دیدار نانەكەلی : ئەم ووڵاتەی ئێمە لە بنەڕەتەوە خوی بە لاسایی كردنەوە و چاولێكەریەوە گرتووە, هەربۆیە هەموو سەركەوتن و شكستەكان لەو لاسایی كردنەوەیەدا دەبینم. بە بڕوای من هەموو ژیانمان بۆتە چاولێكەری, خۆ ئەگەر بمانەوێت بۆ خۆمان بژین و تۆسقالێك لە خۆمان بچین, ئەوا چاڵاكی و جموجۆڵەكانمان دەوەستێت و هەگبەی داهێنانمان خاڵی دەبێت.
هەروەك چۆن ئێمە لە بواری وەرزش دا كە لە پەیژەی یەكەمی هەنگاونانین بۆ خۆ ناساندن ,چاومان لە یانە زلهێز و پڕئەزموونەكانی ئەوروپا كرد و بناغەی یانەكانی خۆمان لەنگ و لاوازكرد. چونكە ئێمە ئەگەر دەبینین یانەكانی ئیسپانیا و ئیتاڵیا زۆرترین ئەستێرە و یاریزانی ئەزموونداریان لە خولەكانی ئەمریكا و ووڵاتانی دیكەی ئەوروپی پەلكێشی خول و چالاكیەكانی نێوەخۆی ووڵات و یانەكانیان كردووە,تا لەڕێگەی تەكنیك و خێرایی و نوێكاریەكانی تۆپی پێ ی ئەو یاریزانانە زۆرترین سوود بگات بە یاریزانە ئیسپانی و ئیتالیەكان و زۆرترین ئەزموونیان لێ وەرگرن. تا ئەو ڕادەیەی بەهۆی بەهێزی خولەكانی نێوەخۆی ووڵات ئێستا هەڵبژاردەیەكی وەكو هەڵبژاردەی ئیسپانیا بەهێزترین هەڵبژاردەی ئەوروپای لێ خولقاوە و بۆتە ڕكابەری سەرەكی پاڵێوراوانی پاڵەوانی مۆندیالی ئەفریقای باشوور. وەلێ لە هەڵەی ئەو لاسایی كردنەوەیەدا یانەیەكی كەم ئەزموونی خولەكانی دەرەوە و پۆلینكراو لە ئاستە مام ناوەندەكانی وەكو
(یانەی هەولێر )هەستا بە لادانی تەواوی یاریزانە كوردستانیەكان و دانانی چەندین یاریزانی ئاست نزمی عەرەب لەشوێنیان.كە ئەمەش خاڵی لاوازی یانەكەیە لە خول و پاڵەوانیەتیە نێودەوڵەتیەكان و داهاتووی یانەكەی بەرەو هەڵدێر بردووە و گاریگەریەكی ڕاستەوخۆی هەیە لەسەر كەم بوونەوەی ڕێژەی جەماوەر لەنێو یاریگاو هێنانە خوارەوەی گەرم و گوری هاندانێك كە زۆر پێویستە بۆ هەر تیپ و یانەیەك.چونكە دڵسۆزیەك نابیندرێ لە لایەن ئەو یاریزانانەی ئیستا لەریزی ئەو یانەیە وەكو یاریزانی سەرەكی یاری دەكەن . بەهەمان شێوە لە بوارەكانی دیكە. ئەوەتا بەرنامەی پێشبڕكێ ئامێزی چەشنی ملیۆنێر و مەگەزین و شۆیەكان لە دونیا خەریكە بە تێپەڕبوونی تەمەنێكی گەورە دادەخرێن, كەچی تازە لە كوردستان منەتی داهێنانی بەسەر خەڵك دەفرۆشن وەك ئەوەی كوردستان لە ئەشكەوتێك كۆكرابێتەوە و چاوی لەو هەموو گۆڕانكاریە جەوهەریانەی ڕاگەیاندنی دونیا نەبێت.ئەوەی بازرگانێك بەناوی داهێنەر لە بواری ڕاگەیاندن منەت بەسەر خەڵكەوە دەكات. كارەكانیان تەواو كۆكراوەتەوە لە لاساییەكی پوختی ئیعلامی توركی.ئەسڵەن داهێنان لە بواری ڕاگەیاندن زۆر بەئەستەمی فەراهەم دەبێت ئەوەی خەڵك دركی پێدەكات تەنیا پەلكێشكردن و قۆرغكردن و وەرگێڕانی بیروهزرو هەوڵ و هیمەتی داهێنەرێكە كە خۆی خاوەنی كار و بیرۆكە و ماندووبونەكانە و بیریشی بۆ بازرگانیكردن تەنانەت بە ووشەی داهێنانیش نەچووە. كە ناڵێكی دامەزراوەی تایبەت بە ڕێكلامیش لە كوردستان سوك و سانا خۆی دەكا بە خاوەنی , بە زیادكردنی ووشك كردنەوەی تەڕاتی بەرنامەكان.
لە بواری هونەریشدا ڕاستیەكی حاشا هەڵنەگرە كە بابەتی لاسایی كردنەوە ئەوەندە زەقە كە گوێگرێكی بەردەوامی میوزیك و گۆرانی كوردی هەرگیز ناتوانێت پێمان بڵێت ئا ئەوەتا میوزیكی ئۆرجیناڵی كوردی.لە بواری میوزیكی كوردیدا هەموو ستایل و ڕوحیەتەكانی تورك و فارس و عەرەب دەبینین تەنها كوردی نەبێت . لە وڵاتێك داهێنان بە لاسایی كردنەوە بزانرێت , هەرگیز ناگاتە پەیژەی یەكەمی ئامانجەكانی.لە مزگەوتێك مەلایەك لە نوێژی هەینی بابەتێكی كاریگەر دەورووژێنێ لە هەینی داهاتوو 12 مەلای دەورو بەری هەمان بابەت بە كرچوكاڵی دەخەنەبەرباس. گەنجێكی بەتوانا بەرنامەیەك پێشكەش دەكات كە لە باب و باپیرانیەوە كەچەڵی بۆ ماوەتەوە, كەچی هەفتەیەك نابات هەمان بەرنامە لەكەناڵێكی تەلەفزیۆنی دیكە دەبینین و پێشكەشكاری لاسایكەرەوە كە خاوەن قژێكی زۆربوو بەڵام لەبەرنامەكەدا خۆی كەچەڵ كردووە.گەنجێك حەزی جولا گەشتَكی كرد بۆ دەرەوەی ووڵات, نیوەی ووڵاتەكە چاوی لێكردەووە و كلكی یەكتریان گرت و بێ هیچ ئەگەرێك ڕوویان لە غوربەت كرد.دووكاندارێك لە فیتەری خودا ڕۆزی دابین كرد, لەفە فرۆشەكەی تەنیشتی بۆ بەیانی بۆتە فیتەر.گەورە هونەرمەندێ كە بۆ ماوەی زێتر لە 40 چل ساڵە وەكو ئیمپڕاتۆر لە گۆڕپانەكەیە و بە كەمێك لە داهاتی چەندین ساڵی هونەرەكەی بازرگانیش دەكات, كەچی گەنجێكی كورد كە هیوادارم خاوەنی هەموو دونیا بێت وەلێ تەمەنی لەدایك بوونی هەر 30 ساڵێكە و خاوەن دوو بەرهەمە, خۆی دەكات بە خاوەنی گەورەترین پڕۆژەی بازرگانی كوردستان, كە تەنها لەو پرۆژەیە ژورێك هی خۆیەتی. دەكرێ لە ئێوە بپرسم داهێنان لە كوێی ئەم ووڵاتەی ئێمە دایە؟
