤێک لەسەر (پارە و ئافرەت) سزا بدرێت و پشت گوێ بخرێت، دیارە منیش (سوپرایزی) ریکلامەکەم بریتی بوو لە (پارە و ئافرەت)!، ئەو دوو بابەتەش لەخۆم شک نەبردووە تاوەکو چاوەڕێی سزاکەی بکەم، بۆ مێژوو ئەو قسەیە دەکەم من ئێستاکەش کەناڵی ئاسمانی کوردستانtv و سەرجەم هاوڕێیەکانم لەو کەناڵە گەواهی ئەوەم بۆ دەدەن، کاتێک من پۆستێکی ئیداری گەورەو فراوانم لەدەست بوو لەوکەناڵە، کە زۆر کەس خەونیان بە کورسی و پارەوە دەبینی، بەڵام سوپاس بۆ خوا من هاوتام کە (هاوتا)شبم، هەر بە هاوتا دەمێنمەوە هەر بە (هاوتا)ش لەسەر پێ دەبم.
(هاوتا) لەبەشێکی دیکەی قسەکانی دا گوتیشی : من ئێستاکەش کاتێک وانەی گۆرانی گوتن بە (کەژێ)ـی کچم دەڵێمەوە، ئەو ساتانەم بیر دێتەوە، کە ئاوا وانەی هونەرییم فێری (هۆزان) کردووە، ئەو کاتە هۆزان وەک ئێستای (کەژێ) وابوو، بۆیە من هەمیشە هۆزانم ئاوا سەیر دەکرد و سەیرم کردووە، ئێستاکەش من چەندیین ساڵە لە (هۆزان) دوورم، دیارە ئەو خەریکی ماڵ و حاڵ و ژیانی خۆیەتی و منیش خەریکی ژیانی خۆمم، ئیتر ئازادە چۆن قسەدەکات و چی دەڵێت لەبارەی منەوە چی هەیە دەتوانێ راشکاوانە قسەی لەسەر بکات، بەڵام دەبێ ئەوە چاک بزانێ ئەوانەی نان و پیازیان بەو بابەتەوە خواردووە رۆژێک دێت ئەزانم چۆن بەچ شێویەک باسیان لێوەدەکەم، لە رێگەی ئەم رۆژنامەوە رایدەگەینم کتێبێکم لە بەردەست دایە، سەرجەم یاداشت و بەسەرهاتەکانی خۆم نووسیوەتەوە، لە شێوەی رۆمانێکدا بڵاوی دەکەمەوە، ئەوانەی چاکەو خراپەیان لەئاست مندا کردووە، کار ئەکتەری سەرەکی ناوەرۆکی رۆمانەکەی (هاوتا ئەسعەد) دەبێ و بە شێوەیەکی بەرچاو بۆ مێژوو دەیانخەمە بەردەستی خوێنەران.
پاشان هونەرمەند (هۆزان دەروێش) بەم شێوەیە بۆ (رووداو) هاتە ئاخاوتن و گوتی : من هەمیشە شانازی بەو ساتانە دەکەم، کە لەگەڵ هونەرمەندی گەورە و مامۆستام (هاوتا ئەسعەد) کاری هونەرییم ئەنجام داوە، (هاوتا) هاوشان لەگەڵ (عوسمان)ی برام ئەگەر ئەوان نەبونایە مەحاڵ بوو ببم بەو هۆزانەی ئێستاکە گۆرانی بلێم بەو شێوەیە، بەداخەوە خەڵکی زۆر بەهەڵە باسی من و (هاوتا) دەکەن، (هاوتا ئەسعەد) ئێستاکەش لەلای من و بنەماڵەکەم گەورەترین رێز و پایەی خۆی هەیەو هەرگیز لەیاد نەکراوە، بەداخەوە زۆرکەس هاتن بەهەڵەو چەند قسەیەکی هەڵبەستراو لەنێوانی من و هونەرمەند (هاوتا ئەسعەد) دروست کرد، کە هیچ ئەساسێکی نەبوو، ئاخر ئێمە هونەرمەندین هەر ئێمە دەزانین رێزو پایەی یەکتریمان تاکوێ بۆ یەکتری داناوە، من دڵینام ئەگەر ئێمە هونەرمەند نەبونایە و کاک (هاوتا)ـش خاوەنی ئەو پێگە هونەرییە بەهێزە نەبوایە هەرگیز ئەو قسانەیان بۆ هەڵنەدەبستین و ریکلامی ئاوا بێ مانایان بۆ نەدەکردین.
لە کۆتایی دا (هۆزان دەروێش) گوتی : من ئەگەر ماوەی چەند ساڵێکە لە هونەرمەند (هاوتا ئەسعەد) دوورین لەیەکتری بەڵام هەمیشە ئاگاداری کار و پرۆژە هونەرییەکانیم و هیوای سەرکەوتنی بۆ دەخوازم، ئومێدەوارم جارێکی تر لەچەند کارێکی هونەریی دا یەکتر بگرینەوە بۆ ئەوەی چیتر خەڵک قسە و باسی بێ مانا بۆ نێوانی من و هاوتا دروست نەکات، چونکە من (هاوتا ئەسعەد) بە هونەرمەندێکی گەورەو زۆر لێزان دەزانم لەکاری هونەریی دا، ئێستاکەش هونەری هاوتا بە هونەرێکی تاک و شاز دەزانم.
