حەز دەکەم بەڕێز (ئیسماعیل مەحەمەد) ئەم وەڵام دانەوەی من، وەک دیمانەکەی کە ئەنجامی دا لەگەڵ هەفتەنامەی “هونەری هەولێر”، کە بە ئاماژە کردنی بۆ هونەمەرندی دەنگ رەسەن (هاوتا ئەسعەد) کرد، دەخوازم ئەم وەڵامەی من وەک ئاماژەکەی خۆی بە سەقەت وەرنەگرێ
دیارە نووسەر وەیان شاعیر یاخوود رۆژنامەنووس ئەگەر بەرامبەر هاوشانەکەی خۆی دەربڕینێکی دەربڕی، واباشە ناوبراو بە شێوازێکی وێژەیی و بە زمانێکی (ئەدەب) پێشوازی لەم ئاخاوتن و وتووێژە بکات. کاتێک ژمارەی (14)ـی ئەم هەفتەیەی “هونەری هەولێر”ـم خوێندەوە، دیمانەیەکی بەڕێز (ئیسماعیل مەحەمەد)ـی تێدا بوو، لەم دیمانەیەدا هەندێ ساتمەو هەنگاوی درشت و لا بەلام تێدا بەدی کرد، لە ڕاستی دا پێویستە ئەوەی چاوپێکەوتی لەگەڵ دەکرێ وەڵامەکانی لە خودی هیجر و زمانی نووسین دەربچێت، بەڵام من وای دەبینم یەک لە پرسیارەکانی، کە ئاراستەی بەڕێز (ئیسماعیل مەحەمەد) کرابوو، دیمانەکار راستەوخۆ حکومێکی لە تاریکستانەوە داوە، وەیان بەبێ ئاگایی و وەیاخوود لە ژێر فشارێکدا ئەم پرسیارەی وروژاندووە، کە دەپرسێت (بەرنامەی ئەژدەر شۆوی کەناڵی ئاسمانی کۆرەک میوانداری هونەرمەند (هاوتا ئەسعەد)ی کرد و هەر لەو بەرنامەیەدا ناوبراو بێ ئەوەی ئاماژە بەناوی تۆ بکات، چەند شیعرێکی تۆی دەستکاری کردبوو؟).
یەکەم کە دەڵێ هونەرمەند (هاوتا ئەسعەد) ناوی (ئیسماعیل مەحەمەد)ـی نەهێناوە، منیش دەڵێم دیارە لەو کاتەدا کارەبا شۆرتی کردووە و وەیان ئەو بەڕێزە بە بابەتێکی ترەوە سەرقاڵ بووە، دەنا هونەرمەند (هاوتا ئەسعەد) زۆر رێز و ستایشی بۆ کاک (ئیسماعیل) دانابوو، ناویشی هێناو بەوەش نەوەستا گوتی : (هەر لێرەوە هەردوو چاوەکانی ماچ دەکەم) بۆ ئەوەی ئەو راستیەی من لەلاتان ئاشکرابێ دەتوانن سەیری بەرنامەکە بکەن کە ئێستا لە بازاڕەکاندا هەیە و دەفرۆشرێت.
دووەم دیسان دەڵێت دەستکاری شیعرەکانی تۆی کردووە، بەتایبەتی (ماڵێک بۆ خۆشەویستی) جا وەڵامی دروست دیسان لە بەرنامەکەدا دەستان دەکەوێت، کە بەهیچ جۆرێک دەستکاری تێکست نەکراوە، تەنها ئەوە نەبێت کە جارێک باسی (نیشتمان) دەکا و جارێکی تریش وشەی جوان و رێزدار (کوردستان) ئاماژە دەکات
کە دەبوایە ووشەی (کوردستان) کە هەموو نیشتمانی کورد دەگرێتەوە، لە ئەسڵی شیعرەکەدا شاعیر هەر ئاماژەی بە ووشەی (کوردستان) بکردایە، چونکە (شەهید و ئەنفال) تەنها لە نێو کارەساتی (کوردستان) پەیکەرێکی زێرینە و دەبێ تەنها (کوردستان) دایکی (ئەنفال و شەهید) بێ.
ئێمە تائێستا بە عێراقەوە بەستراوین، ئەگەر بڵێین نیشتمان هیچ جۆرە ئاماژەیەک بۆ خاکی خۆمان نەکەین، لەوانەیە ئیمرۆ ووشەی (نیشتمان) سەرتاسەری عێراقیش بگرێتەوە.
برای رۆژنامەنووس لە (ئیسماعیل مەحەمەد) دەپرسێت (ئاخۆ دەکرێ بزانین تاچەند ئاگادارییت لەوەی کە شیعرەکانی تۆی کردووە بەگۆرانی و هیچ پەیوەندییەک هەیە لە نێوانتان؟)
بەڕێز (ئیسماعیل مەحەمەد) من هیچ پەیوەندییەکم لەگەڵ هونەرمەند (هاوتا ئەسعەد) نیە و دوای ئەوەش کە شیعری کردووم بە گۆرانی هیچ پرسێکی پێ نەکردووم، جێگای سەرسوڕمانە بەڕێز کاک (ئیسماعیل) وەڵامێکی ئەو تۆی داوەتەوە، کە نەدبوایە شاعیر یا نووسەر ئەم وەڵامە بەخەونیش بدرکێنێ، چونکە ئەمە شتێکی روون و ئاشکرایە (هونەر و ئەدەب) دوو تای تەرازوون کە راستیەکان هەڵدەسنگێنن.
(هونەرمەند و ئەدیب) دوو مەحەکی بێ فرو فێڵن، چەوتی و راستی بە بێژینگی رۆح تاو توێ دەکەن، کە وا بێ چۆن (ئەدەب و هونەر) دوو دەستی کارمایی واقیع و ژیانن..!!
ئەوەتانێ (ئەدیب و هونەرمەند)ـیش دووچاوی تیژ رەو و دوو گوێچکەی هەستیارن، کە هیچ سنوورێک نیە بۆ ئەم دووانە، لەم سەر و ئەوسەری دونیا، بە چریکە و بە قەڵەم کاکڵەی ژیان دەست نیشان دەکەن و هەستە ناسکەکان ئاوێتە دەکەن و دونیای بەیەکەوە ژیان بۆ خۆیان و بۆ دەستەی داهاتووش دروست دەکەن.
بەڕێز کاک (ئیسماعیل مەحەمەد) دەڵێ من هیچ پەیوەندیەکم لەگەڵ هونەرمەند (هاوتا ئەسعەد) نیە و ئەمە حەقیقەتە، ئایا ئەگەر (شاعیر و هونەرمەند) رووبەر و وەیان بەهۆی پەیوەندی گرتن و وەیان راستەوخۆ هیچ جۆرە پەیوەندییەکی راشکاوانەیان نەبێ، ئەی باشە ئەم دوو کەسە پەیوەندی رۆحیان لەگەڵ یەکتر نیە؟؟!!.
ئایا تەواو کاری یەکتر نین ؟! ئایا بەیەکتری ژیان لار و لەنگ نابێ ؟!
کەواتە کاک (ئیسماعیل) یان دەبێ لە دونیای (ئەدەب و هونەر) پەیوەندی لەگەڵ کەس نەبێ وەیان بەسەری دا سەپێندراوە کە خۆی لەم راِستیە بەدوور بگرێ.!!
لەلایەکی تریشەوە ئاماژە بەو گفتارە دەکات گوایە هونەرمەند (هاوتا ئەسعەد) پرسی نەکردووە و لە خۆیانەوە ئەو شیعرانەی کردووە بەگۆرانی، شیعر تا نەکەوێتە نێو ئامێزی دوو توێی نامیلکە یاخوود دیوانێک، ئەمە موڵکی شاعیرە و پێویستە هەر کەسیک ئەم شیعرەی دەست نیشان بکات، بۆ ئەوەی بەرگی ئاوازی بەبەردا بکات، لە راستی دەبێ پرس بە خودی شاعیرەکە بکرێت.
بەڵام ئەگەر کۆمەڵە شیعرێک بە چاپ گەیندراو لە دووتوێی نامیلکەیەدا بە چاپ گەیندرا، بێگومان ئەم شیعرانە دەبنە موڵکی میللەت، شاعیر تەنها بە خاوەنی ئەو شیعرانە دەناسرێ، لەگەڵ ئەوەشدا هیچ جۆرە پرسێک بە شاعیر ناکرێت، کاتێک بابەتەکانی بوون بە موڵکی میللەت.
دیسان شیعرێکی چاپکراو بۆی هەیە چەند گۆرانیبێژێک هەریەک بەجۆرێک بە ستایلێک ئاوازی بۆ دابنێن و ئەمەیان لە رێز و حورمەتی شیعرەکە زیاد دەکات، کەواتە وەک گوتمان شیعر هەر ئەوەندە موڵکی شاعیرە تاچاپ نەکراوە، کاتێک بچاپ گەیندرا لە موڵکی شاعیر دەردەچێ هیچ جۆرە پرسێکی بوون و نەبوونی لێ ناکرێت.
دەربارەی شیعری نیشتمان شاعیر دەڵێ لەسەر ئاوازێکی شاد کراوە بە گۆرانی، بەڕێزم من نووسەر و شاعیر و رۆژنامەنووسم لە راستی دا ئاواز شێوازی ستایل کاری من و تۆ نیە، ئەمە پەیوەندی بەخودی هونەرمەندەوە هەیە، بەڵام من وەک ئەوەندەی لە هونەرمەندان و لە ئاوازی جۆراو جۆر لە مۆسیقا نزیک وابزانم ئەم ئاوازەی نیشتمانە پێویستە جارێکی تریش بە ووردی گوێی بۆ رادێری.
چونکە ئاوازی شاد سیمای خۆشی و خەندە دەبخشێت، کەچی ئەم ئاوازەی نیشتمانە لاواندنەوەیەکی رۆمانسیانە بگرە شیوەنێکی بەرچاوە، کە بۆ شەهیدان ئەنفال دەگرێدرێت.
لە شوێنکی دیکە دەفەرمووێت دەستکاری شیعری کردووە و هەروەها بۆی زیاد کردووە، پێشتر باسی ئەوەمان کرد، تەنها ووشیە (کوردستان) بەرامبەر (نیشتمان) دانراوە، کە ئەمەش نابێتە زیاد کردن و دەستکاری، چونکە سیمای تێکستەکە بەووشیە کوردستان جوانتر و سەرنج راکێش تر دەبێت.
باسی (زوڵم) دەکەی لەکاتێکا تۆ دەفەرمووی (ئەی نیشتمان هەموو غەدرمان لێکردووی)ى لە هەمان کاتدا هونەرمەند دەڵێ (ئەی نیشتمان غەدرمان لێکردووی و زووڵڵمان لێکردووی) جا من کاک (ئیسماعیل مەحەمەد) بەکەم تەرخەم دەزانمکە تەنها ووشەی غەدری بەکار هێناوە، لێرەدا دەپرسم ئایا تەنها غەدرەمان لە نیشتمان کردووە ؟ وەیان هیچ مافێکی نیشتمانیمان بەم کوردستانە نەداوە ؟ بەڵکو (زووڵڵمی) زۆر زەقمان لێکردووە ؟! دەبێ کوردستان گەردنی هەموومان ئازاد بکات، جگە لە (پێشمەرگە) تەنها (پێشمەرگە) بوو کە مافی بەدایکی خۆی دا کە خۆی بۆ بکات بە قوربانی و بەرنگاری دوژمنانیش ببێتەوە، کەچی دەبوایە ئێمە هەموومان (پێشمەرگانە) رەفتارمان لەگەڵ وڵاتی خۆمان بکردایە، تەنها تاکە خۆفرۆشێک و نیشتمان فرۆشێک و چڵکاو خۆرکێشیمان لەو وڵاتە بەدی نەکردبا.
لەبارەی مناڵێکی هەست ناسک کە لە ئێستاو خولیای هونەر و خوێندنە بەڕێز کاک (ئیسماعیل) ناڕەزایی دەر دەبڕێت، کە نەدەبوایە ئەو مناڵە پەلکێش بکرێت بۆ نێو ئەم گۆرانییە لەلایەک پاساوی ئەوەیە کە (ئەمە گۆرانییەکی حوزن و یەئسە، لەلایەکی تریشەوە دەڵێت ئەم ئاوازە ئاوازێکی شادە !!!)
بێگومان منداڵ نەوەی داهاتووە پێویستە کە ئەمڕۆ شۆرشی سیاسەت و خزمەتکردنی وڵاتە بەهەموو جۆرێکەوە، پێویستە مناڵەکانمان بەو شێوەیە رابێنین و پێیان بناسێنین (کوردستان) چیە و بۆ ناوی (کوردستان)ـەو تا ئێستا (کوردستان) لە چ گۆرەپانێکی دونیادا ناسراوە.
لە رابردوو کوردستان چی بەسەر هاتوو لە ئایندەش بەچ ئاقارێک گوزەر دەکات ؟؟
پێویستە مناڵ چۆن (کەرکوک) دەناسێ واباشە (دیار بەکر و قامیشلۆ و مەهاباد)ـیش بناسێت، پێویستە مناڵ بزانێت ئەم (کوردستانە) کەی و بۆچی پارچە پارچە کراوە و کێ کردوویەتی و ئێمە چی بکەین ؟؟!!
بۆ ئەوەی ئەم چوار سنوورە دەستکارە راماڵین، ئەگەر ئێمە مناڵەکانمان لە خزمەتی وڵات و هونەرێکی رەسەن و کەلتورێکی کاکڵەیی رانەهێنین و بارنەهێینین ئەی دوای مەرگی خۆمان کێ خاوەنی هونەر و وڵات و موعاناتمان دەست نیشان بکات ؟؟!!
پێم وایە گۆرانی (راپ) خزمەتی وڵات ناکات، ئەگەر مناڵەکانیشمان بەم رێچکەیە ئاشنا بکەین، کەواتە دەستمان لە بنی هەم بانەی هونەر دێتە دەرێ.
لە کۆتایی دا رێزم بۆ کاک (ئیسماعیل) هەیە هیوادارم لە ئایندەدا نەڵێ من (شەفیق بەیاد)ـیش ناناسم !!.
نووسینی – مامۆستا شەفیق بەیاد
