راپ یەکێکە لەو ستایلە هونەرییە نوێیانەى کە ئەمڕۆ لە دنیادا باوەو خەڵکانێکى زۆر هەن خەریکى ئەو هونەرەن و جەماوەرێکى زۆریشی هەیە، بەڵام ئەوەیان زیاتر لە رۆژئاوا باوە، وەلێ لەو ساڵانەى دواییدا خەریکە ئەو هونەرە پەل دەهاوێتە کوردستان و لێرەش هۆگرگەلێکى بۆ خۆی پەیدا کردووە، کە باس لەو جۆرە هونەرە دەکەم، پێتان وانەبێ پاشکەوتووم و لەگەڵ ئەوەنیم ستایلە نوێکانى هونەر پەل بهاوێتە کوردستان و هونەرى کوردیش پێشکەوتن بەخۆیەوە ببینێ، کە بەبڕواى من پێشکەوتنى هونەرى کوردى لەوەدا نییە راپ و پۆپ لە کوردستان زۆربێ، بەقەد ئەوەى کە پێویستە هونەرمەندانى کورد کار لە میلۆدی و بەرهەمى فۆلکلۆری کوردى بکەن و لە فەوتان و دزین رزگارى بکەن.
ئەوەى لێرەدا گەرەکمە باسی بکەم، سازکردنى مەراسیم و فێستیڤاڵی نەورۆز بوو، کە خۆشبەختانە ئەمساڵ لە شارى هەولێر پارێزگاى هەولێر بەشێوەیەکى جوان و رێکو پێک رێکى خستبوو، کە تێیدا چەندین چالاکى جۆراو جۆری جوانى هونەرى پێشکەش کرا، وێڕاى هەموو شتە جوانەکان شتێک لام بووە پرسیار و خۆی قووت کردەوە، کە بۆچی دەبێ لە مەراسیمى نەورۆزدا بەرهەمى راپ پێشکەش بکرێ، ئایا دەبێ کاتى خۆی زەردەشت راپەر بووبێ و راپی کردبێ؟
دواى گەڕانێکى زۆر لەناو سەرچاوە مێژووییە باوەڕپێکراوەکانى کوردى و بیانى و عەرەبی، گەیشتمە ئەو قەناعەتەى کە زەردەشتى مەزن لە سەردەمى خۆیدا یەکێک بووە لە راپەرە هەرە بە تواناکانى جیهان و بەردەوام بۆ ئارامکردنەوەى رۆحى خۆی راپی کردووە، لەوەش گرنگتر ئەوەبوو کە ئەو سەرپەرشتى زیاتر لە 40 تا 50 گروپی راپی کردووەو بە شێوەیەکى راستەوخۆ ئەو گروپانە لەژێر کۆنترۆڵی ئەو بوونە، هەروەکو گەیشتمە ئەو راستییە مێژووییەى کە باوکە گەورەى یەکێک لە ئەندامانى فێستیڤاڵی نەورۆز کە ئێستا لە پارێزگاى هەولێر دەوام دەکا، ئەندامێکى چالاکى ئەو گروپە بووەو بۆ وەدیهێنانى خەونى زەردەشت و برەو دان و بەردەوامیدان بەو هونەرە کوردییە رەسەنە، ئەمساڵ پارێزگاى هەولێر لە فێستیڤاڵی نەورۆز دوو گروپی راپیان داوەت کردبوو، تاکو رۆحى زەردەشتى گەورە پیرۆز رابگرن.
ئیتر هیوادارم نەتەوە یەکگرتووەکانیش بە بڕیارەکەى خۆیدا بچێتەوەو ئەوە بزانێ کە راپ یەکێکە لە خاسیەتەکانى نەورۆز، هەروەک چۆن پارێزگاى هەولێر لە فێستیڤاڵی ئەمساڵ بایەخێکى زۆر باشی بەو هونەرەدا بوو، بەڵام هەڵەیەکى بچووکیان کرد ئەویش چەند بەرهەمێکى کوردیان نمایشکرد، ئەگینا زۆر راستە راپ دینگەى سەرەکى نەورۆزەو پێویستە لە ساڵانى داهاتوو پارێزگاى هەولێر بیکاتە بڕیار، کە لەهەر شوێنێک ئاگری نەورۆز کرایەوە دەبێ چەند بەرهەمێکى راپیش پێشکەش بکرێ.
مەسعودى مەلا هەمزە
