چلوچوار رۆژه ، سه‌رای ئازادی سلێمانی جمه‌ی دێ له‌مرۆڤه ئازاده‌کان،ئه‌وانه‌ی جه‌ورو سته‌می گه‌نده‌ڵی تاسه‌ر ئێسقانی بڕیون،ئه‌وانه‌ی هیچی تریان نیه له‌ده‌ستی ده‌ن غه‌یری ئازاره‌کانیان و ته‌وق و به‌ندی گه‌ردن و ده‌ست و پێیان،له‌گه‌ڵیاندا ده‌یان نووسه‌رو ڕۆشنبیری ئازاد،
ئازاد له‌هه‌موو پێوه‌نده‌کانی ترس و پاداشتگه‌رایی..ئازاد له‌کلتووری ڕقو تۆڵه له‌وانه‌ی شتێکی تر ده‌نووسن غه‌یری ئه‌وی ئه‌وان و بڕوایان به‌شتێکی تره غه‌یریی ئه‌وه‌ی ئه‌وان وله‌ژێر ئه‌و چاویلکانه‌وه سه‌یری ژیان ناکه‌ن که‌ته‌بیبه پسپۆڕه‌کانی گه‌نده‌ڵی بۆیانی ده‌نووسن .. ئه‌وه‌ی غائیبه له‌وێ،ده‌نگو ڕه‌نگی ئه‌و نووسه‌رو شاعیرو هونه‌رمه‌ندانه‌یه که‌ساڵانێکه ڕاگه‌یاندنه‌کانی ئه‌م حیزب و ئه‌و حیزب دروستیان ده‌که‌ن و پێشکه‌شی کۆمه‌ڵگایان ده‌که‌ن وه‌ک ئه‌ستێره‌یه‌کی دره‌وشاوه‌ی ئه‌ده‌ب و هونه‌رو مانگانه‌ش هه‌ندێک له‌سایته‌کانی نوسین ، نوسین و شیعرو به‌رهه‌مه‌کانیان له‌چوارچێوه‌یه‌کی ئاڵتون ده‌نێن
که‌م نین ئه‌وانه‌ی له‌به‌رسیله ترشه‌کانی ووشه به‌تامترین شه‌رابی ده‌ق ئاماده ئه‌که‌ن بۆ سه‌ر مێزی میرو میرزاده‌کان ، که‌م نین ئه‌وانه‌ی له‌مووروه ڕه‌نگاو ڕه‌نگه‌کانی فه‌لسه‌فه تۆڕه جاڵجاڵۆکه‌ییه‌کانی فریدان ده‌هۆننه‌وه بۆ گه‌ردنی ڕووتوقووتی کوڕو کچه عاشقه‌کانی ئه‌م هه‌واره یاساغه .. که‌میش نین ئه‌وانه‌ی ئیدیعای ئه‌و ده‌که‌ن که‌کتێبه‌کانیان کانیله‌ی ئه‌م خۆپیشاندانه‌ن و وه‌لێ خۆشیان له‌په‌راوێزی جوانی فرۆشتن به‌روخساره قێزه‌وه‌نه‌کاندا ده‌ژین
ئه‌وه‌ی غائیبه له‌م نیگاره‌دا ، جێ په‌نجه‌و زایه‌ڵه‌ی ئه‌و نووسه‌رو ڕۆشنبیرانه‌یه که‌شه‌وانێکی زۆر شاشه‌ی به‌تاڵی که‌ناڵه ناوداره‌کانیان پێ پڕده‌کرایه‌وه ، به‌تایبه‌تی ئه‌و به‌هارانه‌ی که‌به‌پشووی ساڵانه ڕوویان ده‌کرده‌وه ووڵات و داخ و خه‌می غه‌ریبی خۆیان به‌گه‌نجانی نیشتمان ده‌فرۆشت ، ئه‌وه‌ی دیار نیه‌له‌م ڕاپه‌ڕینه نوێیه‌دا ، ئه‌وانه‌ن که‌ساڵانێک په‌ڕه‌کانی هه‌موو گۆڤاره‌کانیان قۆرخ ده‌کرد به‌ختووکه شیعره‌کانیان ، ئه‌و ختوکانه‌ی که‌ته‌نانه‌ت بن پێی سته‌مکاریشی نه‌ده‌هه‌ژاند .. به‌گیژاوای ئه‌و قه‌سیدانه‌ی که‌ته‌نانه‌ت خۆشیان له‌نیوه‌یدا وێلی دۆزینه‌وه‌ی ده‌روازه ده‌بوون و لێیان تێک ده‌چوو ، باسی چی ده‌که‌ن .. به‌ڵێ ڕاشکاوانه ده‌ڵێم ، ئه‌وی له‌م خه‌نه‌به‌دانی خوێنه‌دا به‌خوێنی گه‌رمیان و ڕێژوان و هاوڕێکانی .. نوزه‌یه‌کی لێوه نه‌هاتبێ ، ئه‌وه یان شێتێکی زگماکه یان سودپه‌رستێکی عه‌یار مه‌رجیش نیه نووسه‌ر له‌دووربینی ئۆپۆزسیۆنه‌وه سه‌یری دونیا بکات ، وه‌لێ حه‌ق هه‌ر حه‌قه‌و به‌س ببوورن ئازیزان ، نه‌م ده‌ویست ساته‌وه‌خته ئه‌رخه‌وانیه‌کانی مه‌زاجتان بشێوێنم ، به‌ڵام ئه‌گه‌ر خۆشتان به‌ده‌فته‌ری یادگاریتاندا بۆ جارێک بچنه‌وه ده‌زانن که‌چ خه‌راباتێکه دونیاو ده‌زانن که‌به‌چ داخێکه‌وه سوتاوه دڵی من
به‌ندی عه‌لی .. به‌هاری 2011
