پرۆفیشناڵ دراماو تیڤییەكان

مەسعودی مەلا هەمزە: دراما ئەو هونەرە گرنگ وكاریگەرەیە كە جیا لە هەموو بەشەكانی دیكەی هونەر خۆی دەخزێنێتە ناو ماڵان، سەردەمانێك بینەری كورد عەوداڵی بینینی درامایەكی كوردی بوون، ئەوە لە كاتێكدا بوو كە وێڕای ئەوەی سەتەلایت و ئامێری پێشكەوتوو بوونی نەبوو، كەچی بەهەمان شێوەش لەبەر نەبوونی ئیمكانیاتی تەكنیكی هونەرمەندانی كورد نەیاندەتوانی لە ئاست داخوازییەكانی بینەری كورد بن و دراماگەلێكیان پێشكەش بكەن، كە تینوێتیان ببشكێنێ‌، وێڕای ئەوەی لەو سەردەمەدا هەندێ درامای كوردی بەرهەم هاتوون و تا ئێستاش جێ پەنجەی خۆیان لەناو بینایەی هونەری كوردی جێ هێشتووە.

لەو ساڵانەی دواییدا هیچ بابەت و شتێكی غەیرە كوردی بەقەد دراما دۆبلاژكراو و ژێرنووسەكان نەخزاونەتە ناو خێزانی كوردی، ئەوەش پرسیارگەلێكی دروست كردووەو خەڵكانێك هەن عەوداڵی ئەوەن هۆكارەكانی ئەو بەربڵاوی و خزانە بزانن.

بەر لەهەموو شتێك دەبێ بپرسین وێڕای ئەوەی ئەمڕۆ ژمارەی كەناڵە كوردییەكان لەزۆربووندایە، وەلێ‌ بۆچی درامای نوێ بەرهەم ناهێنرێ، یا كەمن ئەو درامایانەی بەرهەم دەهێنرێن و جەماوەرین.

لێرەدا من هەقێك بە كەناڵە كوردییەكان دەدەم لەوەی ئەوان دەخوازن زۆرترین بینەر بۆیان پەلكێش بكەن، جا ئەوە چۆن و لە چ رێگایەك دەكرێ، بێگومان لەرێگای كاری جەماوەری، بەو پێیەشی بەشی هەرە زۆری ئەو درامایانەی لە ئێستادا كەناڵە كوردییەكان دۆبلاژی دەكەن جەماوەرین، بۆیە دەتوانم بڵێم لە 80%ی جەماوەری ئەو كەناڵە كوردییانە لەرێگای دراما دۆبلاژكراوەكانەوە پەیدا بوونە، لەوەش سەیرتر ئەوەیە كە زۆرجار لەبەرنەبوون یا دەستنەكەوتنی درامای نوێی جەماوەری كەناڵەكان پەنا بۆ درامای كۆنی جەماوەری دەبەن، كە ئەو درامایانە لە دەیەكانی كۆتایی سەدەی بیستەم نمایش كراون، دیارە ئەوەش هۆكارێكی گرنگی پەلكێش كردنی جەماوەرە بەرووی تەلەفزیۆنەكان.

لێرەدا پرسیار ئەوەیە كە بۆچی هونەرمەندانی كورد تا ئێستا نەیانتوانیوە وەكو پێویست درامای ئاست بەرز بەرهەم بهێنن، ئایا حكومەت هۆكارە یان ئەوە خودی هونەرمەندان خۆیان هۆكارن؟

بە بڕوای لەڕووی دابینكردنی بودجەوە حكومەت خەتابار نییە لە بەرامبەر ئەوەی كە هونەرمەندان خەتابارن، چونكە هەر ئەو سەتەلایتی نەورۆزەی برادەرێكی فەرمانبەریان كە زۆر بە كەمیش دەوامی دەكرد و هەر مووچەی وەردەگرت باسی لە داهێنانەكانیان دەكرد، كەچی ئێستا 13 دراما لەناو چەكمەجەی ئەو سەتەلایتە كەوتووەو ئەوە هونەرمەندانن بە سەدان ملیۆنیان لە پارەی حكومەت وەرگرتووەو بەرهەمەكانیشیان شیاوی نیشان دان نین و رووی جەماوەریان نییە، چونكە ئێستا بینەری كورد چاوی كراوەتەوەو وەكو جاران ناچار نییە سەیری هەموو درامایەك بكا.

دوا قسەكانم پرسیارێكە: لە كاتێكدا ئاگادارم كە تەلەفزیۆنی ناوخۆ هەیە بە دەفتەر دۆلاری لە كڕینی درامایەكی دۆبلاژ خەرج كردووە، ئایا دەبێ هەمان ئەو تەلەفزیۆنە ئامادەبێ ئەو پارەیە لە بەرهەمهێنانی درامایەكی چاكی كوردی خەرج بكا، یان ئەوە تەلەفزیۆنە كوردییەكانن خویان گرتووە بە كڕین و نمایشكردنی درامای دۆبلاژی غەیرە كوردی.