لەبەرنامەی (من جیاوازم)ـدا ئەم جارەیان (ئەیاد) زۆر جیاواز دەردەكەوێت !!
(ئەیاد حوسێن) : ” دەمێكە پلانێكم لە خەیاڵی خۆمدا دانابوو بۆ ئەوەی رۆژێك لە رۆژان بەرنامەیەكی هونەری پێش كەش بكەم، لەیەكێك لە tv یەكانی كوردستان!!
بەرنامەی (من جیاوازم) یەكێكە لە پرۆگرامەكانی كەناڵی ئاسمانی زاگرۆس tv، تیایدا لەو بەرنامەیەدا ئەو كەسانەی خاوەن بەهرەو توانایەكن بەشداریی دەكەن و تواناكانی خۆیان نمایش دەكەن، ئەو بەرنامەیە ماوەی چەند مانگێكە وەستاوە و ئەڵقەی تازەی پێش كەشی بینەرانی نەكراوە، ئێستاكە جارێكی دیكە بەرنامەی “من جیاوازم” پێش كەش دەكرێتەوە، كە ئەو وەرزەی ئەو بەرنامەیە دەبێتە چوارەم وەرز. كە پێش كەشی بینەرانی دەكرێت، ئەوەی جێگای سەرنج و تێرامانە هونەرمەندێكی گۆرانیبێژ دەبێتە پێش كەشكاری ئەو بەرنامەیە، هەرچەندە پێشتر چەند هونەرمەندێكی بواری شانۆ و دراما وەك لێژنەی هەڵسانگاندن بەشداریی ئەو بەرنامەیان كردبوو، بەڵام ئەم جارە هونەرمەندێكی گۆرانیبێژ دەبێتە یەكێك لە پێش كەشكارانی ئەو پرۆگرامە، كە ئەویش هونەرمەند (ئەیاد حوسێن)ـە، ئەو هونەرمەندە ماوەی چەندیین ساڵە لە تاراوگە نیشتەجێیە و ئێستاكە لە وڵاتی سوێد ژیان بەسەر دەبات، بەڵام ماوەی چەند رۆژێكە بەسەردانێك گەڕاوەتەوە بۆ كوردستان و دەستی كردووە، بۆ ئەوەی چەند ئەڵقەیەك لە پرۆگرامی (من جیاوازم) تۆمار بكات، بۆ ئەو مەبەستە هەفتە نامەی “هونەری هەولێر” پەیوەندییمان كرد بە هونەرمەندی گۆرانیبێژ (ئەیاد حوسێن) بۆ ئەوەی چەند پرسێكی ئاڕاستە بكەین، سەبارەت بە چۆنیەتی كار كردنی وەك پێش كەشكارێك لە پرۆگرامی (من جیاوازم)، ئەویش لەلای خۆیەوە وەڵامی پرسیارەكانی ئێمەی بە خۆشحاڵیەوە بۆ دایەوە.
سەرەتا دەبارەی چۆنیەتی بڕیاڕدانی بۆ كار كردن لەكاری میدیای دا بەتایبەتی كاری بێژەری لە تەلفزیۆندا، هونەرمەند (ئەیاد حوسێن) گوتی : “من دەمێكە پلانێكم لە خەیاڵی خۆمدا دانابوو بۆ ئەوەی رۆژێك لە رۆژان بەرنامەیەكی هونەری، لەیەكێك لە tv یەكانی كوردستان پێش كەش بكەم، بەڵام دیار بوو چانسەكەی من وابوو بەرنامەی (من جیاوازم) پێش كەش بكەم، دیارە ئەو بەرنامەیەش وەك بەرنامەیەكی هونەری وایە و بۆ بەهرەمەندانە جیاوازییەكی ئەوتۆی نیە لەگەڵ بەرنامەیەكی هونەری كە لەخەیاڵی دا مندا هەبووە، جگە لەوانەش بەرنامەی (من جیاوازم) یەكێكە لە بەرنامە سەركەوتووەكانی كەناڵی زاگرۆس tv كە یەكێكە لە تەلفزیۆنە هەر باش و دیارەكانی كوردستان، من خۆم زۆر حەزم لەو بەرنامەیە بوو پێشتریش سەریرم كردووە، بەڵام (ئەیاد) دەڵێت من گۆرانگاری بەرچاوم لەو بەرنامەیەدا دروست كردووە و ئینجا هاتووم پێش كەشی دەكەم و لەم بارەیەوە دەڵێت : “من كە سەیری ناوەرۆكی پرۆگرامی ئەو وەرزەی ئەم جارەی (من جیاوازم) كرد، واتە وەرزی چوارەم توانیم چەند گۆرانكارییەكی تێدا دروست بكەم، لەوانە زیاد كردنی چەند بڕگەیەك و چەند نمیاشێكی كۆمیدی لەلایەن هونەرمەندی كۆمیدی (شەمۆ)، كەیەكێكە لەو هونەرمەندانەی بەشداریی لەو بەرنامەیەدا دەكات لەگەڵ ئێمە، هەروەها شێوازی پێش كەشكردنی ئەو بەرنامەیە كەمن و خانمێك بەناوی (رۆزە) بەیەكەوە ئەو بەرنامەیە پێش كەش دەكەین، دەتوانم بڵێم من وەك (ئەیاد) بەشێوەیەكی جیاوازتر هاتووم ئەو بەرنامەیە پێش كەش دەكەم”.
دەربارەی ئەوەی ئایا ئەو بەرنامەیە بە شێوەی گرێبەست پێش كەشی دەكەیت یاخوود وەك كارمەندێكی كەناڵی ئاسمانی زاگرۆس tv كارییان لەگەڵ دەكەیت ؟ لەوەڵامدا هونەرمەند گوتی : “تا ئێستا لە 100% كارەكانن لەگەڵ ستاف و بەڕێوەبەرانی كەناڵی زاگرۆس یەكلای نەبۆتەوە، بەڵام لەلای خۆمەوە هیچ لارییەكم نیە لەسەر ئەوەی كە وەك گرێبەست بێت یاخوود وەك كارمەندێك كار لەگەڵ ئەو كەناڵە بكەم، لەبەر ئەوەی ئەوان رێزێكی زۆریان لەمن گرتووە و منیش ئەو رێزە لە بەرچاو دەگرم و بڕواناكەم لەسەر ئەو بابەتە كێشەم بۆ دروست ببێت”.
هونەرمەند (ئەیاد حوسێن) پێی وایە هونەرمەند پێویستە لە تەلفزیۆنەكانی كورد بوونی هەبێت بۆ ئەوەی ئاستی كەناڵەكان زیاتر بەرەو پێشەوە بچێت و لەم بارەیەوە گوتی : “من پێم وایە هونەرمەند كەسێكی دیارەو هەموو هونەرمەندێك جەماوەرێكی باشی هەیە و هونەرمەند موڵكی خەڵكە، بۆیە ئەگەر هونەرمەندانی گۆرانیبێژ لە شاشە و پرۆگرامەكاندا بوونیان هەبێت پێم وایە پرۆگرامەكانمان بەرەو ئاستێكی باشتر و جوانتر دەڕوات، جگە لەوانەش هونەرمەندێكی پێش كەشكار بەهۆی ئەو پەیوەندییانەی كە لەگەڵ هونەرمەندانی هاوڕێ ی هەیەتی بەرنامەكە جوانتر بكات و هونەرمەندانی لێهاتوو بانگهێشتی بەرنامەكەی بكات”.
بەرنامەی (من جیاوازم) تەنها نمایش كردنی توانای ئەو كەسانەیە كە بەهرەمەندن و دەتوانن شتێكی جیاواز پێش كەش بكەن، یاخوود بەشی هونەرمەندێكی تێدایە كە بتوانێ بەشداریی تێدا بكات ؟ لەوەڵامی ئەو پرسیارەشدا (ئەیاد حوسێن)ـی گۆرانیبێژ دەڵێت : “لە وەرزی ئەم جارەی بەرنامەی (من جیاوازم) بەشێكمان داناوە بۆ میوانداری كردنی هونەرمەندێكی گۆرانیبێژ بۆ ئەوەی بە چەند گۆرانییەك بەرنامەكە جوانتر و جۆش خرۆشێك بداتە بینەران، بۆ ئەو مەبستە بەرنامە رێژیمان كردووە و پەیوەندییمان بەچەند هونەرمەندێكەوە كردووە بۆ ئەوەی بەشداری لەو بەرنامەیەدا بكات، جگە لەوان خۆم لەوانەیە هەر بەرنامەیەك گۆرانییەك پێش كەش بكەم یاخوود هونەرمەند (زاهیر جەلال) لەگەڵ (دكترە بەڵقیس) كە ئەوانیش هاوڕێ ی منن لەو بەرنامەیەدا و ئەندانی لێژنەی هەڵسەنگاندنە ئەوانیش بە گۆرانی بەشدارییمان لەگەڵ دەكەن”.
ئێستاكە (ئەیاد حوسێن) كە بڕیاری داوە وەك پێش كەشكارێك لە كوردستان كار بكات، ئایا بڕیاری یەكجارەكی داوە بۆ ئەوەی بگەڕێًتەوە بۆ كوردستان ؟ لەوەڵامدا گوتی : “جارێ زووە بۆ ئەو بڕیاڕە، ناتوانم جارێ بڕیاری ئەوە بدەم بڵێم بەیكجاری دێمەوە بۆ كوردستان، چونكە من چاوەڕێی هەندێك شتم، جگە لەوەش ئەگەر بزانم لێرە دەتوانم باشتر خزمەتی وڵاتەكەم بكەم، بە بە ئەكید بڕیارێكی لەو جۆرەم زۆر پێخۆش دەبێت و دەگەڕێمەوە بۆ كوردستان و لێرە درێژە بە ژیانم دەدەم”.
(ئەیاد حوسێن) لە بەشێكی دیكەی لێدوانەكەی دا ئاماژەی بۆ ئەوەش كرد، كە ئەو بەرنامەیە یەكەم بەرنامەی من نابێت، بەڵكو پرۆژەی چەند بەرنامەیەكی دیكەی لە خەیاڵدایە و لەم بارەیەوە گوتیشی : “ئەو بەرنامەیە یەكەم بەرنامە و دوایین بەرنامەی تەلفزیۆنی نابێت كاری تێدا بكەم، بەڵكو جگە لەبەرنامەی (من جیاوازم) لە لای خۆم پرۆژەی چەند بەرنامەیەكی دیكەم لە خەیاڵدایە، ئەگەر هاتوو دەرفەتی زیاترم بۆ بڕەخسێت بێگومانم بەرنامەی باشتر و هەمەڕەنگ پێش كەش دەكەم لە داهاتوودا”.
لە كۆتایی دا هونەرمەندی گۆرانیبێژ (ئەیاد حوسێن) گوتی : “هیوادارم كار كردنم لە پرۆگرامێكی ئاوادا ببێتە دریژە پێدەری ئەو خزمەتەی، كە من ساڵانێكە هەوڵی بۆ ئەدەم لە رێگەی هونەركەم، هەروەها ئومێدە دەكەم بینەران چەند ساتێكی خۆش لەگەڵ ئەو پرۆگرامەدا ببەنە سەر”.
عەبدولغەفار عەبدوڵڵا
سپۆت :
– لەبەرنامەی (من جیاوازم)ـی ئەم جارەدا، توانیم چەند گۆرانكارییەكی تێدا دروست بكەم!!.
– لە وەرزی ئەم جارەی بەرنامەی (من جیاوازم) بەشێكمان داناوە بۆ میوانداری كردنی هونەرمەندێكی گۆرانیبێژ بۆ ئەوەی بە چەند گۆرانییەك بەرنامەكە جوانتر و جۆش خرۆشێك بداتە بینەران.
– ئەگەر هونەرمەندانی گۆرانیبێژ لە شاشە و پرۆگرامەكاندا بوونیان هەبێت پێم وایە پرۆگرامەكانمان بەرەو ئاستێكی باشتر و جوانتر دەڕوات!.
