( جەمالى دەلاک ) :دەگمەنن ئەو کەسایەتیانەى کەهەمیشە لەبیرى نەتەوەکەیان دان و بەردەوام دەڕواننە بەرژەوەندى یە گشتییەکانى میللەتەکەیان ، بە کردەوەش سەلماندوویانە و کاریان کردووە لەپێناو پێشکەوتن و سەرخستنى ئاوات و ئامانج و بەرژەوەندییە باڵاکانى ەتەوەکەیان ،چ جاى ئەو کەسایەتیە لەهەر پلەو پێگەیەکى کۆمەڵایەتی دابووبێت ،
لەڕێکەوتى (22/5/2010) مرۆڤێکى جوان و کەسایەتیەکى بەهرەمەند و داهێنەر و نیشتمان پەروەر و عاشق و خەمخۆرى هونەرو کلتوورى نەتەوەکەمان کاکە (عیرفان زەنگەنە ) بۆ هەمیشە چاوى لێک ناو ماڵئاوایى لە هونەرو هونەرمەندانى کوردستان کرد ،
بەشەرەفێکى گەورەى دەزانم لەساڵى (2002) وە لەنزیکەوە ئاشنایەتى و دۆستایەتیم لەگەڵ کاکە عیرفان دا هەبووە ، لەیەکەم دیدارم کە بەخزمەتى ئەو کەسایەتیە هەست ناسک و لێوان لێوە لەجوانى یە گەیشتم هەستم بە خۆشحاڵى و کەیف خۆشى دەکرد و سوپاسگوزارى یەزدان بووم کە نەتەوەکەم لەو شێوە مرۆڤانەى تیادا هەڵکەوتووە ،بەداخەوە کاتێک هەواڵى کۆچى دوایى کاک عیرفانم بیست ،زۆر سەخت بوو باوەڕبکەم چونکە هێشتا زۆر زوو بوو بۆ میللەتەکەم و هونەرو هونەرمەندان ئەو کەسایەتیە خەمخۆر و بەنرخە لەدەست بدات و ئەو کەلێنە گەورەیە دروست بکات ،
لەلاپەڕەکانى مێژووى شارى سلێمانیدا کەسایەتیەک کە هەمیشە جێگەى ستایش و ڕێزو حورمەتە و مێژوویەکى بۆ خۆى تۆمارکرد ،ئەو مرۆڤە لەڕۆژە ڕەش وسەختەکانى سەرەتاى سەدەى پێشوو لەشارى سلێمانیدا گەورەترین بەخشش و هاوکارى و وەفادارى بەرامبەر دانیشتوانى شارى سلێمانى نواندووە ئەویش ( کەریمى ئەلەکە) یە ڕووحى شادبێت ، جارێکى تر مێژوو خۆى دووبارە کردەوە بەڵام لەسەرەتاى سەدەى بیست و یەک دا مرۆڤێکى بەخشندەو میهرەبان و داهێنەرو ڕچەشکێن و بوێر و خەمخۆرى نەتەوەکەى ،لەشارە دێرینەکەى کەرکوکەوە ،بەهەست و سۆزێکى بێ وێنەى مرۆڤ دۆستانەوە دواى تەمەنێکى زۆرى ئاوارەیى و دەربەدەرى و چەشتنى سەختى ژیان ، لەهەولێرى پایتەختى کوردستانەوە هاتەوە مەیدانى تێکۆشان و خزمەتکردن بەبوارى بازرگانى و خزمەتگوزارى و گەشتیارى،
عیرفان زەنگەنە لەکاتێکدا وەک سەرمایەدارێکى کورد سەروەت و سامانەکەى خستە گەڕو ئۆتێل ( چوارچرا ) ى بنیاتنا سەردەمێکى زۆر گرینگ بوو بۆنەتەوەکەمان ، ئوتێلى چوارچرا جیا لەوەى کە شوێنێکى حەوانەوە و پشوودانى میوانان بوو ، بەڵام درەختێکى گەورەو پڕبەرهەم و خاوەنى سێبەرێکى زۆر گەورەبوو ، هەرکەسێک پێویستى بەپشوودان و ئاسوودەکردنى ڕووح بووایە ئازادبوو لەژێر سێبەرى دارە گەورەکەى چوارچرا دا بارگەى بخات و پشووبدات ، کاکە عیرفانى ڕووح سووک و دەم بەخەندە لەناخەوە باوەشى سۆزو خۆشەویستى بۆ دەکردەوە ،
عیرفان زەنگەنە سەروەت و سامانەکەى لەپێناو خزمەتکردن بە هونەر و هونەرمەندانى نەتەوەکەى بەگەڕخست ،و کۆمپانیاى چوارچرا لەماوەى دروستبوونیەوە دەرگاى ئاوەڵا کردبوو بۆ ئەو هونەرمەندانەى کەمەبەستیانە خزمەت بەهونەرى ڕەسەنى نەتەوەکەیان بکەن ،کارەکانیان گەواهى ئەو ڕاستیەن ،دەبێت هەمیشە بەڕێزو بەنرخەوە لەستافى کۆمپانیاى چوارچرا بڕوانین ،
خۆشەویستى کاکە عیرفان بۆ پیشەکەى و هونەرو هونەرمەندان ، چوارچرا ببووە پێگەى بەیەک گەیشتن و کۆبوونەوەى هونەرمەندان و ئەدیبان و نوسەران ،واتە چوارچرا ماڵە گەورەکەى هونەرمەندان بوو ،
ئەوەى زۆر جێگەى هەڵوەستەلەسەرکردنە لەسەر کەسایەتى ئەو مرۆڤە هەردەم زیندووە هەمیشە پڕبوو لەهیواو ئاوات ،و بەردەوام لەئاسۆى دەڕوانى و کاتێک لەگەڵییدا دەدوایت ووزەیەکى پڕ هیواو ئاواتى پێدەبەخشیت و هەرگیز نەیدەهێشت بێ ئومێدى لەناخى بەرامبەرەکەیدا بڕوێنێ ،
هەرچەندە من هیچ سوودێکم لەو مرۆڤە بەخشندە و میهرەبانە نەدیوە ، بەڵام بۆ هەمیشە خۆم بەقەرزاربارى ئەو مرۆڤە گەورەیە دەزانم چونکە گەورەترین خزمەتى بەهونەرو هونەرمەندانى نەتەوەکەم کردووە ، دەستگیرۆیى و هاوکارى و هونەرمەندانى کردووە بۆ بەدیهێنانى ئاوات و ئامانجەکانیان ،
ڕاستە کاکە عیرفان داهێنەربوو بەڵام داهێنەرێکى بەسەلیقەو کەم وێنە ،هەمیشە لەبیرى داهێنانى نوێ و جوان لەپێناو خزمەتکردن بەمرۆڤایەتى و هونەرو نەتەوەو ئاڵاى وڵاتەکەیدا بووە ،بەڵام بەداخەوە مەرگ بوارى نەدا هەگبە لێوانلێوە لە داهێنانەکانى پێشکەش بەنەتەوەکەى بکات ، دواى چل ڕۆژ تێپەڕبوون لەمەرگى ناوادەى عیرفان زەنگەنە ، جارێکى تر بەهەستە جوان و داهێنانە بەنرخەکانى هاوڕێ و هاوکارە دڵسۆزەکانى لەمەراسیمى چلەکەیدا جوانترین و گەورەترین چەپکە گوڵى داهێنان و ڕێزلێنانى شایستە ئەنجامدرا ،بەبەخشینى خەڵاتى کاکە عیرفان بەهونەرمەند و شانۆکارو ئەکتەر و داهێنەرانى میللەتەکەمان ، دەستتان خۆش ئەندامە دڵسۆزو بەئەمەکەکانى لیژنەى چلەى کاکە عیرفان ، بەڕاستى سەلماندتان کە هاوڕێ و دڵسۆزو درێژەپێدەرى ڕێگا پیرۆزەکەى عیرفان زەنگەنەن ،
ئامادەبووانى مەراسیمى چلەى کاکە عیرفان کە لەهەموو بەشەکانى کوردستانەوە زەحمەتیان کێشابوو، ئەوەیان سەلماند ئەو مرۆڤە چەند گەورەیە و چ زامێکى گەورەى لەنێودڵى هەموواندا جێهێشتووە ،دەستى ماندووبوونى یەکەکەى بەشداربووانى چلەى کاکە عیرفان بەڕێزەوە دەگووشم سەرى ڕێزو خۆشەویستى لەبەردەم ئەندامانى لیژنەو تەواوى بەشداربووان دادەنەوێنم ،
دەبا هەموومان هەمیشە وتە بەنرخەکەى کاکە عیرفانى هەردەم زیندوو لەبیرنەکەین و بیکەینە سیمبولێک بۆ خۆشەویستیى و بەگەورەیى بڕوانینە نەتەوەکەمان کە دەڵێت ((ئەم ئاڵایەپیرۆزترین بەهاى نەتەوەکەمانە ، پێویستە هەموومان شانازى پێوەبکەین و بەردەوام بەرز ڕایبگرین ))
دڵسۆزى و خەمخۆرى کاکە عیرفانى نیشتمان پەروەر و هونەردۆست ،شیعرێکى شاعیرى گەورەو نیشتمان پەروەرو تێکۆشەرى گەلەکەمان (( کامەران موکرى )) هێنایەوە یادم کە دەفەرموێت :
(( ژین لەلاى دڵسۆز هەرتێکۆشانە
هەوڵەبۆخاکى ئەم کوردستانە
خۆزگە ئەندازەى ژیان و تەمەن
تێکۆشان بوایە بۆخاکى وەتەن
ئاخۆتەمەنى کام دڵسۆزى کورد
لەچوار، پێنج ساڵى تێپەڕئەکرد ))
خوات لەگەڵ دڵسۆزو خەمخۆرى هونەرو هونەرمەندانى نەتەوەکەم ، ڕووحت شادبێت ،گڵکۆکەت پڕنوورو ، چوارچرا ماڵە گەورەکەى هونەرمەندان هەمیشە ئاوەدان و شەکاوەبێت ئاڵا پیرۆزەکەى کوردستان ،
